Нæ республикæйы Мыхуыр æмæ дзыллон коммуникациты комитеты хорзæхджын æрцыдысты, «Равзар цард», зæгъгæ, ацы темæйыл наркоманийы ныхмæ хуыздæр æрмæг чи бацæттæ кодта, уыцы журналисттæ.
Конкурс арæзт æрцыд ныр æртыккаг хатт. Йæ сæйраг нысан у наркотикон буаргъæдтæй æнæзакъонæй пайда кæныны ныхмæ, æнæ дохтыры амындæй ахæм буаргъæдæй пайда чи кодта, уыдоны реабилитаци æмæ наркотикты æнæзакъон зилдухимæ баст темæтæм мыхуыры æмæ электронон дзыллон хабархæссæг фæрæзтæн се ‘ргом здахын.
Конкурсы чи фесгуыхт, уыдонæн арфæ ракодтой РЦИ-Аланийы Наркотикты ныхмæ къамисы аппараты разамонæг Луизæ Лебедева, Мыхуыр æмæ дзыллон коммуникациты комитеты сæрдар Фидараты Юри, Республикон наркодиспансеры сæргълæууæг Газайты Алыксандр.
«Наркоманийы ныхмæ мыхуыры хуыздæр æрмæг», зæгъгæ, ацы номинацийы уæлахиздзау ссис журналист Гæцойты Наталья. Уый фыццаг хатт нæ архайы конкурсы, æмæ йын ацы æнтыст фыццаг нæу. Йе ‘рмæг мыхуыргонд æрцыд республикон газет «Северная Осетия»-йы.
Уымæй уæлдай, хорзæхджын æрцыдысты телеканал «Осетия-Ирыстон»-ы сæрмагонд уацхæссæг Скъиаты Ларисæ «Наркотикты ныхмæ хуыздæр электронон проект»-ы тыххæй æмæ блогер Моурауты Артур «Наркотикты ныхмæ хуыздæр æрмæг социалон хызæгты»-йы тыххæй.
— Наркоманийы фарста цас ахсджиаг у, уымæн хуымæтæг ныхæстæй зæгъæн нæй, æмæ йыл дзурын, æппæт æхсæнады æргом æм раздахын у тынг хъæугæ хъуыддаг, уымæн æмæ ныхас цæуы адæмы цардыл. Наркомани у стыр бæллæх, æмæ, йæ ныхмæ чидæриддæр архайы, уыдон се ‘ппæт дæр сты арфæйы аккаг. Конкурсмæ йæ куыстытæ чи бацæттæ кодта, уыдонæн арфæ кæнын, — загъта Фидараты Юри.
— Наркоманты реабилитацийы ценрты куыстмæ журналисттæ здахынц уæлдай фылдæр æргом, ууыл дзурæг сты, конкурсмæ цы бирæ куыстытæ æрбарвыстой, уыдон. Фидæны бацархайдзыстæм номинацитæ фæфылдæр кæныныл, цæмæй конкурсы архайа ноджы фылдæр адæм, — бафиппайдта Луизæ Лебедева.
Дарчиты Юлия
Къам систа
Татьянæ Шеходанова
