Цӕгат Кавказы хӕххон-металлургон институты фӕсивӕдон театр «Пилигрим» Ростовы рамбылдта фестивал «Уӕрӕсейы студентон уалдзӕджы» гран-при.
Канд театрдзаутӕ нӕ, фӕлӕ жюрийы уӕнгтӕ дӕр комеди «Лисистратӕ»-йӕ скъуыддзаг равдисӕг Цӕгат Ирыстоны минӕвӕртты ӕвзыгъддзинадӕй разыйӕ баззадысты.
— Ацы аз фестивалы уӕлахиздзауы номыл ерысгӕнджытӕ равдыстой хорз цӕттӕдзинад. Фестивалы театралон номинацимӕ куырдиӕттӕ барвыстой бирӕ коллективтӕ. Раст зӕгъгӕйӕ, нӕ хъарутыл ӕууӕндыдыстӕм, катай нӕ кодтам. Призон бынат бацахсынмӕ хъавыдыстӕм, фӕлӕ гран-при рамбулын ӕнхъӕл нӕ уыдыстӕм. Фестивалы комедийӕ цы скъуыддзаг равдыстам, уый айразмӕ хаст уыд юмористон программӕ «По странам и континентам»-мӕ. Лӕгтӕ хӕстытӕн кӕрон цӕмӕй сӕвӕрой, ууыл сӕ бафтауынӕн комедийы сӕйраг архайӕг-сылгоймаг Лисистратӕ незаманты ӕбар сылгоймӕгтӕн хӕссы йӕхи ӕрхъуыдыгонд мадзалӕй спайда кӕныны фӕндон. Куыд рабӕрӕг, афтӕмӕй ӕппӕт сылгоймӕгтӕ дӕр йӕ фӕндоныл разы нӕ уыдысты, фӕлӕ ӕппынфӕстаг сылгоймӕгтӕ хъуыстгонд афинаг Лисистратӕйыл баууӕндыдысты. Цӕмӕй сӕ хъуыды ма аивой, уый тыххӕй сын Лисистратӕ ард бахӕрын кодта, — загъта «Пилигрим»-ы аивадон разамонӕг, режиссер Агънаты Виктория.
Уымӕй уӕлдай ма цӕгатирыстойнаг делегаци фестивалы бацахста 6 призон бынаты. Зӕгъӕм, Хӕххон паддзахадон аграрон университеты студент Дзускаты Таймураз фӕуӕлахиз адӕмон инструментты номинацийы. Адӕмон-сценикон кафты номинацийы Цӕгат Кавказы хӕххон-металлургон институты ӕмӕ Хӕххон паддзахадон аграрон университеты иугонд командӕ бацахста фыццаг бынат. Номинаци «Адӕмон кафт — чысыл хуызты» фӕуӕлахиз ансамбл «Цард»-ы дуэт. Цӕгат Кавказы хӕххон-металлургон институты зарӕггӕнджыты къорд «Хъуыбады» номинаци «Адӕмон зард»-ы, стӕй Годзойты Георги ӕмӕ Гасситы Зӕринӕ номинаци «Академион зард»-ы бацахстой дыккаг бынӕттӕ.
Адӕмон-сценикон кафты номинацийы Цӕгат Кавказы хӕххон-металлургон институты, Цӕгат Ирыстоны паддзахадон медицинон академийы, Цӕгат Ирыстоны паддзахадон университет ӕмӕ Хӕххон паддзахадон аграрон университеты иугонд командӕ, стӕй Нырыкъаты Аланӕ бацахстой ӕртыккаг бынӕттӕ.
Ацы аз бӕстӕйы 70 регионӕй фестивалы архайынмӕ ӕрбацӕуӕг дыууӕ мин адӕймагӕй дыууӕсӕдӕйӕ фылдӕр систы алыхуызон конкурсты призертӕ.
