Дзæуджыхъæуы байгом ДНК-лаборатори

0
1017

Знон РЦИ-Аланийы Мидхъуыддæгты министрады бæстыхайы кадджын уавæры байгом ДНК-лаборатори. Ныр нæ-иу æвæстиатæй сбæлвырдгæнинаг анализтæ Стъараполмæ (Цæгат Кавказы æрмæст уым ис ахæм лаборатори) æрвитыны сæр нал бахъæудзæн, фæлæ-иу цыбыр рæстæгмæ нæхи дзыхъхъынног лабораторийы дæсны кусджыты руаджы цæттæ уыдзысты бынаты. Ацы хорз хъуыддаг саразынæн нæ республикæйы Мидхъуыддæгты министрад бындур бавæрдта 2012 азы. Ирыстоныл 2009 æмæ 2010 азты фæд-фæдыл цы бæллæхтæ æрцыд, иуæй Сæйраг базары срæмыгъд, иннæмæй та Черменыхъæуы цур посты срæмыгъд. Уыдоны чи фæмард, уыцы адæмæй кæйдæрты сбæлвырд кæнын зын уыд. Уымæ гæсгæ нæ министрады разамынд балæвæрдта курдиат Уæрæсейы Федерацийы Мидхъуыддæгты министрадмæ, цæмæй нæм Экспертон криминалистон центры байгом уа ДНК-лаборатори.

2013 азы архайд ныхасæй хъуыддагмæ рахызт. Лаборатори байгом кæныны проектæн Уæрæсейы Федераци радих кодта 52 милуан сомы. Бæстыхайы ис иуæндæс куыстуаты. Чи дзы кусдзæн, уыдон сты дæсны специалисттæ. Рагацау æрвыст æрцыдысты уæлдæр ахуырад райсынмæ, цæмæй базоной экспертон лабораторийы куысты æппæт сусæгдзинæдтæ æмæ экспертизæтæ æмæ ДНК-анализтæ кæныны хайады нырыккон авналæнтæ. 2013 азæй 2015 азмæ ацы лабораторийы цы авд эксперты кусы, уыдон ахуыр æмæ практикæ кодтой Уæрæсейы Мидхъуыддæгты министрады Экспертон-криминалистон центры. Цы аппаратурæтыл кусынц, уыдон сты хæрзхъæд æмæ нырыккон домæнтæм гæсгæ алцæмæй æххæст. 2015 азы декабры аппаратурæтæ скуыстой. Бафæлвæрдтой сæ хъуыддаджы. Уыцы-иу рæстæг иу приборыл кæнæн ис 96 экспертон анализы. Ныр нæ республикæйы Мидхъуыддæгты министрады кусджытæн сæ бон уыдзæн фыдгæнæджы тагъддæр сбæрæг кæнын, уый хорзæрдæм фæзындзæн сæ куысты хæрзхъæддзинадыл. Зæгъæм, фыдгæнæджы сбæлвырд кæнæн уыдзæн йæ сæт, туг, сæрыхъуын æмæ æндæр биологон æрмæджыты руаджы æртæ бонæй къуырийы æмгъуыдмæ. Ацы иртасæн куыстытæ сты зынаргъ, фæлæ æнæмæнг хъæугæ. Æмгуыст кæндзысты сыхаг республикæтимæ дæр. Фæлæ бынæттон цæрджыты курдиæттæ, ома, сбæлвырд кæнын хиондзинад æмæ æндæр фарстатæ, сæ бон закъонмæ гæсгæ æххæст кæнын нæу. Мадзалы архайдтой Мидхъуыддæгты министрады кусджытæ æмæ дзыллон хабархæссæг фæрæзты минæвæрттæ. Мидхъуыддæгты министры хæстæ рæстæгмæ æххæстгæнæг Рæмонаты Эльбрус радзырдта ДНК-лабораторийы стыр ахадындзинад æмæ нысаниуæджы тыххæй. Уый фæстæ журналисттæн фадат уыд лабораторийы иуæндæс куыстуаты хи цæстæй фенынæн. Равдыстой, кæцы аппаратурæйыл цавæр куыстытæ фæкæнынц, уый. Ныридæгæн дæр æнцад нæ бадынц. Хъуамæ сбæлвырд кæной иуæндæс биологон æрмæджы. Лабораторийы сæргълæууæг Æрчъегкаты Людмилæ æмæ лабораторийы хистæр эксперт Андрей Нехорошкин журналистты базонгæ кодтой, ног кусæнгæрзтыл къæпхæнгай экспертон иртæстыты архайд куыд фæцæуы, уыимæ.

ХЕТÆГКАТЫ-УАНИТЫ Оксанæ

ОСТАВЬТЕ ОТВЕТ

Please enter your comment!
Please enter your name here