Æппæт Уæрæсе, стæй, немæ хæларæй чи царди, уыцы бæстæтæ дæр цæттæ кæнынц сæхи тæккæ стырдæр бæрæгбонмæ, Уæлахизы 75 азы бонмæ. Уымæй стырдæр бæрæгбон нæй. Уый куы нæ уыдаид, уæд махæн иннæ бæрæгбæттæ дæр нæ уаиккой. Тох цыди æппæт Советон Цæдисы хъысмæтыл. Æмæ уыцы стыр тохы Рубайтæ сæхи куыд равдыстой, уый тыххæй фыссын цыбырæй.
Фыдыбæстæйы Стыр хæст куы райдыдта, уæд Хъуды комæй фронтмæ ацыдысты æртæ æмæ ссæдзæй. Уыдонимæ уыдысты Рубайты Никъала, Габуси, Бабе, Петр, Фастъе, Гиги, Пъауле, Бало, Аврос, Хъырым, Мути, Миша, Федыр, Габруска, Муркæ, Готе, Будзыг, Гаппи, Бицца æмæ иннæтæ. Бирæтæ дзы сæ Райгуырæн бæстæйы сæрвæлтау фæмард сты. Рубайтæй хæстмæ кæй акодтой Душеты районæй, уыдонæй дæр бирæтæ нал сыздæхтысты. Душеты Рубайтæй хæсты кæрæй-кæронмæ фæци Вано.
Уæдæ Быдыры Къобы цы Рубайтæ царди, уыдонæй дæр хæстæй фæсте ничи баззад. Стыр лæгдзинад æмæ хъæбатырдзинад æвдыстой знаджы ныхмæ тохы. Уыдонæй дæр бирæтæ сæ цард радтой Райгуырæн бæстæйы сæрвæлтау. Быдыры Къобы сын уыди цыртдзæвæн, уым Рубайтæ фыст сты æхсæрдæсæй. Цæцæны змæстытæ куы райдыдтой, уæд ирон адæмы курдиатмæ гæсгæ хицауад уынаффæ рахаста, цæмæй йæ раласой æмæ йæ сæвæрой ам нæхи зæххыл. Цыртдзæвæн сластой æмæ йæ Уæлахизы бон — 9 Майы сæвæрдтой Намысы аллейы. Уый кадæн ам уыди стыр митинг.
Рубайтæй ма хæсты кæрæй-кæронмæ фæци елхотаг Дæхцыхъойы фырт Дзибудта. Райгуырд 1922 азы. Хæсты фæстæ бирæ азты фæци Советон Æфсады. Уыди Новосибирскы æмæ Красноярскы æфсæддон зылды командæгæнæджы хæдивæг. Хорзæхгонд æрцыд 4 орденæй æмæ бирæ майдантæй. Йæ цардæй ахицæн Красноярскы.
Стыр лæгдзинад æмæ хъæбатырдзинад равдыста зилгæйаг Рубайты Хъасболат дæр. Уый Беларусы, Бресты облæсты, се ‘фсæддон къордæн бахæринаг куы ницыуал уыд, уæд, хойраг чи ласта, уыцы немыцаджы размæ бабадт, амардта йæ, йæ дзаумæттæ йын скодта æмæ бричкæ æд хойраг сæ къордмæ стардта. Уый фæстæ та сæ байста, 1200 килæйы хор кæй гуыффæйы æвæрд уыди, ахæм трактор.
Зилгæйæ ма барвæндонæй хæстмæ ацыд Рубайты Аппола. Хъыгагæн, цыбыр рæстæгмæ æбæрæгæй фесæфт æмæ, йæ ингæн кæм ис, уый абон дæр ничи зоны. Йæ чызг Райкæ бирæ фæфыста алы рæттæм Украинæмæ г. Шахтинскмæ, фæстаг фыстæг уырдыгæй сæрвыста, фæлæ йын ницы хабар фехъусын кодтой.
Стыр хъару æмæ лæгдзинад равдыста зилгæйаг Рубайты Хъазыбег. Райгуырд 1905 азы. 1924 азы фæци Краснодары бæхджын æфсады скъола. Службæ кодта Фæскавказы. Хæст æй æрæййæфта г.Керчы, æмæ хæцгæ бахæццæ суанг Берлинмæ. Схызти булкъоны цинмæ. Хæсты фæци кæрæй-кæронмæ. Плиты Иссæйы æфсады фæстаг боны онг фæхæцыд Японы хæсты. Хорзæхгонд æрцыд æртæ Сырх Стъалыйы орденæй, Ленины орденæй æмæ фараст майданæй. Хæсты ма Плиты Иссæйы æфсады фæхæцыд зилгæйаг Рубайты Муратбег дæр.
Хъыгагæн, Рубайты хæстонтæй абон иу дæр æгас нал у. Бирæтæн дзы сæ хæсты фæндæгтæ æбæрæгæй баззадысты. Нæ сæ фæци сæ рæстæджы фæрсæг æмæ фыссæг. Фæлæ уæддæр нæ сæр бæрзонд хæссæм, æгайтма Рубайты фæсивæд равдыстой лæгдзинад æмæ бахастой се ‘ххуысы хай Уæлахизы бонмæ.
Цæгат Ирыстоны хæсты архайджытæй ма абон нæ астæу сты сæдæйæ гыццыл фылдæр. Уымæ гæсгæ хæссын фæндон, цæмæй йæ цардæй чи ахицæн вæййы, уыдон æвæрой стыр кадимæ. Стыр сгуыхтдзинад чи равдыста, уыдон та ныгæной Намысы аллейы.
РУБАЙТЫ Виктор,
фæллойы ветеран
