Цæгат Ирыстоны Сæргълæууæг Битарты Вячеславæн кусæг фембæлд уыд Посты бастдзинады республикон управленийы директор Калоты Олегимæ.
Ныхасы рæстæг æргом здæхт æрцыд управленийы архайд фæхъомысджындæр кæныны, посты бастдзинады хайæдты куыстмæ фылдæр нырыккон техникон ногдзинæдтæ хæссыны, стæй æндæр фарстатыл.
Фембæлды райдайæны Битарты Вячеслав управленийы коллективæн бузныг загъта, коронавирусы пандемийы уавæрты архайгæйæ дæр сæ куыст æнæкъуылымпыйæ кæй æххæст кодтой, уый тыххæй. «Карз эпидемиологон уавæры дæр посты бастдзинады кусджытæ адæммæ афойнадыл хæццæ кодтой пенситæ æмæ иннæ социалон фиддонтæ, мыхуыры фæрæзтæ æмæ æндæр æрвыстæгтæ. Куыд уынæм, афтæмæй фæстаг рæстæг посты бастдзинады хайæдтæ ифтонггонд цæуынц нырыккон техникæйæ, рæзы лæггæдты нымæц… Æмæ уыцы куыст адарддæр кæнын хъæуы. Уыимæ, сæрмагонд цæстдарды аккаг сты, дæрддзæф хъæуты чи кусы, посты бастдзинады уыцы хайæдты уавæртæ», — фæнысан кодта Цæгат Ирыстоны Сæргълæууæг.
Калоты Олег йæ раныхасы бæстон æрлæууыд 2020 азы куысты бæрæггæнæнтыл. Йæ хъуыдымæ гæсгæ, пъланы бæрæггæнæнтæ сæххæст кæнынæй уæлдай, управленийы специалисттæ сæрмагонд æргом аздæхтой посты бастдзинады лæггæдтæ нырыккон электронон хуызмæ дарддæр ивыны хъуыддагмæ дæр. «Кæй зæгъын æй хъæуы, коронавирусы пандеми не ‘ппæты царды дæр бирæ зындзинæдтæ сæвзæрын кодта, фæлæ уæддæр нæ размæвæрд хæстыл бæрнонæй бакуыстам — ивгъуыд азы æфтиæгты пълан сæххæст кодтам 100,5 процентæй», — фæнысан кодта Калойы-фырт.
Управленийы разамонæг сæрмагонд æргом аздæхта посты бастдзинады хайæдты техникон нывылады фарстамæ. Йæ ныхасмæ гæсгæ, фæстаг дыууæ азы дæргъы сцалцæг кодтой посты бастдзинады 9 хайады. Уыимæ, сæрмагонд домæнты бындурыл рацарæзтам посты бастдзинады 11 хайады — ныр уыдонмæ æнæкъуыхцыйæ бацæуæн ис рынчын адæмæн дæр. Ахæм куыстытæ уал ныридæгæн бакодтой Мæздæджы, Горæтгæрон æмæ Рахизфарсы районты, Дзæуджыхъæуы. Дарддæр та сæ, кæй зæгъын æй хъæуы, кæндзысты иннæ районты дæр.
Управленийы разамонæг куыд фехъусын кодта, афтæмæй тагъд рæстæджы Весенняяйы уынджы байгом уыдзæн посты бастдзинады ног хайад. Уыцы микрорайоны цæрджытæ рагæй æвæрынц фарста, цæмæй дзы байгом уа посты бастдзинады уæлæмхасæн хайад. Уый фæрцы зынгæ фæрогдæр уыдзæн бынæттон адæмы цард.
Ныхасы архайджытæ се ‘ргом аздæхтой æндæр фарстатæм дæр.
РЦИ-Аланийы
Сæргълæууæджы æмæ Хицауады
пресс-службæ
