Уæрæсейы Президенты фæдзæхстмæ гæсгæ республикæйы Сæргълæууæг Сергей Меняйло фембæлд цæгатирыстойнæгтимæ.
Архайдтой дзы Хицауады Сæрдары фыццаг хæдивæджы хæстæ рæстæгмæ æххæстгæнæг Æгъуызарты Мурат, хæдивджыты хæстæ рæстæгмæ æххæстгæнджытæ Тугъанаты Ларисæ, Фадзайты Æхсарбег, министртæ, районты разамонджытæ. Царды ахсджиаг фарстатæ алыг кæныны тыххæй Сæргълæууæгмæ æрбацыдысты 13 адæймаджы.
Кировы районы цæрæг Дзукъаты Дианæ куыд радзырдта, афтæмæй Елхоты Ленины уынг æппындæр рухсæй ифтонг нæу. Районы бынæттон хиуынаффæйады разамонæг Батиаты Хъазыбег куыд загъта, афтæмæй «Хъæууон фæзуæтты иумæйаг рæзт»-ы паддзахадон программæйы фæлгæты хъуыддаг конд æрцæудзæн, уынгтæ электрон рухсæй сфæлгонц кæндзысты. Ныртæккæ администраци сæхи аукционмæ цæттæ кæнынц, уынгты диоды рухсгæнæнтæ сæвæрдзысты.
Электрон тыхы телтæй 1165 метры баивдзысты, рухсгæнæтæ 29 сæвæрдзысты. Хъуамæ азы кæронмæ хъуыддæгтæ ахицæн уой. Сергей Меняйло куыд бафæдзæхста, афтæмæй цыбыр рæстæгмæ хъуамæ уынгты рухс фæзына, иннæ уынгты дæр рухсгæнæнтæ баивын хъæуы. Елхоты Денджызонты уынджы къахвæндæгтæ кæй нæй, уый тыхсын кæны Богъиты Аланы. Фистæгцæуджытæ æвзарынц зындзинæдтæ, ис дзы æдасдзинады фарста дæр, рахизынц фæндагмæ.
Батиаты Хъазыбег куыд радзырдта, уымæ гæсгæ «Хъæууон фæзуæтты иумæйаг рæзт»-ы фæлгæты уыцы фарста азы кæронмæ лыггонд æрцæудзæн. Паддзахадон нысаниуæджы æлхæнинæгты тыххæй хъæугæ гæххæттытæ бацæттæ кодтой, хъуамæ 1772 метры къахвæндаг саразой, асфальтæй йæ сæхгæной. «Ацы аз декабры куыстытæ хъуамæ фæуой», — загъта сын Сергей Меняйло.
Мызуры поселочы цæрæг Калоты Заремæ та фæбæрæг кодта, Фыдыбæстæйы Стыр хæстмæ поселокæй чи ацыд æмæ фæмард, уыдоны цыртдзæвæн сцалцæг кæныны хъуыддаг. Ныртæккæ йæ уавæр у зилинаг. Районы разамонæг Дзантиаты Ислам куыд загъта, афтæмæй «Хъæууон фæзуæтты иумæйаг рæзт»-ы паддзахадон программæйы фæрцы цыртдзæвæнмæ базилдзысты. Цы къæйтæй æхгæд у, уыдон гранитæй баивдзысты, бетон æмæ сæрдæн куыстытæ бакæндзысты, згъæр конструкцитæ, цыртдзæвæны мыггæгтæ сног кæндзысты.
Сергей Меняйло куыд бацамыдта, афтæмæй хъуамæ Дзантийы-фырт хъуыддаг дыууæ хайыл алыг кæна — цæттæгæнæн æмæ сæйрагыл. «Ацы аз цы ис скæнæн, ууыл ахъуыды кæн. Иннæ хъуыддæгтæ та иннæ азмæ ахæсс. Баныхас кæнæм: цæуыс бынатмæ, демæ ма хъуыддагыл зæрдæйæ чи тыхсы, уыдон, æмæ, ацы аз уæ бон цы у, уый сбæрæг кæнут. Бавналут сæм», — загъта республикæйы Сæргълæууæг.
Бæтæхъойыхъæуы ныр 30 азы дæргъы Культурæйы хæдзар нæй, фæсивæд се сфæлдыстадон рæзтæн авналæнтæ нæ уынынц. Бæрæгбæттæ скæнынц скъолайы бæстыхайы. Республикæйы разамонæг куыд бацамыдта, афтæмæй хъæуы Культурæйы хæдзар сараздзысты. Дзæуджыхъæуы Æрыдойнаг уынджы рæвдауæндон дæр у базилинаг, хъуамæ дзы бындурон куыстытæ бакæной. Бæстыхайы раззаг къул сцалцæг кæндзысты, мидæггаг куыстытæм бавналдзысты. Дзæвгар сты: инженерон хызтæ, санитарон уæттæ, къултæ, цартæ, пъолтæ, рудзгуытæ, асинты кълеткæтæ. Алцыдæр хъæуы баивын.
Рæвдауæндоны алфамбылай фæз дæр у базилинаг, йæ быру ивинаг. Муниципалон бюджеты фæрæзтæй бахъæудзæн 10 милуан сомы бæрц, куыстытæ хъуамæ фæуой 2022 азы фыццаг кварталы кæрон. Сергей Меняйло куыд бафæдзæхста, афтæмæй хъуамæ рæвдауæндонæн балхæной ног хъæдын дзаума, ифтонггæрзтæ. Кæронмæ дæр республикæйы Сæргълæууæг æвзæрста, граждæнтæ йæм цы хъуыддæгты фæдыл æрбацыдысты, уыдон. Баст уыдысты донæфсисады, хызтæ рацаразын æмæ æндæр ахсджиаг фарстатимæ.
РЦИ-Аланийы
Сæргълæууæджы
æмæ Хицауады пресс-службæ
