Астæуккаг скъолаты музыкæйы ахуыргæнджытæ аивадмæ хæстæгдæр лæууынц. Фыццаг урокты дæр, зарынмæ, музыкалон инструменттыл цæгъдынмæ æвзыгъддæр цы сывæллæттæ сты, уыдоны равзарынц. Тынг бирæ сты, педагогикæйы ацы хъуыддагыл зæрдиагæй чи кусы, уыдон.
Йæ зонындзинæдтæ ныр 40 азы сывæллæттæн æнæвгъауæй лæвар кæны Елхоты дыккæгæм скъолайы музыкæйы ахуыргæнæг Дзгойты Эльзæ. Музыкалон училище каст куы фæцис, уæдæй нырмæ йæ зæрдæ нæ сивта йæ дæсныйадыл.
Йæхæдæг дæсны цæгъды аккордеон æмæ пианинойыл, фæлæ йæ сæйрагдæр æнтыстдзинадыл нымайы скъоладзауты зарæггæнджыты къордимæ куыст. Кæддæриддæр йæ ахуырдзаутæ вæййынц раззагдæртимæ нымад. Ивгъуыд, 2018 азы, фыццаг бынат райстой Кировы районы скъолаты ‘хсæн, республикон конкурсы та елхотаг скъоладзаутæн саккаг кодтой дыккаг бынат.
Знон Дзæуджыхъæуы Педагогон институты скъолаты музыкæйы ахуыргæнджытæн уыдис ахуырадон семинар. Йæ саразджытæ — РЦИ-Аланийы Ахуырад æмæ наукæйы, Культурæйы министрадтæ æмæ нæ республикæйы музыкалон æхсæнад.
— Ахæм семинарты ахуыргæнджыты фæлтæрддзинадыл бафты, се сфæлдыстадон авналæнтæ фæуæрæхдæр вæййынц, — зæгъы РЦИ-Аланийы музыкалон æхсæнады сæрдары хæдивæг Икъоты Тинæ. — Ныр цыппор азы дæргъы æрвылаз арæзт цæуы, скъолаты цы зарæггæнджыты къордтæ ис, уыдоны ‘хсæн конкурс-æркаст. Уымæ цæттæ кæныны нысанимæ сарæзтам ацы ахуырадон семинар дæр.
Æчеты Аркадийы сфæлдыстадон æрмдзæфыл ныхас цыди семинары. Йæ рæстæджы уый бирæ хæрзты бацыд ирон вокалон аивадæн. Куыд хормейстер, афтæ йе сфæлдыстад уыд алывæрсыг. Мæскуыйы консерватори каст куы фæци, уæд йæ цард сбаста зарæггæнджыты къордты профессионалон рæзтимæ. Бирæ азты дæргъы разамынд лæвæрдта зындгонд сфæлдыстадон къорд — капеллæ «Ирыстон»-æн. Дзæуджыхъæуы аивæдты училищейы ахуыргæнæг уæвгæйæ, бацæттæ кодта æмæ йæ зонындзинæдтæ лæвæрдта, абон аивады сгуыхтдзинæдтæ чи æвдисы, ахæм дæсны музыканттæн.
Семинар арæхстджынæй амыдта Æчеты Аркадийы раздæры ахуырдзаутæй иу, РЦИ-Аланийы ахуырады сгуыхт кусæг, Педагогон институты аивадон æмæ музыкалон ахуырады кафедрæйы сæргълæууæг Мамыкъаты Людмилæ.
Семинар сæ аивадæй барæсугъд кодтой Педагогон институты студентты зарæггæнджыты къорд «Æлутон».
ГУГКАТЫ Жаннæ
