РЦИ-Аланийы Сæргълæууæджы хæстæ рæстæгмæ æххæстгæнæг Сергей Меняйло дзы сæрдариуæг кодта, афтæмæй уыд Коронавирусы инфекци парахатдæр кæнынæн гæрæнтæ æвæрыны фарстаты фæдыл регионалон оперативон штабы радон æмбырд.
Сæвзæргæ эпидемиологон уавæры, стæй уæлæмхасæн санитарон æмæ æндæр цæстдарæн мадзæлтты тыххæй уыд йæ раныхас «Роспотребнадзор»-ы республикон управленийы разамонæг Тыбылты Аланæн. Управленийы разамонæджы ныхасмæ гæсгæ, коронавирусæй рынчынты нымæц фæстаг бонты зынгæ фæфылдæр.
— Уый размæ къуыриимæ абаргæйæ, рынчынты нымæцыл бафтыд 72,6 проценты. Уыимæ, цæстдарæн мадзæлттæ куыд æвдисынц, афтæмæй адæм уæлæнгай цæстæй акастысты санитарон-гигиенон æдасдзинады домæнтæ æххæст кæныны хъуыддагмæ: дзыллон бынæтты маскæтæ нæ дарынц, социалон хииппæрддзинады фæтк халынц… Специалисттæ куыд зæгъынц, афтæмæй фæстаг рæстæг нæ республикæйы зилдух кæнын райдыдта коронавируфсы индиаг штамм. Профилон ведомствæтæ иумæйаг хъарутæй æрвылбон дæр аразынц сæрмагонд рейдтæ. Зæгъæм, æрмæст фæстаг цалдæр боны дæргъы рейдон къордтæ сбæрæг кодтой 215 алыхуызон организаци æмæ кусæндоны архайд. Уыдонæй 119 организацийы рабæрæг сты санитарон-эпидемиологон æдасдзинады домæнтæ халыны цаутæ. Сæрмагонд æргом здæхт цæуы транспортон фæрæзтæм дæр. Афтæ, рейды архайджытæ баурæдтой 376 маршрутон такси æмæ автобусы. Уыдонæй 79 хæдтулгæйы чи бадт, уыцы адæмæй иуыл дæр маскæ нæ уыд, — загъта Тыбылы-фырт.
Управленийы разамонæджы докладæн хатдзæгтæ кæнгæйæ, Сергей Меняйло профилон ведомствæты бæрнон кусджытæн бахæс кодта, цæмæй санитарон-эпидемиологон цæстдарды мадзæлттæ зынгæ фæкарздæр кæной. Уый фæрцы, йæ ныхасмæ гæсгæ, карз низæфтауæг парахатдæр кæнынæн ахадгæдæр гæрæнтæ æвæрд цæудзæн.
— Санитарон æдасдзинады домæнтæ гуымиры хуызы чи халы, уыдоны райдайын хъæуы карздæр æфхæрын. Куыд уынæм, афтæмæй эпидемиологон уавæр æвзæрæрдæм ивы. Æмæ ныртæккæ низы ныхмæ æппæт хъарутæй куы нæ фæлæууæм æмæ уæлæмхасæн мадзæлттæй куы нæ сархайæм, уæд фæстæдæр низæн аккаг ныхкъуырд радтын зындæр уыдзæн, — фæнысан кодта республикæйы разамонæг.
РЦИ-Аланийы Сæргълæууæджы æмæ Хицауады Администрацийы разамонæг Гобеты Ибрагим фаутæ æрхаста, профилон ведомствæтæ рейдон мадзæлттæ куыд аразынц, уымæ. Йæ ныхасмæ гæсгæ, цæстдарæг ведомствæтæ уыцы архайд хъуамæ зынгæ фæхъомысджындæр кæной.
Республикæйы медицинон кусæндæттæ ныртæккæ цавæр фæткмæ гæсгæ кусынц, уый тыххæй уыд йæ раныхас æнæниздзинад хъахъхъæнынады министры хæстæ рæстæгмæ æххæстгæнæг Тебиаты Сосланæн. Министр куыд фæбæрæг кодта, афтæмæй коронавирусæй рынчынтæн цы медицинон кусæндæттæ снысан кодтой, уыдоны ныртæккæ дохтырты бæрны сты 500 адæймаджы. Уыцы госпитæлты ма ис 180 уæгъд бынаты. Тебийы-фырты ныхасмæ гæсгæ, медицинон кусæндæттæм ног рынчынтæ райсын æмæ, чи фæдзæбæх, уыдоны амбулаторон цæстдардмæ раивыны куыст æнæкъуыхцыйæ арæзт цæуы.
Министр куыд фæбæрæг кодта, афтæмæй пъланы бындурыл æххæстгонд цæуы дзыллон вакцинаци дæр — абоны онг уколтæ скодтой 76 мин адæймагæй фылдæрæн.
Сæвзæргæ уавæры тыххæй сæ хъуыдытæ загътой æмæ бæлвырд фæндæттæ бахастой иннæ профилон министрадтæ æмæ ведомствæты бæрнон ткусджытæ дæр.
Кæронбæттæны Сергей Меняйло бæлвырд амынддзинæдтæ радта штабы уæнгтæн.
РЦИ-Аланийы
Сæргълæууæджы æмæ
Хицауады пресс-службæ
