Зардзысты Мæскуыйы

0
1085

Дзæуджыхъæуы ахицæн адæмон коллективты къордгай зарынады æппæтуæрæсеон фестивалы регионалон æвзарæн хай. Фестиваль арæзт цæуы къордгай зарынады аивады æгъдæуттæ бахъахъхъæныны æмæ сæ рæзтæн ахъаз кæныны нысанимæ УФ-йы Культурæйы министрады æмæ Къордгай зарынады æппæтуæрæсеон æхсæнады хъæппæрисæй ацы азы февралæй фæстæмæ бæстæйы æппæт регионты дæр.

Цæгат Ирыстоны Культурæйы министрад æмæ Æппæтуæрæсеон музыкалон æхсæнады æххуысæй ацæуæг æвзарæн ерысты архайдтой республикæйы музыкалон æмæ иумæйагахуырадон скъолатæй къордгай зарæггæнджыты 20 коллективы, стæй профессионалон æмæ хæдахуыр зарæггæнджыты иугæндтæ. Жюрийы сæрдар, Петербурджы къордгай зарынады паддзахадон капеллæйы генералон директоры хæдивæг Федор Романов æмæ Цæгат Ирыстоны адæмон зарынады культурæйы къабазы дæсныдæр минæвæрттæ Хосроты Тамерлан, Мурасты Изабеллæ æмæ Колыты Тамарæ сбæлвырд кодтой фестивалы регионалон хайы цыппар лауреаты нæмттæ: республикæйы Аивæдты лицейы зарæггæнджыты хистæр къорд «Арион» (разамонæг — Дзанайты Ольгæ), РЦИ-Аланийы Культурæйы министрады музыкалон скъолайы зарæггæнджыты хистæр къорд (Ходы З.), Паддзахадон филармонийы национ зарæджы нæлгоймæгтæ-зарæггæнджыты къорд (Дзанайты Ольгæ) æмæ Цæгат Ирыстоны паддзахадон педагогон институты студенттæ-зарæггæнджыты къорд «Æлутон» (Мамыкъаты Людмилæ). Ныр ацы коллективтæ фестивалы регионалон хайы уæлахиздзауты æмрæнхъ тох кæндзысты Цæгат Кавказы федералон зылды хуыздæрты ном райсыныл. Ацы ерысты уæлахиздзаутæ та ноябры Мæскуыйы архайдзысты фестивалы кæронбæттæны. — Ныридæгæн бæстæйы æндæр регионты æртæ ерысы бабæрæг кодтон, фæлæ ахæм дæсны къордгай зарæггæнджыты федтон фыццаг хатт. Зарæггæнджытæ сæ арæхстдзинад æххæстæй равдыстой, — загъта Федор Романов. Фыдыбæстæйы Стыр хæсты Уæлахизы 70 азы кадæн арæзт Къордгай зарынады фыццаг æппæтуæрæсеон фестиваль ацыд 20142015 азты. Фестивалы архайдтой къордгай зарæггæнджыты 2 мин коллективæй фылдæр (ома, 60 мин адæймаджы бæрц), ерысты кæронбæттæнмæ рацæугæйæ, зарæггæнджыты къорд «Арион» та ссис 2-аг къæпхæны дипломы лауреат.

ОСТАВЬТЕ ОТВЕТ

Please enter your comment!
Please enter your name here