Ног спортивон комплекс
Æрыдоны районы администрацийы сæргълæууæджы хæдивæг, архитектурæйы хайады хицау Хæмæтаты Алыксандры ныхасмæ гæсгæ, ныртæккæ Æрыдоны кæй аразынц, уыцы спортивон комплексы аразæн уыдзæн æппæт къæпхæнты ерыстæ.
— Бирæкъабазджын хъазæн зал ифтонггонд уыдзæн ахъаззаджы паркетон уæлцъарæй. Ахæмæн нæ республикæйы æмбал нæй. Уый спорты хъазæн хуызтæн се ‘ппæтæй бæзгæдæр у, — загъта Хæмæты-фырт.
Æппæт æмбæлгæ инфраструктурæимæ фондз спортивон залы кæм æрбынæттон уыдзысты æмæ 5 мин квадратон метры цы иумæйаг фæзуат уыдзæн, уыцы спорткомплекс аразын райдыдтой фарон федералон программæ «Спорт — царды нормæ»-мæ гæсгæ. Йæ къултæ сцæттæ сты, объекты сæры арæзтад дæр кæронмæ фæхæццæ кæны. Аразджытæ спорткомплексы æххæст кæнынц мидæггаг аивгæнæн куыстытæ, æвæрынц дзы вентиляци, уадзынц æм дон æмæ электрон тых.
— Ахæм æвæджиауы спортивон комплекс нæ районы никуы уыд. Куысты стыр уæз кæуыл æнцайы, ацы объектмæ уыцы спортивон скъолаты кусджыты раивынмæ хъавæм. Амæй размæ адæмæн иуæй-иу спортивон секциты (зæгъæм, уæззау атлетикæйы) архайыны фадат æппындæр нæ уыд. Ног комплексы фæрцы æппæт хъæндзинæдтæ аиуварс кæнынмæ хъавæм, — загъта Хæмæтаты Алыксандр.
Иннæ аз чи скусдзæн æмæ фондз азæй уæлæмæ сывæллæттæн тренировкæтæ кæныны фадат кæм уыдзæн, уыцы спортивон комплексы аргъ рауайдзæн 229 милуан сомы.
Нæ уацхæссæг