Пандемийы рæстæг «ковид»-госпитæлты чи куыста, республикон медицинон колледжы уыцы студенттæн фадæттæ сараздзысты, цæмæй сæ ахуыр адарддæр кæной Цæгат Ирыстоны паддзахадон медицинон академийы.
Ууыл ныхас цыд, РЦИ-Аланийы Сæргълæууæджы хæстæ рæстæгмæ æххæстгæнæг Сергей Меняйлойæн колледжы студенттимæ цы фембæлд уыд, уым. Сергей Меняйло профилон ведомствæты разамонджытæн бахæс кодта, цæмæй уыцы фарстайы фæдыл сæрмагонд бадзырд бафыссой РЦИ-Аланийы Хицауад æмæ медицинон академи.
Республикæйы разамонæджы ныхасмæ гæсгæ, коронавирусæй рынчынты дзæбæх кæныны хъуыддаджы зæрдиагæй чи архайдта, уыцы ахуырдзау фæсивæдæн хъуамæ уа медицинон академийы студент суæвыны фыццаградон фадат.
— «Ковид»-госпитæлтæм кусынмæ ацæугæйæ, медицинон колледжы студенттæ равдыстой æцæг зæрдæргъæвддзинад сæ фидæны дæсныйадыл, уымæн æмæ ахæм уавæрты алкæцы дохтыр дæр не сразы уыцы бынæтты бакусыныл. Ацы фæсивæд, æнæмæнг, сты нæ медицинæйы фидæн. Цыбырдæр æмгъуыдмæ æппæт хъæугæ гæххæттытæ дæр хъуамæ уой цæттæ, цæмæй колледжы студенттæн медицинон академийы радих кæной нысанмæарæзт бынæттæ, — загъта Сергей Меняйло.
Студенттæ республикæйы Сæргълæууæгæн ахæм удæнцойдзинады тыххæй бузныг загътой æмæ зæрдæ бавæрдтой, сæ дарддæры ахуыры дæр фæзминаг кæй уыдзысты, уымæй.
Зындгонд куыд у, афтæмæй медицинон колледжы студентты къорд пандемийы рæстæг куыста, коронавирусæй рынчынты кæм дзæбæх кодтой, Æрыдоны районы Центрон рынчындон æмæ Эндокринологон диспансеры уыцы хайæдты. Уæд фæсивæдæн зæрдæ бавæрдтой, медицинон академимæ бацæуынæн сын нысанмæарæзт бынæттæ кæй радих кæндзысты, уымæй. Фæлæ æрæджы куыд рабæрæг, афтæмæй уыцы хъуыддаджы фæдыл æмбæлгæ уынаффæтæ хаст не ‘рцыд. Уыцы æууæл хынцгæйæ, студенттæ сæ хъаст балæвæрдтой республикæйы ног Сæргълæууæгмæ.
Уый тыххæй фехъусын кодта РЦИ-Аланийы Сæргълæууæджы æмæ Хицауады пресс-службæ.
Нæ уацхæссæг
