Хæстон центры кадджын ралæуд

Цæгат Кавказы фыццаг хæстон ахуырадон центр Фыдыбæстæ хъахъхъæнæджы боны кадæн хъуыддаг бацæттæ кодта. Хетæгкаты Къостайы номыл паддзахадон университеты скодтой курсантты кадджын ралæуд. Уыдон азарыдысты Уæрæсе æмæ Республикæ Цæгат Ирыстон-Аланийы гимнтæ.

Университеты президент Мæхæмæтты Ахуырбег куыд радзырдта, афтæмæй 1920-æм азты историон гæххæттытæм гæсгæ, Хæххон педагогон институты кодтой æрсидты размæ хæстон цæттæдзинады ахуыртæ. 1996 азмæ хæстон кафедрæ Гæрзифтонг тыхтæ æмæ барадхъахъхъæнæг оргæнтæн бацæттæ кодта запасы мингай афицерты.

Фыдыбæстæйы Стыр хæсты архайджыты цыртдзæвæныл дидинджытæ сæвæрыны архайдтой курсанттæ æмæ уазджытæ. ЦИПУ-йæ хæсты быдырмæ ацыдысты 600 адæймагæй фылдæр, ахуыргæнджытæ æмæ студенттæ. Сæдæйæ фылдæр тохы быдыры баззадысты. Центры разамонæг, булкъон Валерий Дробышев хуыздæр курсанттæн радта Арфæйы фыстæджытæ æмæ лæвæрттæ.

Бæрæгбоны кадæн университеты куыстой тематикон фæзтæ: хæстон техникæйы, хæцæнгæрзтæ æмæ хæстон уæлæдарæсы равдыстытæ. Ректор Огъуаты Алан куыд бацамыдта, афтæмæй центры фæзынд у хæстон-патриотон хъомылады уæлæмхасæн фæрæз, фæбæрæг регионы æрсидты хъомысыл.

Хæстон центр байгом 2019 азы, студенттæ дзы ахуыр кæнынц сержанттæ æмæ запасы æфсæддонты хæстон цæттæдзинады программæтыл. Рауагъдонтæн ратдзысты æмбæлгæ хæстон билеттæ, æфсадмæ сæм нал фæсиддзысты. Азмæ райсынц 108 адæймаджы.

Нæ уацхæссæг