Знон РЦИ-Аланийы Сӕргълӕууӕг Битарты Вячеслав архайдта, УФ-йы хъӕууон хӕдзарады министр Дмитрий Патрушев цы видеоконференци сарӕзта, уым.
Конференцийы рӕстӕг куыд загъдӕуыд, афтӕмӕй 50 уӕрӕсейаг регионы ӕнтыстджынӕй ӕххӕст кӕнынц сӕрмагонд федералон проект «Агропромышленнон комплексы продукцийы экспорт». Уыцы регионты ‘хсӕн — Цӕгат Ирыстон дӕр.
Цӕгат Ирыстон амӕй размӕ Хъӕууон хӕдзарады федералон министрадимӕ цы бадзырд бафыста, уымӕй йӕхимӕ хӕс райста 2019 азы экспортмӕ агропромышленнон комплексы продукци 40,6 милуан сомы аргъ арвитын. Уымӕй уӕлдай, 2024 азы та уыцы бӕрӕггӕнӕн хъуамӕ схӕццӕ уа 43,3 милуан соммӕ. Таможняйы федералон службӕйы бӕрӕггӕнӕнтӕм гӕсгӕ, фарон республикӕйы агропромышленнон комплекс экспортмӕ арвыста 48 милуан сомы аргъ продукци.
Дмитрий Патрушев ахӕм архайд хорзыл банымадта ӕмӕ регионты разамонджытӕм фӕсидт, цӕмӕй амӕй фӕстӕмӕ дӕр стыр ӕргом здахой ахсджиаг инвестицион проекттӕ ӕххӕст кӕнынмӕ.
Цӕгат Кавказы федералон зылды регионты ‘хсӕн агропромышленнон комплексы продукцийы экспорты бӕрцы бӕрӕггӕнӕнтӕй фыццаг бынаты ис Стъараполы край, дыккаг бынаты та — Цӕгат Ирыстон. Зӕгъӕм, 2019 азы республикӕ зынгӕ фӕфылдӕр кодта дыргъты продукцийы рауагъд, республикӕйы кӕсагдарӕг куыстуӕттӕ та 2019 азы рауагътой 2500 тоннӕйы кӕсаджы хӕрзад продукци (2018 азы уыцы бӕрӕггӕнӕн уыд ӕрмӕстдӕр 340 тоннӕйы). Ивгъуыд азы зынгӕ фӕхуыздӕр фосдарынады къабазы архайд дӕр. Зӕгъӕм, фысты нымӕцыл бафтыд 22 минӕй фылдӕр.
Уымӕй уӕлдай, республикӕ дарддӕр дӕр кусдзӕн цымыдисаг инвестицион проекттӕ ӕххӕст кӕныныл.
РЦИ-Аланийы Сӕргълӕууӕджы ӕмӕ Хицауады пресс-службӕ
