Бæлццæтты æдасдзинад æмæ æндæр социалон фарстатæ

0
197

 Уыд Республикæ Цæгат Ирыстон-Аланийы Парламенты советы радон æмбырд. Амыдта йæ Парламенты Сæрдар Алексей Мачнев

Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст закъонты проекттæ æмæ закъонæвæрынадон хъæппæристæ.

Республикæ Цæгат Ирыстон-Аланийы хицауады паддзахадон оргæнты системæйы куыст, Республикæ Цæгат Ирыстон-Аланийы Парламентмæ, стæй Республикæ Цæгат Ирыстон-Аланийы бынæттон хиуынаффæйады оргæнтæм депутаттæ æвзарыны хъуыддаг банывыл кæныны тыххæй Республикæ Цæгат Ирыстон-Аланийы закъонты æмæ Республикæ Цæгат Ирыстон-Аланийы Конституцион закъоны проекттæ советы уæнгтæн сæ размæ рахаста Парламенты закъонæвæрынады, закъонад æмæ бынæттон хиуынаффæйады комитеты сæрдар Ортабайты Тимур. Депутаттæ сæм æркастысты фыццаг æмæ дыккаг бакастыты æмæ рахастой Парламенты радон æмбырды боны фæткмæ сæ бахæссыны фæдыл уынаффæ.

«2022, 2023 æмæ 2024 азты пъланон рæстæгмæ федералон бюджеты тыххæй» федералон закъоны проекты, стæй, уыцы-иу рæстæг ацы закъоны проектимæ иумæ æркæсынмæ чи бавдыстæуыд, уыцы федералон закъонты проектты фæдыл æмбырды раныхас кодта Парламенты бюджеты, хъалонты, исбонад æмæ кредитон организациты комитеты сæрдар Баликъоты Валери. Федералон закъоны проектмæ каст æрцыд фыццаг бакасты.

Парламенты комитеты сæрдары ныхасмæ гæсгæ, Уæрæсейы Федерацийы Президенты ныстуантæ æмæ уынаффæтæ æххæст кæныны фæлгæты, федералон бюджетæн йæ социалон нысаниуæг нæ аивдзæн, æмæ йæ сæйраг хæрдзтæ уыдзысты национ проекттæ æмæ паддзахадон программæтæ æххæст кæныныл. Баликъоты Валери куыд загъта, афтæмæй федералон бюджеты сæйраг бæрæггæнæнтæ æрцыдысты фидаргонд. Уыдон баст сты, Мидбæстон иумæйаг продукт куыд рæздзæн, уыимæ æмæ сты ахæм: 2022 азы æфтиæгтæ — 25,02 триллион сомы, хæрдзтæ — 23,69 триллион сомы; 2023 азы æфтиæгтæ — 25,54 триллион сомы, хæрдзтæ — 25,24 триллион сомы; 2024 азы æфтиæгтæ — 25,83 триллион сомы, хæрдзтæ та — 26,35 триллион сомы.
Советы уæнгтæ æркастысты, Уæрæсейы Федерацийы Хицауад кæй бацæттæ кодта, «Уæрæсейы Федерацийы фæллойадон кодексы 51 хаймæ ивддзинæдтæ бахæссыны тыххæй» уыцы федералон закъоны проектмæ. Депутаттæн æй сæ размæ рахаста Парламенты социалон политикæйы, æнæниздзинад хъахъхъæнынад æмæ ветеранты хъуыддæгты фæдыл комитеты сæрдары хæдивæг Владимир Уваров.

Хъуыддаг уый мидæг ис, æмæ, уæззау кæнæ уæлдай уæззаудæр фыдракæнд саразыны тыххæй тæрхондоны уынаффæйæ æфхæрд чи æрцыд æмæ, уыцы æфхæрд чи нæма бафыста, кæнæ уыцы æфхæрд ист кæмæй нæма æрцыд, ахæм адæймæгтæн такситы кусын æмæ адæмы ласыны бар нæй. Документы ныхас цæуы амынд адæймæгтæм уыцы домæнтæ ноджы фæкарздæр кæныныл. Закъоны проектæн йæ нысан бæлццæтты цард æмæ се ‘нæниздзинад бахъахъхъæнын кæй у, уымæ гæсгæ йæ депутаттæ хорзыл банымадтой.

Амынд фарстайыл ныхас цæуы «Хиамалхъомтæ æмæ юридикон иуæгты паддзахадон регистрацийы тыххæй» федералон закъоны проекты дæр. Æрмæст ацы ран домæнтæ фæкарздæр кæныны тыххæй ивддзинæдтæ бахæссинаг сты «Горæты цæуæг электрон æмæ автомобилон транспорты Уставмæ». Фарстайы фæдыл ныхас кодта Парламенты промышленносты, транспорты, бастдзинад æмæ амалхъомады комитеты сæрдар Бурдзиуты Валери.

Виталий Назаренко Парламенты депутатæй æвзæрст кæй æрцыд æмæ йæ Парламенты цæрæнуатон-коммуналон хæдзарад æмæ арæзтадон политикæйы комитеты сæрдарæй кæй снысан кодтой, уымæ гæсгæ Республикæ Цæгат Ирыстон-Аланийы Муниципалон скондты советы Парламенты æххæстбарджын минæвары хæстæ æххæст кæнынæй уæгъдгонд æрцыд. Фарстайы фæдыл ныхас кодта Парламенты Сæрдар Алексей Мачнев.

Уымæй уæлдай, Советы уæнгтæ ногæй æркастысты, Парламенты радон æмбырды боны фæткмæ хаст чи æрцæудзæн, уыцы фарстатæм æмæ сбæлвырд кодтой æмбырд саразыны бон.

 

Дедегкаты Зæлинæ

 

 

ОСТАВЬТЕ ОТВЕТ

Please enter your comment!
Please enter your name here