Нӕ равзӕрст нысантӕм — ныфсджынӕй

0
258

Нӕ республикӕйы рӕзт, Хицауад ӕмӕ Парламенты куысты бӕрӕггӕнӕнтыл куы ныхас кӕнӕм, уӕд афтӕ зӕгъӕн ис, ӕмӕ нын цард ӕрвылбон нӕ размӕ  цы ахсджиаг хъуыддӕгтӕ ӕвӕры, уыдон ӕххӕст кӕнын къухы ӕфты, кӕд иуӕй-иу хатт къуырцдзӕвӕнӕй рахизын тынг зын вӕййы, уӕддӕр. Уӕлдайдӕр нырыккон эпидемиологон уавӕры, пандеми ӕнӕхъӕн дуне дӕр йӕ ахӕсты куы бакодта, уӕд. Уыцы тыхстдзинӕдты сӕрты республикӕ ныфсджынӕй цӕуы, йӕ Сӕргълӕууӕг Битарты Вячеслав нӕ размӕ цы хӕстӕ сӕвӕрдта, уыдоныл архайгӕйӕ.

Ӕрӕджы Цӕгат Ирыстоны кусӕг балцы уыд Уӕрӕсейы Федерацийы Хицауады Сӕрдары хӕдивӕг Юрий Трутнев. Уый бабӕрӕг кодта фидӕны хӕххон-рекреацион комплекс «Мамысон», ӕркастис хъӕууон хӕдзарады ахсджиаг хъуыддӕгтӕм, туризм, пайдайаг къахинӕгты ӕмӕ зындгонд суӕрттӕ — “Тиб-1”, “Тиб-2”-йы пайдайаг фарстытӕм. Нӕ республикӕйы разамынды ахадгӕ куыст, нӕ ӕхсӕнады иудзинад сӕхимӕ ӕлвасынц нӕ бӕстӕйы Хицауады. Уӕлдайдӕр нӕ регионы экономикон рӕзты гӕнӕнтӕ. Нӕ республикӕйы Сӕргълӕууӕг цыбыр рӕстӕгмӕ цы бирӕ ахсджиаг ӕмӕ лыггӕнинаг хъуыддӕгтӕ сарӕзта, уыдон ирдӕй зынынц Ирыстоны ӕхсӕнадон царды. Уырдӕм хаст цӕуынц медицинӕ, ахуырад ӕмӕ культурӕйы къабӕзты объекттӕ, спортивон комплекстӕ, рӕвдауӕндӕттӕ, тагъд сӕ арӕзт кӕронмӕ кӕмӕн ахӕццӕ уыдзӕн, ахӕм туристон комплексты объекттӕ дӕр.

Стыр ӕргом здахы Битары-фырт фӕсивӕдӕн куыст ссарыны фарстытӕм. Нӕ граждӕнты лӕмӕгъ социалон къабазы категоритӕн та арӕзт цӕуынц финансон, экономикон ӕмӕ техникон ӕххуысы программӕтӕ. Мах, Сӕргълӕууӕджы ӕхсӕнадон советы ӕххуысгӕнджыты ‘рдыгӕй цӕттӕгонд цӕуы ныридӕгӕн фӕсивӕдон ӕмӕ ӕхсӕнадон организацитимӕ куысты программӕ. Уырдӕм хаст цӕуынц, ӕппӕты вазыгджындӕр ӕмӕ ахсджиагдӕрыл нымад чи сты абон, уыцы хӕстӕ. Уӕлдай цӕстдард цӕуы хистӕр фӕлтӕрмӕ. Ацы тыхст пандемийы рӕстӕг федералон центр ӕмӕ нӕ республикӕйы разамынды хъӕппӕрисӕй фӕсивӕдон-ӕхсӕнадон организациты, Ирыстоны меценатты ӕххуысӕй хӕсты ӕмӕ фӕллойы ветерантӕн, бирӕсывӕллонджын ӕмӕ ӕвӕрӕз бинонтӕн уӕрст ӕрцыд 19000 социалон ӕххуысы пакеты. Дунейы ӕмӕ Уӕрӕсейы ног историйы нӕма уыд, абон цы хӕцгӕ низимӕ тохы бацыдыстӕм, ахӕм.

Ӕнӕзӕгъгӕ нӕй, ацы тӕссаг низы ахӕсты бахаугӕйӕ, нӕ республикӕйы разамынд ӕппӕт фадӕттӕ ӕмӕ гӕнӕнтӕй дӕр пайда кӕны, цӕмӕй коронавирус бынтон ма ахӕлиу уа, ууыл. Ӕз, куыд РЦИ-Аланийы Сӕргълӕууӕджы ӕхсӕнадон советы ӕххуысгӕнӕг, афтӕ курын Ирыстоны адӕмӕй, цӕмӕй къӕрцхъусдӕр уой низы райдайӕн миниуджытӕм, йӕ рӕзт фылдӕр ма кӕна, фӕлӕ къаддӕр, уыцы мадзӕлттӕ ӕххӕст кӕныны фарстытӕм. Хъахъхъӕнут хистӕрты ӕмӕ, йе ‘нӕниздзинад лӕмӕгъ кӕмӕн у, уыдоны. Нӕ иудзинады, не ‘нгомдзинады ӕмӕ ӕмзонды руаджы фӕтых уыдзыстӕм ӕппӕт зындзинӕдтыл дӕр. Нӕ республикӕйы граждӕнтӕй ахсджиаг фарстытӕ кӕмӕ ис, уыдон та нӕм дзурӕнт мӕнӕ ацы телефонӕй: 91-01-90

Хъантемыраты Олег, РЦИ-Аланийы Сӕргълӕууӕджы ӕхсӕнадон советы ӕххуысгӕнджыты сӕрдары хӕдивӕг

ОСТАВЬТЕ ОТВЕТ

Please enter your comment!
Please enter your name here