Презентацийы хуызы ирон кафтӕй байгом Бетъырбухы Дунеон экономикон форумы нӕ республикӕйы стенд. Мадзалы архайдтой РЦИ-Аланийы Сӕргълӕууӕг Сергей МенЯйло, РЦИ-Аланийы Хицауады Сӕрдар Дзанайты Барис ӕмӕ РЦИ-Аланийы экономикон рӕзты министр КуЧиты Зауыр.
Мариинаг театры Цӕгат Ирыстоны филиалы артисттӕ равдысты уазджытӕн бацӕттӕ кодтой этникон хуызы чысыл концертон программӕ. Йӕ ӕвӕрӕг-режиссер Суанты Валери, афтӕмӕй. Ирон кафты дӕснытӕ равдыстой нӕ республикӕйы ивгъуыд ӕмӕ абоны царды уаг, национ бакаст кӕй хонынц, уый ахадындзинад нырыккон ӕхсӕнады. Кафты рӕстӕг форумы уазджытӕ кастысты видеобастдзинады Ирыстоны алӕмӕты ӕрдз ӕмӕ ӕвӕджиауы архитектурон цыртдзӕвӕнтӕм, промышленност ӕмӕ экономикӕйы нырыккон объекттӕм.
Равдыст байгом кӕныны рӕстӕг уазджытӕ стыр аргъ скодтой, сӕрмагондӕй Бетъырбухаг экономикон форуммӕ Цӕгат Ирыстон цы концепцийыл бакуыстой «Де ‘ргом раздах Ирыстонмӕ», зӕгъгӕ, уыцы проектӕн. Уазджытӕн фадат уыдис, нӕ республикӕ нын куыд ӕмӕ цас зонынц, уыцы зонындзинӕдтӕ сбӕрӕг кӕнынӕн онлайн-хъазты фӕрцы равдисын: РЦИ-Алани пазлы хуызы сӕмбырд кӕнын ӕмӕ виртуалон балцы ацӕуын нӕ республикӕйы сӕйрагдӕр туристон бынӕттӕм, саходын ирон хӕринӕгтӕ ӕмӕ зӕрдылдарынӕн къам сисын.
Бетъырбухаг Дунеон экономикон форум цӕуы 14 июнӕй 17 июнмӕ. Йӕ сӕйраг темӕ та у «Хӕдбар рӕзт — рӕстаг дунейы бындур. Нӕ тыхтӕ баиу кӕнӕм фидӕны фӕлтӕрты хӕрзамондӕн». Программӕмӕ бахастой, мин модератор ӕмӕ спикерӕй фылдӕр кӕм архайынц, ахӕм 140 мадзалы. Форум нымад цӕуы дунейы ӕппӕты егъаудӕр цаутӕй иуыл. 26 азмӕ йын бантыст, экономикӕйы нывыл рӕзтӕн глобалон ахсджиаг фарстатыл ныхас кӕныны ӕмӕ дунейы хуыздӕр фӕлтӕрддзинӕдтӕй спайда кӕнынӕн егъау ӕмӕ раззагдӕр фӕз саразын. Бындур ӕвӕрд ын ӕрцыд 1997 азы, 2006 азӕй та арӕзт цӕуы нӕ бӕстӕйы Президент Владимир Путины разамындӕй.
Форумы программӕты ӕркӕсдзысты уӕрӕсейаг экономикӕйы егъау ахсджиаг хъуыддӕгтӕ ӕмӕ технологиты рӕзты социалон фарстатӕм.
Саутӕты Тамилӕ
