Ахуырады къабазы райрæзт — национ проекты фæрцы

0
264

Цæгат Ирыстоны Хицауады Сæрдар Тускъаты Таймуразæн кусæг фембæлд уыд республикæйы ахуырад æмæ наукæйы министр Людмилæ БашаринаимÆ. Фембæлды архайджытæ æрдзырдтой, национ проект æмæ сæрмагонд республикон программæты фæрцы ахуырады къабазы цы ивддзинæдтæ цæуы, уыдоныл.

Министр бæстон радзырдта, фыццаградон национ проект «Ахуырад»-ы фæлгæты республикæйы цы мадзæлттæ арæзт цæуы, иумæйагахуырадон кусæндæтты материалон æмæ техникон ифтонгдзинад куыд нывылдæр кæны, сывæллæтты технопарк «Кванториум» æмæ æндæр ахæм ахуырадон центрты куысты тыххæй.

Людмилæ Башарина сæрмагонд æргом аздæхта, математикон æмæ химион-биологон ахуырады райрæзты республикон программæтæ куыд æххæстгонд цæуынц, уымæ дæр. Афтæ, йæ ныхасмæ гæсгæ, сæрмагонд программæйы фæлгæты математикон лицейы бындурыл ныридæгæн байгом кодтой æртæ профилон къласы, иннæ ахуырадон кусæндæтты та рапарахат математикон къордты архайд. Арæзт цæуы æндæр мадзæлттæ дæр, цæмæй математикæйы предметы кад бæрзонддæр кæна. Уыимæ, математикæмæ цымыдисдзинад чи æвдисы, уыцы скъоладзаутимæ куыстмæ се ‘ргом раздæхтой ЦИПУ-йы физикон-техникон, матматикон æмæ компьютерон техникæйы факультетты специалисттæ æмæ студенттæ дæр.

Дзæуджыхъæуы 27-æм æмæ цалдæр районы скъолаты та ныридæгæн фæзындысты хими æмæ биологийы профилон кълæстæ. Уыцы кълæсты абонмæ ахуыр кæны 270 лæппу æмæ чызгæй фылдæр.

Фембæлды архайджытæ лæмбынæг æркастысты, се ‘нæниздзинад цауд кæмæн у, уыцы сывæллæттæн ахуырадон кусæндæтты цы уавæртæ арæзт цæуы, уымæ дæр. Министры ныхасмæ гæсгæ, республикæйы скъолатæм ахуырмæ цæуынц 2122 ахæм сывæллоны (уыдонæн се ‘мбисæй фылдæр сты сахъат). Ахæм сывæллæтты уавæрмæ ис уæлдай бæстон цæстдард. Зæгъæм, 4 ахуырадон кусæндоны уыцы сывæллæтты ахуыр кæнынц сæрмагонд программæтæм гæсгæ. Сывæллæтты иу хаимæ ахуыргæнджытæ кусынц, сæ хæдзæрттæм сæм бацæугæйæ, 28 скъоладзауæн та ахуырад аразынц дæрддзæгмæ технологиты фæрцы…

Ныхасы рæстæг æргом аздæхтæуыд æххуысхъуаг сывæллæтты реабилитацийы, интернаттæ æмæ æндæр ахæм сæрмагонд кусæндæтты архайды, Иумæйаг паддзахадон фæлварæнмæ цæттæдзинады æмæ æндæр ахсджиаг фарстытæм.


РЦИ-Аланийы
Сæргълæууæджы æмæ Хицауады
пресс-службæ

 

ОСТАВЬТЕ ОТВЕТ

Please enter your comment!
Please enter your name here