Форум “Уæрæсе”: экономикæйы, культурæ æмæ аивады райрæзтæн

0
256
8544316 27.10.2023 Баннер международной выставки-форума "Россия" на ВДНХ в Москве. Выставка пройдет с 4 ноября по 12 апреля на ВДНХ и позволит познакомить жителей и гостей страны с главными достижениями 89 субъектов РФ. Кирилл Зыков / Фотохост-агентство РИА Новости

Зындгонд куыд у, афтæмæй ноябры райдайæны Мæскуыйы кадджын уавæры байгом дунеон равдыст-форум «Уæрæсе». Адæмон хæдзарады æнтыстдзинæдты æппæтуæрæсеон центры фæзуæтты цы уæрæх равдыст цæуы, уым архайынц æппæт уæрæсейаг регионтæ, егъаудæр куыстадон æмæ амалхъомадон компанитæ, паддзахадон корпорацитæ æмæ æхсæнадон организациты минæвæрттæ. Форумы программæйы зынгæ бынат лæвæрд æрцæудзæн аивадон коллективтæ æмæ культурæйы къабазы иннæ архайджыты сфæлдыстадæн.
Уыцы уæрæх æмбырды зæрдиагæй архайы Республикæ Цæгат Ирыстон-Алани дæр. Форум байгом кæныны фæдыл кадджын æмбырды Цæгат Ирыстонæй архайдтой республикæйы Сæргълæууæг Сергей Меняйло, РЦИ-Аланийы Хицауады Сæрдары хæдивæг — Уæрæсейы Президенты цур Цæгат Ирыстоны Æххæстбарджын минæвар Игорь Барсков, УФ-йы Федерацийы Советы уæнг нæ республикæйæ Виталий Назаренко æмæ иннæтæ.
— Форум «Уæрæсе»-йы агъоммæ нæ республикæ стыр цæттæгæнæн куыст бакодта. Цæгат Ирыстоны экспозици æвдыст цæудзæн цалдæр тематикон декадæйæ — ахуырад, туризм, культурæ, горæтаг алфамбылай, спорт æмæ афтæ дарддæр. Дæс бонæй-дæс бонмæ экспозицитæ ивд цæудзысты амынд темæты бындурыл. Кинонывтæ æмæ æндæр цæстуынгæ æрмæджыты фæрцы равдысты архайджытæ базондзысты, иу кæнæ иннæ къабазы Цæгат Ирыстон цы æнтыстдзинæдтæ æвдисы, уыдон. Æппæт хъарутæй дæр бацархайдзыстæм Ирыстоны абоны цард æппæтвæрсыгæй равдисыныл, нæ хæдбындур культурæйы зынгæдæр хæзнатæ адæмы рæгъмæ рахæссыныл, цæмæй форумы архайджыты бафæнда республикæ бабæрæг кæнын æмæ бæстондæр базонгæ уæвын йæ адæмимæ, йæ алæмæты æрдзимæ, — уæд фæбæрæг кодта Сергей Меняйло.
Ахæм разныхасы фæстæ фысымтæ æмæ уазджытæ байгом кодтой республикæйы экспозици. Аив театрализацигонд равдысты архайдтой Бетъырбухы Мариинаг театры дзæуджыхъæуккаг филиалы артисттæ. Экспозицийы уазджытæн бацæттæ кодтой алыхуызон цымыдисаг мастер-класстæ, лекцитæ, фембæлдтытæ Цæгат Ирыстоны зындгонддæр минæвæрттимæ…
Фидæн азы Цæгат Ирыстон сбæрæг кæндзæн æртæ ахсджиаг историон цауы — Уæрæсеимæ баиу уæвыны 250 азы, Дзæуджыхъæуы 240 азы æмæ республикæйы автономийы 100 азы. Кæй зæгъын æй хъæуы, организатортæ бацархайдтой, цæмæй ацы юбилейтæ дæр уæрæх æвдыст æрцæуой ирыстойнаг экспозициты.
Иу ныхасæй, форум «Уæрæсе»-йы куыст йæ тæмæны бацыд. Республикæйы экономикон рæзты министр Мырыкаты Марат журналисттæн куыд радзырдта, афтæмæй нæ экспозицийы ныридæгæн ахицæн туризмы декадæ, ацы къуыри дзы цæуы спорты декадæ. 21 ноябрæй фæстæмæ та ирыстойнаг стендтæ лæвæрд æрцæудзысты ахуырады къабазæн, фæстæдæр та — культурæйæн…
Æмæ Ирыстонæн, æцæгæйдæр, ис, цы равдиса, уый. Уæлдайдæр та — культурæйы къабазы. Зæгъæм, равдыст байгом кæныны бонæй фæстæмæ Цæгат Ирыстоны экспозицийы зæрдиагдæр архайджытæй иу у адæмон кæфтыты мæскуыйаг ансамбл «Алани». Ацы аивадон коллективы ном дæрдтыл хъуыстгонд у. Йæ бындурæвæрæг æмæ аивадон разамонæг у нæ зындгонд æмæ курдиатджын æмзæххон, Цæцæны республикæйы адæмон артист Мурасты Тимур. Коллективы уæнгтæ сты Мæскуыйы скъолатæ æмæ уæлдæр ахуыргæнæндæтты ахуырдзаутæ æмæ студенттæ (æмткæй райсгæйæ, сæ нымæц у 100 адæймагæй фылдæр).
Ацы ансамбл алкæддæр свæййы бирæ æппæтуæрæсеон æмæ дунеон фестивалтæ æмæ æндæр сфæлдыстадон проектты архайæг. Йæ арæхстдзинадæн æвдисæн сты бирæ хæрзиуджытæ. Уыдоны нымæцы: Уæрæсейы Президенты Арфæйы фыстæг, ЮНЕСКО-йы орден хореографион аивадмæ стыр бавæрæны тыххæй, УФ-йы Мидхъуыддæгты министрады Кады грамотæ, Саха-Якутийы Сæргълæууæджы номæй кадджын нысан, РЦИ-Аланийы Сæргълæууæджы Кады грамотæ æмæ бирæ æндæртæ. Уыимæ, ансамблы æрыгон архайджытæй цалдæрæн саккаг кодтой «Цæгат Ирыстоны сгуыхт артисты» кадджын нæмттæ.
— Форуммæ цæттæгæнæг комитетæй нæм хуынды гæххæтт куы æрбарвыстой, уæд æм не ‘ргом аздæхтам. Кæй зæгъын æй хъæуы, æхсызгон нын уыд ахæм уæрæх равдысты архайыны фадат. Фыццаг бонæй фæстæмæ æвдисæм нæ аивад, Ирыстоны экспозицимæ цы бирæ адæм æрбацæуы, уыдонæн. Годжыцаты Изольдæйы æрмадзы нын цы зæрдæмæдзæугæ уæлæдарæс бахуыдтой, ууыл адæм сæ цæст æрæвæрынц. Уæдæ, не ‘рыгон артисттæ ирон адæмон кафты рæсугъддзинад æххæстæй равдисыныл дæр æнæвгъауæй бакусынц. Æмæ та дæрдтыл азæлы тыхджын къухæмдзæгъд, — радзырдта нын Тимур.
«Алани»-йы уæнгтæ сценæмæ куы рахизынц, уæд сæ аивадон разамонæг та йæхи адæмы астæумæ байсы æмæ лæмбынæг фæхъусы, æрыгон кафджыты арæхстдзинадæн цавæр аргъ фæкæнынц, уымæ. «Уæлдай цымыдисагдæр мын вæййы, ирон фæсивæды аивадæй дисы бацæугæйæ, æцæгæлон адæм нæ национ кæфтыты мидисы тыххæй фæрстытæ æвæрын куы райдайынц, уый. Æмæ мæ хъустыл ахæм фарст куы сæмбæлы, уæд алкæддæр бацархайын бæстон дзуапп радтыныл. Уыимæ сын иудадзыгдæр фæзæгъын: «Табуафси, Ирыстонмæ ацæут, мæ фыдыуæзæгимæ мын базонгæ ут! Уым æрмæст кæфтытæ нæ фендзыстут, фæлæ ма уæхиуыл банкъардзыстут ирон адæмы уазæгуарзондзинад». Æмæ дызæрдыг нæ кæнын, Ирыстоны экспозицийы уазджытæй бирæтæ фидæны Ирыстонмæ кæй абалц кæндзысты, ууыл», — йæ хъуыды раргом кодта Мурасы-фырт.
Дарддæр нын ансамблы аивадон разамонæг куыд радзырдта, афтæмæй хæстæгдæр рæстæг артисттимæ бакусдзæн ног цалдæр кафтыл дæр. Уыимæ, бацархайдзысты, цæмæй ног сценикон композицитæ равдисой форум «Уæрæсе»-йы уазджытæн дæр.
Æмæ ма иу хъуыды. Фидæн азы ансамбл «Алани»-йыл æххæст кæны 30 азы. Тимуры ныхасмæ гæсгæ, уыцы юбилеймæ аккаг хуызы бацæттæ кæныныл куыст ныридæгæн райдыдта. Куыд нысангонд цæуы, афтæмæй юбилейон мадзæлтты сæйрагдæр суыдзæн стыр гала-концерт.
Фыццаг бакастæй 30 азы бирæ нæу. Фæлæ уыцы цыбыр æмгъуыдмæ дæр бирæ арфæйаг хъуыддæгтæ саразæн ис — национ хореографийы хæдбындур хæзнатæ адæмы рæгъмæ хæссын, дæ чысыл Райгуырæн бæстæйæн ном кæнын, аивады ирддæр бæрзæндтæм схизын… Æмæ æппæт уыцы нысантæ ансамбл «Алани»-йы къухы иудадзыгдæр æфтынц. Мурасты Тимур æмæ йæ коллективы уæнгтæн нæ зæрдæ зæгъы ноджы стырдæр æнтыстдзинæдтæ!
Сланты Аслан

ОСТАВЬТЕ ОТВЕТ

Please enter your comment!
Please enter your name here