Знон Хетæгкаты Къостайы номыл Цæгат Ирыстоны паддзахадон университеты йæ куыст райдыдта æрыгон иртасджыты дунеон скъола-конференци «Кавказ ивгъуыд æмæ ныры заманы: истори, археологи, культурæ».
Цæгат Ирыстоны гуманитарон æмæ социалон иртасæнты институты конференци 2017 азæй у традицион, ныр та арæзт æрцыд ЦИПУ-йы бындурыл.
— Сæйраг у наукæйы бæрæгбон. Йæ фæлгæты нæ алы хатт фæфæнды исты ахсджиаг мадзал скæнын. Уый фæдыл ацы конференци байгом наукæйы бон æмæ «Нартиадæ»-йы кадæн. Йæ сæйраг нысаниуæг — хистæр иртасджытæ сæ фæлтæрддзинад адæтдзысты æрыгæттæм æмæ сын бацамондзысты наукон рæзынады фæндаг. Иннæ миниуæг — академион наукæ бацыд университетмæ. Ныр студенттæн сæ бон у дæсны профессортимæ æмгуыст кæнын. Ахуыргæнæг хъомыл кæны йæхицæн ахуырдзау, цæмæй йын фидæны йæ куыст æххæст кæна, — загъта историон факультеты декан Плиты Зæлинæ.
Конференцийы архайынц Мæхъæл, Цæцæн, Кæсæг-Балхъар, Хуссар Ирыстоны студенттæ. Хистæр фæлтæры иртасджытæ скодтой мастер-класстæ, бацамыдтой, цы наукон къæпхæнты архайынц, уый. Зæгъæм, профессор Цыбырты Людвиг иртасы Нарты кадджытæ æмæ радзырдта Ирон нартиадæйы энциклопедийы тыххæй.
— Ацы конференцийы иумæйагæй иртасæм истори, археологи æмæ культурæ, йæ фæлгæты та ис алыхуызон секцитæ, уыдонæй иу дзуапп дæтдзæн Хуссар Ирыстоны социалон, политикон æмæ культурон аспекттæн. Ахæм мадзалы фыццаг хатт нæ архайын. Бузныг зæгъын ахæм æмгуыстады тыххæй, æмæ мæ фæнды, цæмæй ахæм наукон конференцитæ Хуссар Ирыстоны дæр фæзыной, — загъта Уанеты Захары номыл Хуссар Ирыстоны наукон-иртасæн институты экономикон æмæ социологон иртæстыты хайады сæрдар Джабиты Вячеслав.
Конференцийы темæтæ сты алыхуызон, райдай «Тамерланы балц Аланыстоныл»-æй æмæ Цæгат Кавказы экстремизмы фарстайы онг. Дыууæ боны дæргъы æрыгон наукон иртасджытæ ныхас кæндзысты Кавказы историйыл, хистæр фæлтæры иртасджытæ та сын бацамондзысты сæ куысты аиппытæ æмæ сын сæ фæлтæрддзинадæй фæхай кæндзысты. Кæронбæттæны хуыздæр куыстытæ мыхуыргонд æрцæудзысты Цæгат Ирыстоны гуманитарон æмæ социалон иртасæнты институты рауагъдæтты.
Гобозты Агуындæ
Къамтæ систа
Хъайырты Дианæ
