Дзæуджыхъæуы уыд историйы ахуыргæнджыты æмбырд. Æргом уагæй ныхас кæнгæйæ, Дзæуджыхъæуы администрацийы ахуырады управленийы хицау Батырты Аслан педагогтæн бахаста Историйы ахуыргæнджыты форум Цæгат Ирыстоны сæйраг горæты саразыны фæндон.
— Форумы рæстæг кæуыл æрныхас кæнæм, уыцы фæндæттæ бахæссæн ис уæлдæр æмвæзадмæ. Историйы предметы ахуырадæн ис стыр хъомыладон-патриотон ахадындзинад. Зындгонд историон архайджытæ рæзгæ фæлтæрæн фæзминаг сты. Ахуырадон пъланы æмæ Ирыстоны историйы ахуыргæнæн чингуыты мидисы тыххæй уæм цавæр хъуыдытæ сæвзæрд, уый нæ базонын фæнды, — загъта Батыры-фырт.
Фембæлды архайджытæ Ирыстоны историйы æмæ æхсæнадзонынады ахуырады фæдыл сæм сæвзæргæ хъуыдытæ раргом кодтой.
Зæгъæм, Джиоты Риммæ бахаста музейтæм цæуынæн скъоладзаутæн абонемент бацæттæ кæныны фæндон (æнæ экспонаттимæ базонгæйæ историйы ахуырад æвзæр цæуы). Стыр ахуыргæнæн чингуытæ кæсын фæсивæды кæй нæ бафæнды, уый нымайгæйæ, æрыгон ахуыргæнджытæ бахастой ахуырады рæстæг цыбырметражон роликтæ æмæ кинонывтæй пайда кæныны фæндон.
Уымæй уæлдай, ныхас цыд Ирыстоны цæрæн бынæттæм экскурситæ аразыныл, Иумæйаг паддзахадон фæлварæны ногдзинæдтыл æмæ олимпиадæтæм цæттæкæнынадыл.
— Ацы фембæлд арæзт кæй æрцыд, уый мын æхсызгон у. Нæ хæс у иумæйаг архайды фæрцы историон ахуырад уæлдæр къæпхæнмæ сисын. Æрыгон ахуыргæнджытæ сæ куыстмæ стыр æргом кæй здахынц, уымæй райгонд дæн. Бахастæуыд музейтæм цæуыны, экскурситæ аразыны æмæ урокты фæстæ иртасæн куыст æххæст кæныны пайдайаг фæндæттæ. Арæх Иумæйаг паддзахадон фæлварæнмæ цæттæ кæныны рæстæг ацы хъуыддæгтæ рохуаты баззайынц.
Æмбырды архайджытæ кæй бахастой, æппæт уыцы фæндæттæ нымад æрцыдысты, — загъта 11-æм астæуккаг скъолайы истори æмæ æхсæнадзонынады ахуыргæнæг Дедегкаты Заремæ.
Дзæуджыхъæуы
администрацийы пресс-службæ
