РЦИ-Аланийы Сæргълæууæг Сергей Меняйло архайдта, «Скъолайы хæрæндоны хуыздæр хæринаггæнæг»-ы конкурсы уæлахиздзаутæн хæрзиуджытæ радтыны хъуыддаджы. Куыд ма хъусын кодтам, афтæмæй республикæйы цыд æппæтуæрæсеон конкурс «Скъолайы хуыздæр хæрæндон». Кадджын мадзал скодтой Ирон театры бæстыхайы.
Цæгат Ирыстонмæ ссыдысты бæстæйы 68 регионæй скъолаты хæринаггæнджытæ, фæндыд сæ кулинарон быцæуы бацархайын. Æдæппæтæй — 400 дæсныйы. Сæ цуры æрбалæууынмæ Мæскуыйæ ссыд Уæрæсейы рухсады министры фыццаг хæдивæг Александр Бугаев, Паддзахадон Думæйы депутат Эльвирæ Аиткулова, Паддзахадон Думæйы зæххы фарстаты комитеты сæрдары хæдивæг Владимир Плотников, «Къабазы хойраджы институт»-ы вице-премьер Сергей Маслов, регионалон ведомствæты разамонджытæ.
Уазджытæ æмæ республикæйы разамонæг базонгæ сты дæсны хæринаггæнджыты куыстытимæ. Скъолаты хæринаггæнджыты хойраджы равдыст скодтой Ирон театры рахизæны. Уæрæсейы регионтæ рахастой скъолайы менюйы хуыздæр æмæ хæрзаддæр хойраг.
Уый фæстæ та ралæууыд уæлахиздзаутæн хæрзиуджытæ дæттыны рæстæг. Сергей Меняйлойы ныхасмæ гæсгæ, Уæрæсейы Президент Владимир Путин рахаста райдайæн скъолайы ахуырдзаутæн хæринаг лæвар дæттыны уынаффæ. «Регионты размæ лæууыд цалдæр ахсджиаг фарстайы: хæринаггæнæнтæ сцалцæг кæнын, хойраджы комбинаттæ саразын æмæ æндæртæ. Абон лæвар хойраг исæг сывæллæтты нымæц рæзы, уæдæ сын сæ бынæттон хомагæй кæй цæттæ кæнынц, уый дæр хорз у. Равдыстмæ бакастæн æмæ федтон, нæ бон ма цæуыл сахуыр кæнын у, уыдæттæ. Ахæм дæсныйады зилдух тынг пайда у», — загъта РЦИ-Аланийы разамонæг.
«Скъолайы хуыздæр хæринаггæнæг»-ы нæмттæ райстой Евгений Толкачев (Тамбовы облæст), Иринæ Поротикова (Хъырымы Республикæ), Артем Гриц (Бетъырбух) — рацыдысты æртыккаг бынатмæ. Дыккаг бынæттæм рацыдысты Татьянæ Гуляева (Самарæйы облæст) æмæ Георгий Ковылев (Краснодары край). Конкурсы уæлахиздзаутæ систы Æмбалты Зауыр (Алагиры скъола-интернаты хæринаггæнæг) æмæ Юлия Лямина (Ленинграды облæст). Æмбалты Зауырыл цæуы 19 азы, хæринаггæнæгæй кусы, йæхæдæг кæй фæцис, уыцы скъола-интернаты.
Æппæтуæрæсеон конкурс «Скъолайы хуыздæр хæрæндон» конд цæуы æрвылаз дæр, йæ саразджыты фæнды зонын, уæддæр ахуыргæнæндæтты хъарм хойраг куыд цæттæ кæнынц, сабитæ йæ куыд хæрынц, хæрæндæтты чи кусы, уыцы дæсныты цæттæдзинад æмæ æндæр фæзилæнтæ. Конкурс конд цыд цалдæр фæзыл: гимназ «Диалог», 44-æм æмæ 28-æм скъолаты, Базарадон-экономикон колледжы. Ацы хатт Цæгат Ирыстон ссис æппæт Уæрæсейы скъолаты хæринаггæнджыты ‘хсæн ерысты бынат.
Нæ уацхæссæг
