Ирайнаг ног аз

0
209

Цæгат Ирыстоны паддзахадон университеты Ирайнаг культурæйы центры сбæрæг кодтой Новрузы бон (ныхас цæуы Ирайнаг æмæ тюркаг адæмтæм хуры астрономон къæлиндармæ гæсгæ ног азы бæрæгбоныл).


— Уалдзæг кæй райдыдта, æмæ æрдз кæй райхъал, фæрныгады æвдисæныл нымад бæрæгбон ууыл дзурæг у. Незаманты сæвзæрæг ацы бæрæгбон бирæ адæмтæм нымад у культурон æмæ удварнон бынты æнæуаргæ хайыл, — зæгъы амынд центры директор Сохиты Мæдинæ.

Студенттæ æмæ ахуыргæнджытæн Новрузы сæвзæрды тыххæй хабæрттæ радзырдтой, стæй сæ, ацы бон кæм бæрæг кæнынц, уыцы бæстæты национ хойрагæй суазæг кодтой.

Стажировкæ цæгатирыстойнаг университеты чи ацыд, Ираны уыцы минæвæрттæ — Алламе Табатабаийы номыл университеты персайнаг æвзаг æмæ литературæйы ахуыргæнæг Лейлæ Атефепур æмæ Тегерайнаг университеты магистранткæ Фаэзе Хусейни — Цæгат Ирыстоны паддзахадон университеты историон факультеты ахуыргæнджытæ æмæ студенттимæ онлайн уагæй ныхас кодтой.

— Цæгатирыстойнаг университеты Ирайнаг культурæйы центр алы хатт дæр саразы мидисджын, зонындзинæдтæ фылдæр кæнынæн ахъазгæнæг дзыллон мадзæлттæ. Абон дæр ногæй базыдтам равг æхцон кæнынæн ахъазгæнæг бирæ ног хабæрттæ, — загътой ирайнæгтæ.

Цæгат Ирыстоны паддзахадон университетæн ис ахуырадон бастдзинæдтæ Пысылмон Республикæ Иранимæ. Цæгатирыстойнаг уæлдæр ахуыргæнæндон æмгуыст кæны Алламе Табатабаийы номыл æмæ Тегерайнаг университеттимæ. Æндæраз Уæрæсейы кусæг ирайнаг минæвар персайнаг æвзаг иртасыны хъуыддаджы æнтыстджын куысты тыххæй цæгатирыстойнаг университетæн радта хæрзиуæг.


Цæрикъаты Оксанæ

 

ОСТАВЬТЕ ОТВЕТ

Please enter your comment!
Please enter your name here