Мишайы кадӕн
Хъӕдгӕроны цӕрджытӕй Епхиты Мишайы чи нӕ зоны, ахӕм нӕ разындзӕн. Миша у Фыдыбӕстӕйы Стыр хӕсты ӕмӕ педагогон фӕллойы ветеран – 50 азы бакуыста хъӕууон скъолайы ахуыргӕнӕгӕй, ис ӕм бирӕ хӕрзиуджытӕ. Уыдонимӕ — Фыдыбӕстӕйы хӕсты II къӕпхӕны орден, майдантӕ, бирӕ азты хъомыладон куыст кӕй фӕкодта, уый тыххӕй йын радтой «Адӕмон ахуырады сгуыхт кусӕджы» ном. Саккаг ын кодтой майдан «Ирыстоны намысӕн».
Азтӕ сӕ уӕз ӕруагътой хӕствӕллад лӕгыл, фӕлӕ уӕддӕр нырма у зӕрдӕргъӕвд ӕмӕ цардбӕллон, кӕстӕртӕн зондамонӕг. 2020 азы фыццаг бон Епхиты Григолы фырт Мишайыл сӕххӕст 100 азы.
Кувӕджы куывд ыл ӕрцыд, ӕмӕ уӕнгрогӕй йӕ ӕнусы сӕрты ахызт. Бирӕ арфӕтӕ, зынаргъ лӕвӕрттӕ райста уыцы бонты нӕ куырыхон хистӕр.
Ног азы арфӕтимӕ Епхиты къӕсӕрӕй цы бирӕ адӕм бахызт, уыдонимӕ уыд нӕ республикӕйы Сӕргълӕууӕг Битарты Вячеслав дӕр. – Бузныг дӕ стӕм иууылдӕр, Миша, дӕ цард кӕстӕртӕн у дӕнцӕгӕн хӕссинаг. Ахӕм хорз хистӕртӕ кӕмӕн ис, уыдон тӕхудиаг сты. Нӕ зӕрдӕ дын зӕгъы фидар ӕнӕниздзинад, амонд, — загъта Битары-фырт ӕмӕ Епхиты Мишайӕн саккаг кодта нӕ республикӕйы кадджындӕр хӕрзиуӕг орден «Ирыстоны намысӕн».
Дыккаг бон кадджын мадзӕлттӕ ахӕццӕ кодтой хъӕууон клубы. Залы къух бакӕнӕн нал уыд. Алы кары адӕм ӕрбамбырд сты, цӕмӕй иумӕйагӕй арфӕ ракӕной хъӕубӕсты кадджын хистӕрӕн.
Хъӕууон клуб, астӕуккаг скъола ӕмӕ бынӕттон администраци бацӕттӕ кодтой цымыдисаг культурон программӕ, ирон кафт ӕмӕ зард, ӕмдзӕвгӕтӕ ӕхсызгондзинад ӕрхастой Мишайӕн. Къӕлӕтджын бандоныл ӕфсӕрмхуызӕй кӕд бадтис, уӕддӕр йӕ мидбылхудт нӕ урӕдта. Адӕм ын лӕугӕйӕ тыхджын къухӕмдзӕгъд кодтой.
Арфӕйы ныхӕстӕ йын загътой РЦИ-Аланийы Ветеранты советы сӕрдар Къаболаты Солтан, «Иры Стыр Ныхас»-ы сӕрдар Кучиты Руслан, радтой йын Кады грамотӕтӕ, зӕрдылдарӕн лӕвӕрттӕ. Ӕрыдоны районы кадджын цӕрӕг уыдзӕн нырӕй фӕстӕмӕ Епхиты Миша. Ацы номимӕ сырх лент ветераныл бакодта районы сӕргълӕууӕг Тотраты Владислав.
«Нӕ алкӕмӕн дӕр ахӕм кадджын хистӕртӕ уӕд. Уый хъӕздыгдзинад у. Уарзут уӕ хистӕрты, аргъ сын кӕнут», — загъта районы сӕргълӕууӕг.
Арфӕйы ныхӕстӕ ма загътой Хъӕдгӕроны бынӕттон администрацийы сӕргълӕууӕг Гуытъиаты Юри, скъолайы директор Цоколаты Заремӕ, Мишайы алы азты рауагъдонтӕ Мерденты Батрадз ӕмӕ Мамиаты Таймураз, клубы директор Баситы Эльзӕ.
Бӕрӕгбон сӕ аив кафтӕй, ирон зард ӕмӕ музыкӕйӕ барӕсугъд кодтой ансамбль «Иры ныфс» ӕмӕ адӕмон инструментты къорд «Хъуыбады». Адӕм къухӕмдзӕгъд сарӕзтой зарӕг «Мишайы кадӕн»- ӕн.
Хъӕугуывд скодтой Хъӕдгӕрон сӕ фӕрнджын хистӕрӕн. Цы бирӕ зӕрдӕбын арфӕтӕ йын загътой хионӕй, сыхагӕй, уыдон ыл дзӕбӕхӕй ӕрцӕуӕнт!
Гугкаты Жаннӕ
