«Хъуамæ рæза республикæйы æнæниздзинады хъахъхъæнынад»

Æнæниздзинад хъахъхъæнынады рæзты тыххæй координацион советы фыццаг æмбырд скодта РЦИ-Аланийы Сæргълæууæг Битарты Вячеслав.

Советы уæнгтæ сты æнæниздзинад хъахъхъæнынады министр Годжыцаты Тамерлан, кардиолог Туаты Ирмæ, анестезиолог-реаниматолог Быценты Роланд, пульмонолог Болиаты Лаурæ, æндæр специалисттæ, медицинон кусæндæтты сæйраг дохтыртæ. Конд æрцыд республикæйы Сæргълæууæджы хъæппæрисæй.

Нæ республикæ ныр азы бæрц тох кæны ног хæцгæнизимæ. Пандеми рабæрæг кодта æнæниздзинад хъахъхъæнынады лæмæгъдæр фæзилæнтæ æппæт дунейы дæр. Нæ республикæ дæр ис уыцы хыгъды. Æмбырды архайджытæ æрдзырдтой сæйрагдæр тыхстдзинæдтыл, фæбæрæг кодтой 2021-2023 азмæ республикæйы æнæниздзинад хъахъхъæнынады рæзты стратегийы нысантæ.

Битарты Вячеслав куыд загъта, афтæмæй Цæгат Ирыстоны æнæниздзинады хъахъхъæнынад домы ивддзинæдтæ, хъæуы йæ рацаразын. «Хъуамæ сбæлвырд кæнæм медицинæйы нырыккон уавæр. Цæттæ стæм хуыздæр ифтоггæрзтæ æлхæнынмæ, дохтырты куыстæн æнцонархайд уавæртæ скæнынмæ. Фæлæ нæ хъæуы хорз цæттæгонд специалисттæ, хъуамæ сæ скъолайæ фæстæмæ цæттæ кæнæм. Уый тыххæй аразæм химион-биологон кълæстæ», — фæбæрæг кодта Битары-фырт.

Цæгат Ирыстон уыцы фарстытыл кусы, архайы национ проект «Æнæниздзинад хъахъхъæнын»-ы. Аразæм ног объекттæ, цалцæг сæ кæнæм. Медиктæ алыхуызон конкурсты, программæты архайынц. Республикæйы Сæргълæууæджы хъæппæрисæй фæзынд «РЦИ-Аланийы хуыздæр дохтыр» сбæлвырд кæныны конкурс, нæ специалисттæ стажировкæ кæнынц бæстæйы хуыздæр клиникæты.

Фæлæ Битарты Вячеславы ныхасмæ гæсгæ, хъуамæ æнæниздзинад хъахъхъæнынады фыццаградон къæпхæн фæхъомысджындæр кæнæм. Терапевтон службæмæ фылдæр æргом хъæуы аздахын, специалисттæ хъуамæ ахуыр кæной, сæ зонындзинæдтæ фылдæр кæной. Сывæллæтты республикон клиникон рынчындоны сæйраг дохтыр Икъаты Мураты хъуыдымæ гæсгæ, дохтырты ахуыр кæнын хъæуы бынæтты. Раззагдæр специалистты ардæм хъæуы хонын, æмæ ам, бынæтты, нæ дохтырты ахуыр кæндзысты. Уролог Саламаты Анатоли куыд бамбарын кодта, афтæмæй медицинон лæггæдты хæрзхъæддзинадмæ цæст фæдарын у ахсджиаг. Уый фæрцы медицинæйы уавæр зынгæ фæхуыздæр уыдзæн.

Республикæйы Сæргълæууæг æргом аздæхта медицинон кусджытæн æххуысы программæмæ, хъуамæ кусой фадатджын уавæрты, исой аккаг мызд. Хæстæгдæр æртæ азæн программæ саразыны хæс Битарты Вячеслав сæвæрдта Æнæниздзинад хъахъхъæнынады министрад æмæ специалисттыл. Царды уагъд цæудзæн РЦИ-Аланийы Рæзты агентады фæрцы. Æнæниздзинад хъахъхъæнынады рæзты тыххæй скæндзысты хицæн кусæг къордтæ.

Ныр уал куыст цæуы реанимацион службæйы рæзтыл. Республикон клиникон рынчындоны бындурыл фæзындзæн ног реанимацион хайад, æппæт бæрзонд домæнтæ æмæ стандарттимæ. Специалистты ахуыр кæнынц.

РЦИ-Аланийы

Сæргълæууæджы

æмæ Хицауады

пресс-службæ