Цыбырты Людвиг у паддзахадон ӕмӕ ӕхсӕнадон архайӕг, историон наукӕты доктор, профессор, Хуссар Ирыстон, Цӕгат Ирыстон ӕмӕ УФ-йы наукӕйы сгуыхт архайӕг, Хетӕгкаты Къостайы номыл паддзахадон премийы лауреат.
Цыбырты Людвиг ныффыста 400 наукон куыстӕй фылдӕр. Йӕ куыстыты сӕйрагдӕр у Нарты эпос. Наукон иртасӕн ӕмӕ объективон историзмы принциптыл ӕнцой кӕнгӕйӕ, уый ирон нартзонынады ныффидар кодта эпосы индоирайнаг равзӕрды хъуыды, эпосы кавказаг вариантты системон иртасӕныл, нартиадӕйы мифологон ратӕдзӕнтӕ ӕмӕ ареалон бастдзинӕдтыл.
Цыбырты Людвигӕн йӕ 90 азы юбилеймӕ рацыд чиныг «Цыбырты Людвиг. 90 азы». Чиныджы разныхасы чиныгаразӕг, УФ-йы Журналистты цӕдисы уӕнг Андрей Донченко фыссы: «Чиныг рауади хуызӕнӕн. Иу ран ӕрӕмбырд кодтам ӕппӕт арфӕтӕ ӕмӕ фӕндиӕгтӕ. Уыдон зӕлыдысты Ирон театры Цыбырты Людвиджы 90 азы юбилейы.
Йӕ наукон ӕнтыстдзинӕдтӕ, ныртӕккӕйы наукон архайд цымыдис кӕны бирӕты. Цыбырты Людвиг у диссаджы адӕймаг. Йӕ митӕ, йӕ архайдӕй ӕвдисы, мах ацы дунемӕ президенттӕ, ректортӕй кӕй не ‘рцӕуӕм, фӕлӕ, фыццаджыдӕр, адӕймӕгтӕй. Уый адӕймаджы ном сыгъдӕгӕй хӕссы ацы царды. Гӕнӕн ӕмӕ амалӕй ӕххуыс кӕны йӕ адӕмӕн, йӕ бӕстӕйӕн.
Чиныджы мыхуыргонд ӕрцыдысты, Цыбырты Людвиджы тыххӕй Ирон театры йӕ арфӕйы ныхӕстӕ чи загъта, уыдоны раныхӕстӕ. Уыдон сты: РЦИ-Аланийы Хицауады Сӕрдар Дзанайты Барис, Республикӕ Хуссар Ирыстоны Президент Гаглойты Алан, РЦИ-Аланийы Парламенты Сӕрдар Тускъаты Таймураз, Республикӕ Хуссар Ирыстоны Парламенты Сӕрдар ӕлборты Алан, физикон-математикон наукӕты доктор, профессор Къусраты Анатоли, Хуссар Ирыстоны паддзахадон университеты ректор Тедеты Вадим ӕмӕ бирӕ ӕндӕртӕ.
Чиныджы мыхуыргонд ӕрцыдысты Уӕрӕсейаг наукӕты академийы историон-филологон наукӕты хайадӕй, УФ-йы Наукӕ ӕмӕ уӕлдӕр ахуырады министрадӕй, Уӕрӕсейы Наукӕты академийы вице-президент В. Панченкойӕ ӕмӕ, ӕндӕр рӕттӕй цы арфӕйы фыстӕджытӕ ссыд, уыдон.
Ноджыдӕр Цыбыры-фырты цард, ӕхсӕнадон ӕмӕ наукон архайды тыххӕй ахуыргӕндты докладтӕ ӕмӕ раныхӕстӕ, ахуыргонды мыхуыры фӕрӕзты цы фӕзынд, уыдон. Людвиджы номыл дзы ис поэтикон уацмыстӕ дӕр.
Абайты Эдуард
