«Библиотекæты чингуыты фондтæ хъуамæ фылдæр кæнæм, уый у тынг ахсджиаг хъуыддаг. Фæлæ мæ фæнды, цæмæй цæрджытæ информатизацийы фæрæзтæй пайда кæной библиотекæты. Уымæ гæсгæ, культурæйы министры æргом здахын ацы хæстæм», — знон Хицауады Сæрдар Тускъаты Таймураз фæбæрæг кодта хæстæгдæр фидæнмæ нысантæ.

Æмбырдмæ цы фарстытæ рахастой, уыдон баст сты республикæйы социалон-экономикон рæзтимæ. Фæллой æмæ социалон рæзты министр Хуыбиаты Барис рæгъмæ рахаста, паддзахадон кусæн æмæ граждайнаг службæйы бынæттæ чи ахста, уыдонæн цавæрдæр социалон зæрдæдарæнтæ фидыны тыххæй проект-уынаффæ. Уымæй дарддæр — социалон бадзырды бындурыл паддзахадон социалон æххуыс фидыны тыххæй проект-уынаффæ. Социалон æххуысы бæрц сбæрæг кæныны тыххæй сфидар кодтой кусæг къорд, уырдæм бахастой министрадты, Парламенты, бынæттон хиуынаффæйады минæвæртты.

Скъолайы агъоммæ кусæндæттæ цæмæй адæммæ хæстæгдæр уой, уый тыххæй хъуамæ регионалон информацион хызæг конд æрцæуа. Пайда дзы кæндзысты, сæ сывæллæтты рæвдауæндæттæм чи дæтдзæн, уыцы ныййарджытæ. Уый тыххæй радзырдта ахуырад æмæ наукæйы министр Людмилæ Башарина. Тускъаты Таймуразы ныхасмæ гæсгæ, республикæ паддзахадон программæтæ æмæ национ проектты кæй архайы, уый фæрцы рæвдауæндæтты бынæттæ фæзынд рады лæууæг сывæллæттæн. Информацион хызæгæй сæ куы сфæлгонц кæной, уæд ныййарджытæн фенцондæр уыдзæн.

Евгений Вахтанговы номыл Уырыссаг паддзахадон академион театрыл 150 азы кæй сæххæст уыдзæн, уый тыххæй хъуамæ фидаргонд æрцæуа бакæнинаг хъуыддæгты пълан. Уый тыххæй радзырдта культурæйы министр Къубалты Эльбрус. Финансты министры фыццаг хæдивæг Оксанæ Карова куыд фехъусын кодта, афтæмæй ацы аз республикæ цы хæстæ дары, уыдон бафидынæн хъуамæ спайда кæной æфстæутты фæрæзтæй. Министрад хъуамæ райса 1 миллиард æмæ 240 милуан сомы азæн 1 проценты ныхмæ.

Уымæй дарддæр ма министры хæдивæг фæбæрæг кодта Горæтгæрон районы муниципалон сконды куырдиат. Уыдон спортивон кусæндæттæн спортивон ифтонггæрзтæ балхæныны тыххæй курынц 200 мин сомы. Алагиры районы муниципалон сконд та Центрон библиотекæйы фондæн аивадон чингуытæ балхæнынæн куры 150 мин сомы. Æхца ратдзысты РЦИ-Аланийы Сæргълæууæджы æмæ Хицауады фæстауæрцы фондæй.

Паддзахадон исбонад æмæ зæххы ахастдзинæдты министр Тедеты Руслан фæбæрæг кодта паддзахадон исбонæн йæ хицæутты фæивыны фарстытæ. Равзæрстой ма æндæр ахсджиаг хъуыддæгтæ.

Бутаты Эльзæ