Муниципалитетты конкурсы уæлахиздзаутæ

0
184

Зæронд азы кæрон РЦИ-Аланийы Сæргълæууæг Сергей МенЯйло хицауады республикон æмæ муниципалон оргæнты разамонджытимæ цы фембæлд сарæзта, уым бахыгъта 2021 азы рагагъоммæ бæрæггæнæнтæ, стæй фæнысан кодта 2022 азы архайды сæйрагдæр фæндæгтæ. Уымæй уæлдай, уый сæрмагонд хæрзиуджытæ радта хуыздæр муниципалитетты минæвæрттæн.

 

Сергей Меняйло йæ раныхасы куыд фæбæрæг кодта, афтæмæй 2021 азы бахъуыд вазыгджын уавæрты архайын. Фидæны та ноджы бæрнондæр хæстыл бакусын хъæудзæн.

— Нæ фидæны куыст цавæр бындурыл равæрæм, уымæй, кæй зæгъын æй хъæуы, аразгæ уыдзæн, ног аз цас æнтыстджын рауайдзæн, уый. Хицауады республикон æмæ муниципалон оргæнтæй бирæ аразгæ у хуымæтæг адæмы цард, сымахыл, муниципалитетты кусджытыл, æвæрд ис бæрнон хæстæ. Хицауады регионалон оргæнты размæ та бæлвырд нысантæ æвæрд цæуы, цæмæй сымахæн уе ‘рвылбоны куысты ахадгæ æххуыс кæной, — фæнысан кодта республикæйы разамонæг.

Республикæйы Сæргълæууæг бæлвырд амынддзинæдтæ радта республикон министрадтæ æмæ ведомствæты разамонджытæн, стæй муниципалон оргæнты бæрнон кусджытæн.

Дарддæр Сергей Меняйло сæрмагонд сертификаттæ саккаг кодта муниципалитетты республикон конкурсы уæлахиздзаутæн. Афтæ, сæрмагонд къамис бахыгъта Дзæуджыхъæу æмæ республикæйы хъæууон муниципалитетты 2020 азы куысты бæрæггæнæнтæ æмæ хуыздæртæн саккаг кодта призон бынæттæ.

Муниципалитетты конкурсы уæлахиздзауыл нымад æрцыд Мæздæджы район — саккаг ын кодтой 10 милуан сомы аргъ сертификат. Дыккаг бынат æмæ 5 милуан сомы аргъ сертификат радтой Æрæфы районæн, æртыккаг бынат æмæ 3 милуан сомы та — Алагиры районæн. Конкурсы уагæвæрдмæ гæсгæ, амынд фæрæзтæ хардзгонд æрцæудзысты муниципалитетты социалон инфраструктурæйы дарддæры райрæзтыл.

Зындгонд куыд у, афтæмæй республикæйы муниципалитетты ‘хсæн ахæм конкурс арæзт цæуы ныр æртыккæгæм аз. Конкурсон къамис куыд фæбæрæг кодта, афтæмæй 2020 азы хуыздæр финансон-экономикон бæрæггæнæнтæ бафтыд Мæздæджы, Æрæфы æмæ Алагиры районты къухы. Зæгъæм, бынæттон хъалонтæ æмбырд кæныны хъуыддаджы Алагиры районы 2020 азы рæзты бæрæггæнæн рауад 221 процентæй фылдæр, Мæздæджы районы та — 128 процентæй фылдæр. Социалон фарстатæ ахадгæдæр хуызы лыггонд цæуынц Рахизфарсы, Алагиры æмæ Æрæфы районты.

 

РЦИ-Аланийы
Сæргълæууæджы æмæ Хицауады
пресс-службæ

ОСТАВЬТЕ ОТВЕТ

Please enter your comment!
Please enter your name here