Цӕгат Ирыстоны ахуырады кусджыты дӕсныдзинад бӕрзонддӕр кӕныны институты хъӕппӕрисӕй знон байгом ирон ӕвзаджы ахуыргӕнджыты ‘хсӕн фыццаг олимпиадӕ. Мадзал цымыдисаг уымӕй уыд, ӕмӕ дзы архайдтой канд скъолайы ахуыргӕнджытӕ нӕ, фӕлӕ уӕлдӕр ахуырады ахуыргӕнджытӕ ӕмӕ студенттӕ дӕр.
Цымыдисаг уыдысты фарстытӕ дӕр ӕмӕ куысты хуыз дӕр. Цӕттӕ сӕ кодтой институты кусджытӕ, фӕлӕ бӕлвырд фарстытӕ бацӕттӕ кодтой ахуыргӕндтӕ — ахуыргӕнджытӕн, ахуыргӕнджытӕ — ахуыргӕнджытӕн, студенттӕ — ахуыргӕнджытӕн.
— Ацы бӕрӕгбон ерысы хуызӕн ма банкъарут, ай у ӕцӕг бӕрӕгбон — зонды, уды, кӕрӕдзиимӕ фембӕлыны бӕрӕгбон — циндзинады бон. Мӕнӕй йӕ хуыздӕр зонут, «предмет» «ахуыргӕнӕг»-ы синоним кӕй у, уый. Ахуыргӕнӕгмӕ удгоймагмӕ кӕсӕгау нӕ кӕсынц, фӕлӕ, цы предметыл кусы, уымӕ гӕсгӕ. Мах нӕ предмет куы нӕ зонӕм, уӕд ничи зӕгъдзӕн: «Мӕнӕ ацы ахуыргӕнӕгӕн йӕ зонындзинӕдтӕ фаг не сты», фӕлӕ зӕгъдзысты: «Мӕнӕ ирон ӕвзаг ницӕйаг у». ӕмӕ ирон ӕвзаг ницӕйаг кӕм у, уым ирон адӕм фӕстӕзад сты. Уымӕ гӕсгӕ, махӕн ис бар хуыздӕр уӕвынӕн бакастӕй дӕр, зондӕй, удӕй, алцӕмӕй дӕр. ӕппӕт технологитӕ уӕ бӕрны сты ӕмӕ сымахӕн бар ис уыдонӕй, иннӕтӕй хуыздӕр пайда кӕнын. ӕз ӕй зонын, сымах иннӕтӕй разӕнгарддӕрӕй кӕй фӕкусут ӕмӕ размӕдзыддӕр кӕй стут, уый. Уымӕн ӕвдисӕн, ахуыргӕнджытӕн цы ерыстӕ скӕнынц, уыдоны ӕппӕты арӕхдӕр уӕлахиздзаутӕ кӕй вӕййынц ирон ӕвзаг ӕмӕ литературӕйы ахуыргӕнджытӕ, — раарфӕ кодта архайджытӕн филологон наукӕты кандидат Куыдзойты Анжелӕ.
Олимпиадӕйы фыццаг хайы фарстытӕ уыдысты фысгӕйӕ, дыккаг хай уыд дзургӕйӕ. Кӕронбӕттӕны хуыздӕр дзуапп чи радта, уыдоны нӕмттӕ загъд ӕрцыдысты, олимпиадӕйы архайджытӕн ӕрвыст ӕрцӕудзӕн электронон сертификаттӕ.
Гобозты Агуындӕ,
къамтӕ систа Хъайырты Динанӕ
