Ивгъуыд майрæмбоны Æрыдоны районы Рассветы кадджын уавæры байгом ног фелсырон-акушерон пункт.
Районы администрацийы минæвар журналисттæн куыд радзырдта, афтæмæй ног медицинон кусæндон дзуапп дæтты æппæт нырыккон техникон æмæ санитарон домæнтæн дæр. «Агъуыст ныридæгæн ифтонг æрцыд медицинон æмæ æндæр хъæугæ кусæнгæрзтæй. Уый фæрцы пункты специалисттæн уыдзæн адæмæн æппæтвæрсыг фыццаградон медикон-санитарон æххуыс бакæныны фадат», — загъта районы администрацийы минæвар.
Уыцы бон Рассветмæ чи саккаг кодта, уыцы адæмæн фадат уыд медицинон кусæндоны фæзуæттæ фенынæн. Ис дзы фелсыры кабинет, процедурæтæгæнæн уат, хæдзарадон хай æмæ æндæр кусæнуæттæ.
Уыцы цауы фæдыл кадджын æмбырды архайдтой Цæгат Ирыстоны Хицауады Сæрдар Тускъаты Таймураз, республикæйы æнæниздзинад хъахъхъæнынады министр Годжыцаты Тамерлан, Æрыдоны районы сæргълæууæг Тотраты Владислав, Æрыдоны районы центрон рынчындоны сæйраг дохтыр Моргуаты Аслæнбег æмæ иннæ бæрнон кусджытæ.
Нæ уацхæссæг