Адыууæ азы цæгатирыстойнаг скъолаты бындурон цалцæг æмæ техникон ифтонгдзинадæн федералон бюджетæй дихгонд æрцæудзæн 3,5 миллиард сомы бæрц.
Амынд фæрæзтæ регионæн радих кæндзысты «Ахуырады рæзты» сæрмагонд паддзахадон программæйы фæлгæты (зындгонд куыд у, афтæмæй ацы документ фидаргонд æрцыд Уæрæсейы Президент Владимир Путины хъæппæрисæй æмæ æххæстгонд цæудзæн 2022-2026 азты).
Регионалон профилон ведомствæты хъусынгæнинагмæ гæсгæ, бæстæйы субъектты куырдиæттæм æркæсгæйæ, федералон центр сфидар кодта иумæйагахуырадон скъолаты бындурон цалцæгæн хъæугæ фæрæзтæ дих кæныны фæтк. Уыцы фæткмæ гæсгæ, Цæгат Ирыстонæн 2022-2023 азты радих кæндзысты 3,5 миллиард сомы бæрц. Уыимæ, программæйы уагæвæрдтæ æххæстгонд цæудзысты æмæфсисады фæткы бындурыл, ома, федералон центры хæрдзтæм сæхи хай хæсдзысты регионалон бюджеттæ дæр.
Цæгат Ирыстоны Ахуырад æмæ наукæйы министрады минæвары ныхасмæ гæсгæ, программæйы фæлгæты адыууæ азы бындурон цалцæггонд æрцæудзысты 63 ахуырадон кусæндоны: 14 скъолайы — Дзæуджыхъæуы, фæйнæ 10 скъолайы — Мæздæджы, Рахизфарсы æмæ Горæтгæрон районты, 6 — Æрыдоны районы, фæйнæ 4 — Дыгуры, Кировы æмæ Æрæфы районты, 1 скъола — Алагиры районы.
Кæй зæгъын æй хъæуы, скъолаты бындурон цалцæджы мадзæлттæ æххæст кæнгæйæ, æппæт ахуырадон кусæндæттæ дæр ифтонггонд цæудзысты террористон фæзындтытæй æмæ зынгсирвæзтытæй æдасдзинады нырыккон системæтæй. Уымæй уæлдай, программæйы фæлгæты сæрмагонд фæрæзтæ дихгонд цæудзæн ахуырадон процессæн хъæугæ техникæ æмæ хæдзары дзаума.
Зæгъын хъæуы, республикæйы ахуырады къабазы рацарæзты программæйыл РЦИ-Аланийы Сæргълæууæг Сергей Меняйлойы амынддзинадмæ гæсгæ кусы Ахуырад æмæ наукæйы регионалон министрад. Уыимæ, программæйы сæрмагонд æргом здæхт æрцыд, иумæйаг ахуырадæй уæлдай, скъолайы агъоммæ, профессион æмæ уæлæмхасæн ахуырады дæлкъабæзты райрæзтмæ дæр.
Нæ уацхæссæг
