Цæгат Ирыстоны мидхъуыддæгты ног министр — Андрей Сергеев

0
15

Уæрæсейы мидхъуыддæгты министр Владимир Колокольцев цы видеоконференци сарæзта, уым Цæгат Ирыстоны мидхъуыддæгты оргæнты кусджыты базонгæ кодта республикæйы мидхъуыддæгты ног министр Андрей Сергеевимæ. Видеоконференцийы архайдта æмæ раныхас кодта РЦИ-Аланийы Сæргълæууæг Сергей Меняйло дæр.

Зындгонд куыд у, афтæмæй Уæрæсейы Президент Владимир Путины Указæй 2021 азы декабры кæрон пъæлицæйы инæлар-лейтенант Андрей Сергеев нысангонд æрцыд Цæгат Ирыстоны мидхъуыддæгты министрæй. Æмæ ныр республикон ведомствæйы ног разамонæг ссыд йæ службæйы ног бынатмæ.

Мидхъуыддæгты министрады службæгæнджыты сæ ног разамонæгимæ базонгæ кæнгæйæ, Владимир Колокольцев ног министры размæ бæлвырд хæстæ сæвæрдта барадон фæтк хъахъхъæнын æмæ фыдракæндтимæ ахадгæ тохы хъуыддаджы. Уыимæ, видеоконференцийы рæстæг федералон министр Челябинскы облæсты Мидхъуыддæгты сæйраг управленийы службæгæнджыты та базонгæ кодта сæ ног разамонæг Михаил Скоковимæ дæр (ома, УФ-йы Мидхъуыддæгты министрады дыууæ регионалон дæлхайады разамонджытæн сæ бынæттæ баивтой ротацийы фæткмæ гæсгæ).

Видеоконференцийы архайджытæ куыд фæбæрæг кодтой, афтæмæй Андрей Сергеев дæр æмæ Михаил Скоков дæр рацыдысты бирæ цæмæйдæрты иухуызон профессион фæндагыл: сæ службæ райдыдта рæнхъон милиционерæй, куыстой участочы инспектортæй, дзæвгар рæстæг бакуыстой уголовон агуырды дæлхайæдты…

Владимир Колокольцев йæ раныхасы куыд бафиппайдта, афтæмæй дыууæ инæлармæ дæр ис службæйы бæрзонд профессион цæттæдзинад, стæй фæлтæрддзинад. Уыцы æууæлтæ, федералон министры хъуыдымæ гæсгæ, ахъаз уыдзысты куысты хæстæ ахадгæ хуызы æххæст кæнынæн. «Уыимæ, мидхъуыддæгты регионалон дæлхайæдты разамонджытæ се ‘рвылбоны архайды хъуамæ сæ зæрдыл дарой бынæттон хицæндзинæдтæ дæр», — загъта Владимир Колокольцев.

Федералон ведомствæйы разамонæг куыд фæбæрæг кодта, афтæмæй Цæгат Ирыстон æмæ Челябинскы облæсты пъæлицæйæгты куысты хорзæрдæм ивддзинæдтæ ис. Уыимæ, министр бæлвырд амынддзинæдтæ радта фыццаградон фарстаты фæдыл дæр. Зæгъæм, йæ ныхасмæ гæсгæ, РЦИ-Аланийы Мидхъуыддæгты министрады разамонджытæ иннæ республикон ведомствæтимæ хъуамæ бæстондæр бакусой, цæмæй фæндагон-транспортон фыдбылызты нымæц зынгæ фæкъаддæр уа. Уыцы куысты уæрæхдæр пайда кæнын хъæуы видеоцæстдарды системæтæ æмæ æндæр нырыккон техникон фæрæзтæй. Уыцы архайдмæ хъæуы аздахын адæмон дружинæты уæнгты æргом дæр…

Сергей Меняйло йæ раныхасы хорз аргъ скодта Михаил Скоковы куыстæн. Уымæй уæлдай, республикæйы разамонæг Андрей Сергеевæн арфæ ракодта, ног бынатмæ йæ кæй снысан кодтой, уый фæдыл. Уыимæ, Цæгат Ирыстоны Сæргълæууæг Владимир Колокольцевæн бузныг загъта, республикæйы Мидхъуыддæгты министрады архайды фарстатæм лæмбынæг кæй кæсы, уый тыххæй.

— Цæгат Ирыстоны мидхъуыддæгты ног министры размæ цы хæстæ æвæрд цæуы, уыдон махæн хорз зындгонд сты. Уыцы нысантæ цард рауадзыны хъуыддаджы мах алкæддæр æххуыс кæндзыстæм министрады разамындæн. Андрей Сергеевы профессион фæлтæрддзинад хынцгæйæ, æз дызæрдыг нæ кæнын, уый цыбыр æмгъуыдмæ æппæт фарстатæ дæр бæстон кæй раиртасдзæн æмæ сæ банывыл кæнынæн хъæугæ мадзæлттæ кæй сараздзæн, ууыл, — фæнысан кодта Сергей Меняйло.

 

РЦИ-Аланийы
Сæргълæууæджы æмæ Хицауады
пресс-службæ

 

Биографион бæрæггæнæнтæ

 

Пъæлицæйы инæлар-лейтенант Андрей Федоры фырт Сергеев райгуырд 1964 азы Новосибирскы облæсты горæт Искитимы. Мидхъуыддæгты оргæнты службæ кæнын райдыдта 1985 азы Бердскы мидхъуыддæгты хайады æнæведомствæйон управленийы инспекторæй. 1987 азы нысангонд æрцыд милицæйы участочы инспекторæй. Фæстæдæр æй раивтой Бердскы мидхъуыддæгты хайады уголовон агуырды инспекторы бынатмæ. 1992 азы нысангонд æрцыд Бердскы мидхъуыддæгты хайады уголовон агуырды дæлхайады хицауы хæдивæгæй. Уыцы аз каст фæцис Томскы паддзахадон университеты юридикон факультет. 1995 азы йæ службæ адарддæр кодта Бердскы мидхъуыддæгты хайады криминалон милицæйы службæйы экономикон фыдракæндтимæ тохы дæлхайады хицауы бынаты. 1998 азы каст фæцис УФ-йы Мидхъуыддæгты министрады Разамынды академи. Уый фæстæ йæ службæйы бынат ссис Новосибирскы облæсты Мидхъуыддæгты управлени. Уым алы бæрнон бынæтты бакусгæйæ, 2005 азы нысангонд æрцыд Новосибирскы облæсты Мидхъуыддæгты сæйраг управленийы хицауы хæдивæгæй — штабы хицауæй. 2007 азы æрлæууыд Магаданы облæсты Мидхъуыддæгты управленийы сæргъы. 2008 азы Уæрæсейы Президенты Указæй А.Сергеевæн лæвæрд æрцыд инæлар-майоры цин. 2010 азы нысангонд æрцыд Хабаровскы облæсты Мидхъуыддæгты управленийы хицауæй. 2014 азы Андрей Сергеев æрлæууыд Челябинскы облæсты Мидхъуыддæгты сæйраг управленийы хицауы бынаты. 2015 азы Президенты Указæй А.Сергеевæн лæвæрд æрцыд инæлар-лейтенанты цин.

Ис ын бинонтæ, хъомыл кæны дыууæ сывæллоны. Хорзæхджын æрцыд паддзахадон ведомствæйон хæрзиуджытæй

ОСТАВЬТЕ ОТВЕТ

Please enter your comment!
Please enter your name here