Ныхас — Уæрæсейы Туристон агентады разамонæгимæ

0
12
Республикæйы Сæргълæууæг Сергей Меняйло фембæлд Уæрæсейы Туризмы агентады разамонæг Дыгъуызты Зæринæимæ. Уый республикæмæ ссыд кусæг балцы.
Ныхас рауад Цæгат Ирыстоны туристон фæрæзтыл, кæцыдæр проекттæ куыд æххæстгæнгæ сты, уый фæбæрæг кодтой. Нæ размæ цы нысантæ лæууы, уыдонæй иу «Мамысон»-ы арæзтад кæронмæ ахæццæ кæнын æмæ курортон-дзæбæхгæнæн комплексы рæзтыл бакусын. Ам спайда кæнын хъæуы суартæй.
Дарддæр фæбæрæг кодтой, Президент цы хæс сæвæрдта, уый Цæгат Ирыстон бацархайа федералон программæ «Туризм æмæ уазæгуарзон индустри»-йы. Сергей Меняйло куыд бафиппайдта, афтæмæй хъуамæ республикæйæн æмгуыстад уа Туризмы агентадимæ. «Ирыстон хъуамæ ногæй байгом кæнæм, туризмы цæстæй акæсгæйæ йæ скæнæм зæрдæмæдзæугæдæр. Фылдæр туристтæ нæм цæудзæн, нæ маршруттæ хæрзцæттæ куы уой, сæ бынæттæ фадатджын, зондджын æмæ арæхстджын гидтæ æмæ экскурсоводтæй æххæст куы уæм, уæд. Хъыгагæн, нæ амалхъомтæ нæ зонынц, нæ бон сын цæмæй баххуыс кæнын у, уый. Фæлæ нæ рахæцæнтæ дзæвгар сты, Уæрæсейы Туризмы агентадимæ кусдзыстæм бæрнонæй», — фæбæрæг кодта республикæйы Сæргълæууæг.
Туризм æмæ санаторон-дзæбæхгæнæн фæрæз баиу кæнæм, ахæм у Сергей Меняйлойы фæндон. Ныртæккæ Цæгат Ирыстоны курортон-дзæбæхгæнæн фæрæзтæн сæ бынат ис пайдайаг географион фæзуаты, нæ климæт адæмыл хорз ауды, нæ æрдзы бакаст дæр аив æмæ фидауцджын у. Республикæйы бальнеологон рæзты программæ сфидар кодтой, уым фæбæрæг кодтой авд зонæйы. «Мамысон» дæр ис се ‘хсæн.
«Туризм Цæгат Ирыстонæн йæ рæзты рахæцæн у, уый тыххæй нæм алы уавæртæ дæр ис. Аэропорты ног бæстыхай аразынц, транспортон инфраструктурæ хорз кусы, ис нæм историон æмæ æрдзон бынтæ. Уыцы фæрæзтæ куы баиу кæнæм, уæд нæ размæ æвæрд нысантæм схиздзыстæм», — загъта республикæйы разамонæг.
Дыгъуызты Зæринæ куыд бафиппайдта, афтæмæй Уæрæсейы Туристон агентад алы фæрæзтæй хъæздыг у, цæмæй къабаз рæза, уымæн фадæттæ ис. Цæгат Ирыстонæн нæ фаг кæны нырыккон, хæрзхъæд фысымуæттæ. Инвестортæн сæ бон у ацы нысантæн 2024 азмæ уæлæмхасæн æфстæуттæ райсын, азмæ фиддзысты 3-5 проценты. Æфстау райсæн уыдзæн 15 азмæ, йæ бæрц у 100 милуан сомæй 70 миллиард сомы бæрц.
Национ проект æххæст кæнгæйæ, туризмы къабазы кусæг амалхъомтæн æххуыс кæндзысты. Цæмæй хъуыддæгтæ бантысой, уый тыххæй ныртæккæ кусынц ног закъонæвæрынадон проектыл.
РЦИ-Аланийы
Сæргълæууæджы æмæ Хицауады
пресс-службæ

ОСТАВЬТЕ ОТВЕТ

Please enter your comment!
Please enter your name here