0
205

Ахсджиаг хæсмæ хъæуы цæттæ уæвын

Фыдыбæстæ хъахъхъæнын у алкæй ахсджиаг хæс дæр, фæлæ уымæ хъæуы хи цæттæ кæнын, ахуыр кæнын. Рахизфарсы районы æфсæддон комиссарады сидтонты цæттæ кæныны хайады хицау Гадзаонты Аркади нын куыд радзырдта, афтæмæй уыцы куыст фидæны фыдыбæстæ хъахъхъæнджытимæ у нывыл æвæрд.

«Æфсæддон хæс æмæ æфсæддон службæйы тыххæй» федералон закъонмæ гæсгæ 17 азы кæуыл сæххæст, уыдон 1 январæй 31 мартъимæ æвæрд цæуынц æфсæддон хыгъды. Æфсæддон комиссарады фæсивæды базонгæ кæнынц бæстæйы æфсæддон ахуыргæнæндæттимæ, цалынмæ сæ æфсадмæ цæуыны рæстæг æрцæуа, уæдмæ сæ алкæй дæр цалдæр хатты ацæуын хъæуы медицинон къамис. Æфсæддон хыгъды чи слæууа, уыдоны æфсæддон комиссарады бон у Æфсад, авиаци æмæ флотæн æххуысы Æппæтуæрæсеон æхсæнады Рахизфарсы районы хайады шофырты курсытæм ахуыр кæнынмæ арвитын. Хистæр кълæсты ахуырдзаутæй бирæтæ сфæнд кæнынц скъолайы ахуыры фæстæ æфсæддон ахуыргæнæндæттæм бацæуын æмæ уыдонæн бамбарын кæнынц цавæр гæххæттытæ сæ сæмбырд кæнын хъæуы иу кæнæ иннæ ахуыргæнæндонмæ бацæуынæн. Бæстæйы та Уæрæсейы Федерацийы Гæрзифтонг тыхты министрады æмæ Уæрæсейы Федерацийы æххæстгæнæг хицауады федералон оргæнты ахуыргæнæндæттæ 40 фылдæр сты. Æфсæддон дæсныйад райсыны тыххæй уыдонмæ ахуырмæ бацæуæн ис 16 азæй 22 азы онг, службæ чи фæцис, уыдонæн та 24 азы онг. Фæсивæдæн куыд æмбарын кæнынц, афтæмæй уыцы ахуыргæнæндæттæм бацæуæн ис æрмæст лæппутæн нæ, фæлæ чызджытæн дæр. Рахизфарсы сылгоймæгтæ Стыр Уæлахиз æрбахæстæг кæнынмæ цы стыр бавæрæн бахастой, уыдоны нæмттæ æнусмæ баззайдзысты историйы. Уыдон сты Фыдыбæстæйы Стыр хæсты рæстæг дыууæ хатты хъæбатыры номмæ кæй бавдыстой, уыцы иунæг кавказаг сылгоймаг Сæлбиты Верæ, фыццаг ирон сылгоймаг — тæхæг Дауыраты Илитæ, æфсæддон дохтыр Дзгойты Даухан æмæ бирæ æндæртæ.

Фарон Беслæнæй иу чызг сфæнд кодта æфсæддон уæлдæр ахуыргæнæндонмæ бацæуын, йæ гæххæттытæ куы сæмбырд кодта æмæ медицинон къамисы куы ацыд, уæд æй бахастой кандидатты номхыгъдмæ æмæ, кæй зæгъын æй хъæуы, паддзахадон фæлварæнты хорз бæрæггæнæнты фæстæ ныртæккæ ахуыр кæны Бетъырбухы С.М.Кировы номыл Æфсæддон-медицинон академийы. Ацы аз æфсæддон хыгъды чи слæууыд, уыдоны æхсæн ис, æфсæддон ахуыры фæндагыл ацæуын кæй фæнды, ахæмтæ. Нырма та уал фидæны æфсæддон студенттæ æмбырд кæнынц сæ гæххæттытæ, цæуынц медицинон къамис. Уыдонæй иу у Беслæны 8-æм скъолайы 11-æм къласы ахуырдзау Артур Михайлян. Уый рагæй цæттæ кæны йæхи æфсæддон ахуыргæнæндонмæ, алы ерысты уæлахиздзау, спорты мастертæм кандидаты къæпхæн райста тхэквондойæ, уæдæ ахуыр дæр хорз кæны. Йæ нысан у Уæрæсейы Федерацийы национ гвардийы æфсады Бетъырбухы Г.Жуковы орден хæссæг æфсæддон институтмæ бацæуын. Уæдæ ма мартъийы кæронмæ уый чи бафæзма, ахæмтæ иу æмæ дыууæ нæ разындзæн. Фыдыбæстæ хъахъхъæнын ахсджиаг хæс у, æмæ йæ цардвæндаг уыцы ‘рдæм чи сараза, уымæн ис æппæт гæнæнтæ дæр. Ахуыр та æнæхъæнæй дæр у паддзахады æххуысæй бюджеты бындурыл.


Касаты Батрадз

 

ОСТАВЬТЕ ОТВЕТ

Please enter your comment!
Please enter your name here