РЦИ-Аланийы Хицауады Сæрдар Дзанайты Барис сарæзта оперативон штабы уæнгты æмбырд Запорожьейы облæсты Черниговаг районы бынæттон хицауады оргæнтимæ экономикон æмæ социалон-экономикон къабæзты куыст рацаразыны тыххæй.
Дзанайы-фырт æмбырды архайджыты зæрдыл æрлæууын кодта, сæрмагонд инфраструктурон проекты фæлгæты Уæрæсейы Федерацийы ног регионты хъæутæ æмæ горæтты рацарæзт кæй цæуы, уый. Регионтыл бафидар кодтой хицæн фæзуæттæ. Цæгат Ирыстон æххуыс кæны Запорожьейы облæсты Черниговаг районæн.
«РЦИ-Аланийы Сæргълæууæг Сергей Меняйлойы фæдзæхстмæ гæсгæ мах скодтам рацаразæн куыстыты пълан. Абоны онг уал нæ къухы стыр хъуыддæгтæ бафтыд: сцалцæг кодтам æртæ скъолайы æмæ иу рæвдауæндон, поселок Черниговкæйы ссыгъдæг кодтам донцъирæн зыхъхъыр. Уымæй уæлдай ма, пъланмæ уæлæмхасæн кæй бахастам, ахæм донцъирæн объектты модернизаци», — загъта премьер-министр.
Республикæйы Бындурон арæзтады управленийы хицауы хæдивæг Хъесаты Лазо радзырдта, ахуырадон уагдæттæ цалцæг кæныны тыххæй сæ размæ æвæрд хæстæ куыд сæххæст кодтой, уый тыххæй. Уый загъта, дысвæлдæхтæй кæй бавнæлдтой цалцæджы куыстытæм, æмæ сын бирæ бантыст. Уый руаджы 1 сентябры ахуырдзаутæ скъолатæм бацыдысты, сабитæ та — рæвдауæндонмæ.
Цæрæнуатон-коммуналон хæдзарады, артаг æмæ энергетикæйы министр Таматы Майрæн та поселок Черниговкæйы донцъирæн зыхъхъыр куыд ссыгъдæг кодтой, уыимæ базонгæ кодта æмбырды архайджыты. Министр ма радзырдта, дарддæр цы архайынмæ хъавынц пъланмæ гæсгæ, уый тыххæй. Цæрæнуатон-коммуналон хæдзарадæн Черниговаг районмæ арвыстой хъæугæ ифтонггæрзтæ.
Ахуырад æмæ наукæйы министр Алыбегты Эллæ загъта, тынг æнгом æмгуыстад кæй кæнынц Запорожьейы облæсты Ахуырады министрадимæ æмæ кæй сифтонг кодтой Черниговаг районы ахуырадон уагдæттæ литературæ, цæстуынгæ æрмæг æмæ алыхуызон хъæугæ скъæппытæй.
— Мах балхæдтам æмæ сын арвыстам 4,5 мин ахуыргæнæн æмæ æххуысгæнæн чиныджы 1-æмæй 11-æм кълæстæм. Балхæдтам скъæппытæ, хæринаггæнæн блоктæн — ифтонггæрзтæ, спортивон уæлæдарæс æмæ спортæй архайынæн дзаумæттæ, оргтехникæ, къæнцыларон товартæ. Тынг нæ фæбузныг сты уыцы æххуысæй, — загъта министр.
Дзанайты Барис оперативон штабы уæнгтæн бафæдзæхста дарддæр дæр уыцы æххуыс ахæццæ кæнын. Сæрмагондæй Цæрæнуатон-коммуналон хæдзарады, артаг æмæ энергетикæйы министрадæн хæсгонд æрцыд Черниговаг районмæ арвитын авариты ныхмæ архайæг бригадæ фæззыгон-зымæгон хъармгæнæн афонмæ сæ бацæттæ кæныны тыххæй. Аваритæ иуварсгæнæн машинæ уал сæм ныридæгæн æрвыст æрцыд. “Курын уæ, æмæ уæ цæст æнæсцухæй дарут Черниговаг районæн æххуыс кæныны фарстатæм”, — балхынцъ кодта йæ ныхас премьер-министр.
РЦИ-Аланийы
Сæргълæууæджы æмæ Хицауады
пресс-службæ
