Цæгат Ирыстоны Æнæниздзинад хъахъхъæнынады министрады сбæлвырд кодтой программæтæ «Хъæууон дохтыр» æмæ «Хъæууон фелсыр»-мæ гæсгæ медицинон кусджыты уæгъд бынæтты номхыгъд.
Мæздæджы район нымад æрцыд куырдиæттæ æрбарвитджыты раздзогыл. Район дохтыртæн бавдыста 14 уæгъд бынаты. Зæгъæм, Мæздæджы районы центрон рынчындоны сывæллæтты поликлиникон хайад у педиатры, скъолатæ — дыууæ педиатры, сывæллæтты рæвдауæндон та — педиатр æмæ дерматовенерологы хъуаг. Мæздæджы центрон рынчындоны хъомыл адæмы поликлиникон хайады нæ фаг кæны дыууæ рентгенологы, ультразæлон диагностикæйы æртæ дохтыры æмæ онколог. Винограднæйы хъæуы æмæ Луковскæйы станицæйы амбулаторитæ сты хайады терапевты, сылгоймæгты консультаци та — акушер-гинеколог хъуаг. Уымæй уæлдай ма районы фелсырон-акушерон кусæндæтты ис разамонджыты уæгъд бынæттæ дæр.
Æнæниздзинад хъахъхъæнынады министрады минæвар куыд фехъусын кодта, афтæмæй Алагиры районы центрон рынчындоны хъæуы сывæллæтты дохтыр-офтальмолог æмæ терапевт, Хæтæлдоны та — фелсыр. Кировы районы Ставд-Дурты амбулаторийы ис хайады терапевты, Кæрдзыны та — фелсыры уæгъд бынæттæ. Рахизфарсы районы Ног Бæтæхъойыхъæуы æмæ Горæтгæрон районы Куырттаты хъæуы амбулаторитæ сты терапевт æмæ хайады терапевты хъуаг, Дыгуры районы рынчындон куыстмæ райсынмæ хъавы терапевты.
Фиппаинаг: нæ республикæйы программæ «Хъæууон дохтыр»-ы архайыны бар ис 21 специалистæн, программæ «Хъæууон фелсыр»-ы та — фондзæн. Программæты архайæг æппæт медиктæн бафиддзысты иурæстæгон фиддонтæ. Зæгъæм, дохтыр кæм кусдзæн, уыцы хъæу кæд зынвадатыл нымад у, уæд фиддоны бæрц уыдзæн 1,5 милуан сомы, фелсыртæн та бафиддзысты фæйнæ 750 мин сомы. Хъæу зынвадатыл нымад кæд нæу, уæд дохтыртæн бафидын æмбæлы фæйнæ милуан сомы, фелсыртæн та — фæйнæ 500 мины.
Нæ уацхæссæг
