Уæрæсейы Экономикон рæзты министрады цы уæрæх æмбырд уыд, уый архайджытæ æркастысты Цæгат Кавказы федералон зылды субъектты промышленнон хъомыс нывылдæр кæныны фарстатæм. Федералон министры хæдивæг Сергей Назаров сæрдариуæг кæм кодта, уыцы æмбырды Цæгат Ирыстонæй архайдта РЦИ-Аланийы Хицауады Сæрдар Дзанайты Барис.
Сергей Назаров куыд фехъусын кодта, афтæмæй Экономикон рæзты министрады, паддзахадон корпораци «Кавказ.РФ» æмæ æндæр федералон структурæты минæвæрттæ кæм архайдзысты, ахæм сæрмагонд кусæг къорд хæстæгдæр рæстæг æркæсдзæн Цæгат Кавказы федералон зылды регионты куыстуæтты уавæрмæ. Аргъгонд æрцæудзæн алкæцы куыстуатæн дæр йæ ныртæккæйы уавæрæн, эксперттæ сæ фæндæттæ бахæсдзысты амынд компаниты архайд фæхъомысджындæр кæнынæн. Сæрмагонд æргом здæхт æрцæудзæн промышленнон куыстуæтты инвестицион проекттæ æххæст кæнынмæ.
Экономикон рæзты министры хæдивæджы ныхасмæ гæсгæ, æппæт уыцы мадзæлттæ фадат ратдзысты, цæмæй промышленнон куыстуæттæн бæлвырд фæткы бындурыл лæвæрд цæуа уæлæмхасæн паддзахадон æххуыс. Уыимæ, куыд нысангонд цæуы, афтæмæй федералон министрады номхыгъдмæ бахæсдзысты алкæцы регионæй дæр хъомысджындæр 5 промышленнон куыстуаты. «Ахæм реестрмæ бахæсдзыстæм, ныртæккæ æппæт тыхтæй чи нæ кусы, фæлæ фидæны йæ инвестицион хъомыс раргом кæнынæн хъарутæ кæмæ разына, ахæм куыстуæттæ дæр», — загъта Сергей Назаров.
Æмбырды архайджытæ æрдзырдтой бæлвырд куыстуæттыл. Зæгъæм, Цæгат Ирыстон федералон кусæг къорды уæнгты базонгæ кæндзæн акционерон æхсæнадтæ «Алагиры сопротивлениты завод»-ы, «Магнит»-ы», «Кетон»-ы, «Крон»-ы, «Электроконтактор»-ы, «Мæздæггаг нывæфтыдтæ» æмæ «Уæлæдарæс»-ы фадæттимæ. Дзанайты Барис сæрмагондæй фæбæрæг кодта Дзæуджыхъæуы вагæттæ цалцæггæнæн заводы. Йæ ныхасмæ гæсгæ, компани кусы акционерон æхсæнад «Уæрæсейы æфсæнвæндæгтæ»-йы сконды, фæлæ йæм фаг заказтæ нæй. Уыимæ, лыггæнинаг у куыстуаты техникон модернизацийы фарста дæр.
«Дарддæры райрæзты нысантыл дзургæйæ, сæрмагонд æргомы аккаг у раздæры завод «Электроцинчы» фæзуат. Уыцы куыстуаты бæстыхæйтты энергетикон ифтонгад æмæ транспортон инфраструктурæйы уавæр фадат дæттынц, цæмæй уым фидæны фæзына индустриалон парк», — бафиппайдта Дзанайы-фырт.
Æппæт уыцы фæндæттæ УФ-йы Экономикон рæзты министрады специалисттæ фæбæрæг кодтой, æмæ зæрдæ бавæрдтой, сæрмагонд федералон кусæг къорды уæнгты бæрны сæ кæй бакæндзысты, уымæй.
Æмбырдæн хатдзæгтæ кæнгæйæ, федералон кусæг къорды уæнгтæ хицæнæй бабæрæг кæндзысты федералон зылды алкæцы регион дæр. Уыцы архайды фæстиуæгæн алкæцы куыстуаты архайды фæдыл дæр ратдзысты амынддзинæдтæ.
РЦИ-Аланийы
Сæргълæууæджы æмæ Хицауады
пресс-службæ
