РЦИ-Аланийы Хицауады Сæрдар Дзанайты Барис муниципалитеттæм йæ кусæг балцы рæстæг раиртæста, Æрыдон æмæ Горæтгæрон районты æрдзон фыдбылызты фæстиуджытæ куыд иуварсгонд цæуынц, уый.
Зындгонд куыд у, афтæмæй ивгъуыд фæлладуадзæн бонты тыхджын къæвдатæ æмæ ихуард рацыд цалдæр хъæууон районыл. Уыцы фыдбылызты фæстиуджытæ аиуварс кæныны фарстатыл бæстон ныхас рауад хуыцаубоны сæрмагонд хицауадон къамисы æмбырды. Уæд Цæгат Ирыстоны Сæргълæууæг Сергей Меняйло бæлвырд амынддзинæдтæ радта профилон ведомствæтæ æмæ районты администрациты разамонджытæн, цæмæй æвæстиат мадзæлттæ саразой уавæр банывыл кæнынæн.
Æмæ ныр Дзанайты Барис бынаты мидæг сбæлвырд кодта, æрдзон фыдбылызы фæстиуджытæ иуварс кæныны нысанимæ цы мадзæлттæ арæзт цæуы, уый.
Хицауады Сæрдар йæ кусæг балц райдыдта Хъæдгæроны хъæуæй. Æрдзон фыдбылыз бынæттон адæмæн сæ хæдзæрттæ бахъыгдардта. Ацы бонты хъæдгæройнæгтæй бирæтæ ивынц сæ хæдзæртты сæртæ. Хъæуы бынæттон администрацийы хицау Гуытъиаты Юри куыд радзырдта, афтæмæй хъæуы цæрджытæн æххуысы хуызы ныридæгæн лæвæрд æрцыд 930 шиферы. Уыимæ, уыцы нымæц фаг нæу æппæт хъыгдард хæдзæртты сæртæ бадзæбæх кæнынæн. Бахъæудзæн ма 1 мин шиферы бæрц.
— Районты разамонджытæн хæсгонд æрцыд, цæмæй цыбырдæр æмгъуыдтæм бабæстон кæной хъæугæ арæзтадон æрмæджыты бæрцытæ. Уыцы куыст абоны онг чи нæма бакодта, уыдонæй курæг дæн, цæмæй æппæт бæрæггæнæнтæ дæр бабæстон кæной æмæ сæ бадæттой профилон республикон ведомствæтæм. Хъыгдард чи баййæфта, уыцы адæмы фарсмæ балæууын у нæ фыццаградон хæс, — бафиппайдта Дзанайты Барис.
Дарддæр инспекцион къорды уæнгтæ ацыдысты Æрыдонмæ. Уым Алагираг уынджы бирæфатерон цæрæн хæдзарæн ивынц йæ сæр. Æрыдоны горæты администрацийы разамонæг Хæмыцаты Игор куыд радзырдта, афтæмæй амынд куыстытæн бахъæудзæн цалдæр боны. Уыимæ, аразджытæ абоны онг хæдзармæ ногæй бауагътой электрон тых æмæ дон.
Уый фæстæ Хицауады Сæрдар уыд Цæгат Кавказы аграрон-технологон колледжы. Уыцы ахуырадон кусæндоны æрмадзтæй дæр иу хъыгдард баййæфта. Агъуысты сæр раивынæн бахъæудзæн 1,8 милуан сомы бæрц. Фарста алыг кæныны нысанимæ Дзанайты Барис бæлвырд амынддзинæдтæ радта республикон ведомствæты разамонджытæн.
Уырдыгæй Хицауады Сæрдар йæ фæндаг акодта Горæтгæрон районмæ. Уыцы муниципалитеты Дзанайты Барис базонгæ Æрхонкæйы станицæйы 6-æм рæвдауæндоны, Октябрыхъæуы Тедеты Павелы уынджы бирæфатерон цæрæн хæдзар æмæ æндæр объектты уавæримæ. Горæтгæрон районы администрацийы сæргълæууæг Есиаты Руслан бæстон радзырдта, æрдзон фыдбылызы фæстиуджытæ куыд иуварсгонд цæуынц, уый тыххæй.
РЦИ-Аланийы Сæргълæууæджы
æмæ Хицауады пресс-службæ
