РЦИ-Аланийы Сæргълæууæг Сергей Меняйлойы разамындæй уыд республикон министрадтæ æмæ ведомствæты разамонджыты æрвылкъуырион аппаратон æмбырд. Фембæлды архайджытæ æрдзырдтой сæвзæргæ эпидемиологон уавæр æмæ йæ банывыл кæныны мадзæлттыл, скъолаты профилон инженерон æмæ медицинон кълæстæ байгом кæныныл, муниципалитетты райрæзты программæтæ æмæ республикæйы æрвылбоны царды æндæр фарстатыл.
Ахуырады къабазы дарддæры райрæзты нысантыл дзургæйæ, Сергей Меняйло ахуырад æмæ наукæйы министр Алыбегты Эллæйæн бахæс кодта, цæмæй 1 сентябры республикæйы скъолаты байгом уой профилон инженерон æмæ медицинон кълæстæ. Уыцы æмгъуыдмæ профилон ведомствæ хъуамæ бацæттæ кæна ахуырады сæрмагонд программæтæ æмæ сын сæ мидис фæхæццæ кæна ныййарджытæ æмæ сывæллæттæм.
Æмбырды рæстæг куыд загъдæуыд, афтæмæй хæстæгдæр рæстæг иуæй-иу ахуырадон кусæндæтты байгом уыдзысты уæлæмхасæн кадетон кълæстæ. Алыбегты Эллæйы ныхасмæ гæсгæ, ахæм кълæстæ байгом кæныныл министрад баныхас кодта УФ-йы Слестгæнæг комитеты РЦИ-Аланийы управленийы разамындимæ. Уыимæ, министр куыд фæнысан кодта, афтæмæй Слестгæнæг управленийы специалисттæ архайдзысты сæрмагонд ахуырадон программæтæ æххæст кæныны куысты, стæй се ‘ргом аздахдзысты профилон кълæстæ хъæугæ уагæй сифтонг кæнынмæ.
Уыимæ, æмбырды куыд загъдæуыд, афтæмæй кадетон кълæстæ ныридæгæн байгом сты республикæйы æппæт районты (Дыгуры æмæ Æрæфы муниципалитеттæй фæстæмæ) скъолаты дæр. Ацы хъуыддагмæ се ‘ргом раздæхтой Дыгуры æмæ Æрæфы районты разамонджытæ дæр — куыд фехъусын кодтой, афтæмæй хæстæгдæр рæстæг кадетон кълæстæ байгом уыдзысты дыууæ районы дæр.
Фарстайæн хатдзæгтæ кæнгæйæ, Сергей Меняйло куыд фæнысан кодта, афтæмæй Президент Путин бæлвырд амынддзинæдтæ радта иумæйагахуырадон скъолаты æмвæзадыл ахадгæ профориентацион куыст кæныны фæдыл. «Уыцы уагæвæрдтæ æххæст кæнынмæ хъуамæ уа бæстон æмæ бæрнон ахаст», — бацамыдта республикæйы Сæргълæууæг.
Дарддæр æмбырды архайджытæ æркастысты сæвзæргæ санитарон-эпидемиологон уавæрмæ.
Коронавирусимæ тохы мадзæлттыл дзургæйæ, «Роспотребнадзор»-ы регионалон управленийы разамонæг Тыбылты Алан куыд фехъусын кодта, афтæмæй ныридæгæн нæ республикæйы рабæрæг, карз низæфтауæджы ног штамм — «омикронæй» чи фæрынчын, ахæм 2 адæймаджы.
Уыцы æууæл хынцгæйæ, Сергей Меняйло Хицауады Сæрдары хæдивæг Александр Реутов æмæ æнæниздзинад хъахъхъæнынады министры хæстæ рæстæгмæ æххæстгæнæг Тебиаты Сосланæн бахæс кодта, цæмæй республикæйы медицинæйы къабаз ахадгæдæр хуызы бацæттæ кæной низы ног «уылæны» ныхмæ фидардæрæй фæлæууынмæ.
— Специалисттæ куыд зæгъынц, афтæмæй гæнæн ис, æмæ ног штаммæй рынчынты нымæц хæстæгдæр рæстæг зынгæ сырæза. Æмæ уавæрмæ хъуамæ уæм цæттæ. Уый хауы ковид-госпитæлты бынæтты нымæцмæ, туаггуыры системæты куыстмæ, хъæугæ хосты бæрцмæ, стæй дзыллон вакцинацийы цыдмæ дæр… Специалистты хъуыдыйыл æнцой кæнгæйæ, хæстæгдæр рæстæг фылдæр æргом аздахын хъæудзæн æнæниздзинад хъахъхъæнынады системæйы амбулаторон-поликлиникон къæпхæны куыст фæхъомысджындæр кæнынмæ. Уымæн æмæ, рæстæг куыд æвдисы, афтæмæй ковид-стационартæм æфты къаддæр адæм, амбулаториты æмвæзадыл та рынчынты нымæц рæзы. Низыхатт афойнадыл рабæрæг æмæ рынчыны адзæбæх кæнынмæ медицинæйы къабаз хъуамæ уа æппæтвæрсыг цæттæ, — фæнысан кодта Сергей Меняйло.
Тебиаты Сосланы ныхасмæ гæсгæ, низы ног «уылæныл» хæрзцæттæйæ сæмбæлыны нысанимæ ныридæгæн арæзт цæуынц уæлæмхасæн мадзæлттæ. Афтæ, йæ хъусынгæнинагмæ гæсгæ, бахъуаджы сахат Медицинон академи æмæ Медицинон колледжы студенттæ ногæй кусын райдайдзысты рынчындæттæ æмæ поликлиникæты. Уымæй уæлдай, æлхæд цæуынц хъæугæ хостæ æмæ тесттæ…
Дарддæр республикæйы хицаудзинады оргæнты минæвæрттæ радзырдтой, амæйразмæйы æмбырдты цы амынддзинæдтæ райстой, уыдон æххæст кæныны тыххæй. Афтæ, культурæйы министры хæстæ рæстæгмæ æххæстгæнæг Къубалты Эльбрус фехъусын кодта, бæхты театр «Нарт»-ы рацарæзты проект бацæттæ кæныны фæдыл техникон хæслæвæрд. Йæ ныхасмæ гæсгæ, ацы къуырийы объекты рацарæзты фæдыл расиддзысты æмбæлгæ конкурсон процедурæтæ.
Уый фæстæ æмбырды раныхас кодта республикæйы экономикон рæзты министр Кучиты Зауыр. Ведомствæйы разамонæг куыд загъта, афтæмæй ныридæгæн цæттæ сты Горæтгæрон æмæ Мæздæджы районты рæзты программæты проекттæ. Уыцы программæты проекттæм ныридæгæн æркастысты РЦИ-Аланийы Хицауады уæнгтæ. Ныр уыцы документтæ бавдисын хъæуы Уæрæсейы Экономикон рæзты министрадмæ, цæмæй сæ царды рауадзынæн æххуыс уа федералон Хицауады ‘рдыгæй.
Цæгат Ирыстоны Хицауады Сæрдары фыццаг хæдивæг Æгъуызарты Мурат йæ раныхасы куыд фæбæрæг кодта, афтæмæй республикæйы дарддæр цæуы æнæзмæлгæ исбонад æмæ зæххы хæйтты инвентаризаци. Æгъуызары-фырты ныхасмæ гæсгæ, æппæт 60 мин объектæй 2022 азы 1 январмæ кадастрон хыгъдмæ бахастой 7 200 объекты. Фæлæ профилон ведомствæты минæвæрттæ куыд зæгъынц, афтæмæй ацы куыстмæ муниципалитеттæ фаг æргом нæма раздæхтой. Республикæйы Сæргълæууæг муниципалитетты бæрнон кусджытæн бахæс кодта, цæмæй фарстамæ бæрнондæр цæстдард равдисой. Йæ ныхасмæ гæсгæ, инвентаризацимæ уæлæнгай цæстæй чи кæсы, уыцы чиновникты бафхæрдзысты.
Аппаратон æмбырды архайджытæ æрдзырдтой æндæр ахсджиаг фарстатыл дæр.
РЦИ-Аланийы
Сæргълæууæджы æмæ Хицауады
пресс-службæ
