Регионыл разамынды центры архайд

РЦИ-Аланийы Сæргълæууæг Битарты Вячеславы бардзырдмæ гæсгæ 15 сентябры арæзт æрцыд «Регионыл разамынды центр».

Цæгат Кавказы федералон зылды Цæгат Ирыстон у, «Регионыл разамынды центр» фыццаг кæм фæзынд, ахæм регион. Цы нысан кæны æмæ цæмæн хъæуы ацы центр, уый бамбарын кæныны тыххæй «Регионыл разамынды центр»-ы сæргълæууæг Милдзыхты Сергей фембæлд республикæйы дзыллон хабархæссæг фæрæзты минæвæрттимæ. Уый загъта:

— «Регионыл разамынды центр» у иумæйаг проектон офис, регионы цæрджытæй алыхуызон информаци æмбырд æмæ анализ кæнынæн, цы хынцинаг фарстытæ æмæ сæм хъæстытæ ис, уыдонæн дзуаппытæ дæттынæн. Уымæй уæлдай нæй, уыцы фарстытæ кæцæй цæуынц — официалон порталтæй, социалон хызтæй, мессенджертæй, телефонтæй æви æндæр техникон фæрæзтæй. Йæ пайда ис уый мидæг, æмæ, республикæйы паддзахадон лæггæдты иумæйаг порталы регистрацигонд чи у, уыцы цæрджытæн сæ бон у мобилон æфтуаны фæрцы цавæрфæнды хицауады оргæнтæм, бынæттон хиуынаффæйадмæ, организацитæм барвитын сæ хъæстытæ, кæнæ куырдиæттæ. УФ-йы Президент Владимир Путины уынаффæмæ гæсгæ, ахæм центртæ хъуамæ арæзт æрцæуой алы регионы дæр, — загъта центры разамонæг æмæ ма йæ ныхасыл бафтыдта:

— Центры хæс у, республикæйы цæрджытæм цы фарстытæ фæзыны, уыдонæн ведомствæтæ æмæ хицауады уæнгты ‘хсæн иууыл стырдæр æгъдауæй рæвдз æмæ афойнадыл дзуаппытæ раттын.

ХЪОЙБАЙТЫ Галинæ

Къам систа

ХЪАЙЫРТЫ Дианæ