Медиафестивалы архайдзысты

0
181

Дзæуджыхъæуы абон йæ куыст кæндзæн сывæллæтты медиафестивал «Медиакласс».

Мадзал арæзт цæуы РЦИ-Аланийы Ахуырад æмæ наукæйы министрад, Курдиатджын сывæллæттимæ куысты регионалон центр, сывæллæтты технопарк «Кванториум-15», гимназ «Диалог» æмæ сывæллæтты нымæцон ахуырады центр «IT-куб»-ы æххуысæй.

Архайдзысты дзы, национ проект «Ахуырад»-ы фæлгæты скъолатæ æмæ, уæлæмхасæн ахуырады центрты бындурыл чи кусы, уыцы сфæлдыстадон иугæндты хъомылгæнинæгтæ.

Медиафестивалы архайджытæн специалисттæ араздзысты мастер-класстæ нырыккон медиа-технологиты бындурыл. Ацы æмæ æндæр ахуырты рæстæг скъоладзаутæн амондзысты нырыккон медиа-технологиты сусæгдзинæдтæ, ахуыр сæ кæндзысты ног техникон фæрæзтæй раст пайда кæныныл.

Медиафестивалы организацион комитеты уæнг, технопарк «Кванториум-15»-ы директоры хæдивæг Светланæ Макаренко журналисттæн куыд радзырдта, афтæмæй фестивалы фæсаууонмæ фембæлдтыты архайдзысты 120 скъоладзауæй фылдæр.

«Медиафестивалы пленарон æмбырды та архайдзысты 80 скъоладзауы бæрц. Фестивалы архайджытæн рагагъоммæ хæсгонд уыд сæ горæттæ æмæ районты архитектурæйы тыххæй видеороликтæ сисын, сæ алыварс цæрæг зындгонд адæймæгты фæлгонцтæ цыбыр кинонывты фæрцы равдисын. Ныр сывæллæтты куыстытæн аргъ кæндзæн фестивалон жюри. Йæ уæнгтæ сты медиа-къабазы кусæг зындгонд эксперттæ, стæй республикæйы дзыллон хабархæссæг фæрæзты минæвæрттæ. Уыдоны ‘хсæн: портал «Ossetia News»-ы редактор Мазаты Тимур, телерадиокомпани «Алани»-йы уацхæссæг Елойты Оксанæ, телеканал «Осетия-Ирыстон»-ы режиссер Кочиты Мæдинæ æмæ иннæтæ», — радзырдта Светланæ Макаренко.

Конкурсантты дæсныдзинадæн аргъгонд цæудзæн æртæ номинацийы: хуыздæр сценари, хуыздæр оператор æмæ хуыздæр монтажгæнæг. Уымæй уæлдай, жюри сæрмагонд призтæй схорзæхджын кæндзæн, куыд æнтыстджындæр командæты, афтæ фестивалы хицæн архайджыты дæр.


ХЪОЙБАЙТЫ Галинæ

 

ОСТАВЬТЕ ОТВЕТ

Please enter your comment!
Please enter your name here