Уавæр фæхуыздæр, фæлæ æнæмæт уæвынæн нырма раджы у

0
149

Ног коронавирусы хæцгæ низы ныхмæ тох кæныны оперативон штабæн уыд радон æмбырд. Амыдта йæ Республикæ Цæгат Ирыстон-Аланийы Сæргълæууæг Сергей Меняйло.

 

Республикæйы разамонæг куыд бафиппайдта, афтæмæй, ковидæй фæрынчыны цаутæ къаддæр кæнын райдыдтой. «Фæлæ нын æнæмæт уæвынæн бар нæма ис, æмæ низæй бахъахъхъæныны мадзæлттæ хъæуы адарддæр кæнын», — загъта уый.

Цæгат Ирыстоны “Роспотребнадзор”-ы бæрæггæнæнтæм гæсгæ, ивгъуыд къуыриимæ абаргæйæ, низæй фæрынчыны цауты нымæц республикæйы фæкъаддæр. Низæн йæ парахат кæныны коэффициент ныртæккæ у 0,4 проценты. Фæлæ ведомствæйы куыд амонынц, афтæмæй базарадон центрты, æхсæнадон хæлцады кусæндæтты низæй бахъахъхъæныны мадзæлттæ дарддæр дæр хъæуы æххæст кæнын.

РЦИ-Аланийы “Росздравнадзор”-ы хъусынгæнинагмæ гæсгæ, ковид-стационарты рынчынтæн цы бынæттæ ис, уыдонæн сæ 32 проценты ныртæккæ сты уæгъд. Уымæ гæсгæ, нæ республикæйы Æнæниздзинад хъахъхъæнынады министрады уынаффæйæ, Горæтгæрон районы рынчындонмæ ковидæй рынчынты амæй фæстæмæ нал ласдзысты, ныр дзы æрбынæттон уыдзæн терапевтон хайад.

— Горæтгæрон районы рынчындоныл цы уаргъ уыд, уый фæрогдæр кæнынæн гæнæн фæзынд, уымæн æмæ Тагъд æххуысы клиникон æмæ Республикон клиникон рынчындæтты ковидæй рынчынтæн бынæттæ ис фаг, — загъта æнæниздзинад хъахъхъæнынады министры хæстæ рæстæгмæ æххæстгæнæг Тебиаты Сослан.

Коронавирусы карз хæцгæ низы ныхмæ тох кæныны хъуыддаджы фыццаградон медицинон æххуысæн цы нысан ис, ууыл ныхас кæнгæйæ, Сергей Меняйло бафиппайдта, разы кæй нæу, низ рагагъоммæ сбæрæг кæныны тыххæй тесттæ аразыны хъуыддаг куыд цæуы, уымæй. Амбулаториты дзæбæхгæнинаг цы рынчынтæ сты, уыдонмæ каст куыд цæуы, уый дæр, йæ ныхасмæ гæсгæ, нывыл нæу. Æмæ та ногæй поликлиникæты сæйраг дохтыртæн се ‘ргом аздæхта низы профилактикæмæ.

— Низ кæуыл бахæцыд, уыдоны рагагъоммæ бæрæг кæнын сымахæн у уæ бæрнон хæс. Æмæ уыцы хæсмæ фаг бæрнон цæстæй кæй нæ кæсут, уымæ гæсгæ, тесттæ кæмæн скæнынц, уыдоны нымæц у гыццыл. Зæрдæмæдзæугæ не сты, рынчынтæм каст куыд цæуы, лæвар хостæ сын куыд дæттынц, уыцы хъуыддæгтæ дæр. Уавæр уæхицæй уæлдай ничи банывыл кæндзæн. Æххæст кæнут “Роспотребнадзор”-ы домæн: уæ куыст аразут уыцы хуызы, цæмæй поликлиникæтæм цæуæг адæм сæ низ кæрæдзиуыл ма æфтауой, рады лæууын адæмы куыд нæ хъæуа æмæ рынчынтæ æмæ æнæнизтæ кæрæдзимæ хæстæг куыд нæ уой, афтæ. Ковидæй рынчынтæ кæд фæкъаддæр сты, уæддæр уавæр нæ амоны, æмæ нæ къухтæ æруадзæм æмæ æнцад æрбадæм. Ацы фарста уæлдай тынгдæр хауы профилактикон мадзæлттæм, — бацамыдта Сергей Меняйло.

Сæрмагонд ныхас уыд вакцинацийы фарстайыл. Низы ныхмæ вакцинаци чи скодта, нæ республикæйы цæрджытæн уыдон сты 38,2 проценты. Афтæмæй та Уæрæсейы уыцы бæрæггæнæн рæстæмбисæй у 60 проценты. 60 азæй уæлæмæ кæуыл цæуы, республикæйы ахæм цæрджытæй вакцинаци скодтой æрмæстдæр 6,7 проценты, Уæрæсейы та — 55,9 проценты. Кæй зæгъын æй хъæуы, вакцинацийы ахæм уавæрæй Цæгат Ирыстоны Сæргълæууæг разы нæу. Уымæ гæсгæ Сергей Меняйло йæ ныхас аздæхта республикæйы фæллой æмæ социалон рæзты министрмæ æмæ æмбырды архайæг Парламенты депутаттæм, цæмæй, 60 азæй уæлæмæ кæуыл цæуы, уыцы адæмимæ ноджы разæнгарддæрæй кæной æмбарынгæнæн куыст.

 

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here