Вакцинаци цæуы æнæкъуылымпыйæ

Куыд зонæм, афтæмæй нæ республикæйы дарддæр цæуы коронавирусы ныхмæ вакцинаци. Уыцы куыст куыд цæуы, вакцинаци чи скодта, уыдон сæхи куыд æнкъарынц, уыцы хъуыддæгтæ бæлвырд базоныны тыххæй республикæйы дзыллон хабархæссæг фæрæзты минæвæрттæ фембæлдысты РЦИ-Аланийы æнæниздзинад хъахъхъæнынады министр Годжыцаты Тамерланимæ.

Министр куыд загъта, афтæмæй нæ республикæ райста 13262 дозæйы дыууæфазон вакцинæ. Абоны онг Цæгат Ирыстоны вакцинаци скодтой 9947 адæймаджы. Уыдон сты, йæ фыццаг фазæ чи скодта æмæ медицинон регистры номхыгъды чи ис, уыдон. Фыццаг нæ республикæйы ацы ахсджиаг хъуыддаг зынтæй цыд, уымæн æмæ адæм нæ зыдтой, цавæр вакцинæ у, цавæр фæстиуджытæ расайдзæн, тарстысты. Фæлæ бузныг нæ медицинон кусджытæн æмæ дзыллон хабархæссæг фæрæзты минæвæрттæн, адæммæ раст информаци кæй хæццæ кæнынц, уый тыххæй.

Не ‘ппæтæн дæр бамбарын афон у, вакцинаци нæ иумæйаг пайдайæн кæй у, нæхи дæр æмæ нæ алыварс чи ис, уыдоны дæр хæцгæ низæй бахизыны ахсджиаг мадзал.

Хъыгагæн, интернеты алы фæрæзтæй цæуы зыгъуыммæ информаци. Уымæ гæсгæ адæм æнæууæнкдзинад æвдыстой ацы хъуыддагмæ. Фæстаг рæстæг адæм фылдæр информаци базыдтой, æмæ се ‘ргом раздæхтой уыцы хъуыддагмæ, зæрдиагæй цæуынц медицинон уагдæттæм. Мах нæ куыст аразæм бæлвырд æмæ æргомæй, сусæгдзинадæй нæм ницы ис. Нæ республикæйы цæрджытæй вакцинаци чи скодта, уыдон иууылдæр сæхи æнкъарынц хорз.

Вакцинацигæнæн кабинеттæ цы медицинон уагдæтты сты, уым кусынц дæсны æмæ сæрмагондæй цæттæгонд специалисттæ. Нæ программæ афтæ арæзт у, æмæ фыццагдæр хъуамæ дохтыр адæймаджы фена, сбара йын йæ буары тæвд, туджы æлхъывдад, сбæрæг кæна, исты низтæ йæм ис æви нæй. Æрмæст уый фæстæ ис скæнæн фыццаг вакцинаци.

Уый фæстæ алы адæймагæн дæр саразæм электронон боныг, уым æрвылбон сæхæдæг бæрæг кæнынц, сæхи куыд æнкъарынц, уый. Цæуы сæм дохтырты цæстдард. Цæмæй не ‘хсæн коллективон иммунитет фæзына, уый тыххæй хъуамæ вакцинаци скæной æппынкъаддæр цæрджыты 60 проценты.

Хъойбайты Галинæ