Адæмон программæ æххæст кæнынц

0
49

Уæрæсейы Æдасдзинады Советы Сæрдары хæдивæг, политикон парти «Иугонд Уæрæсе»-йы Сæрдар Дмитрий Медведев сæрдариуæг кæм кодта, Мæскуыйы ацæуæг ахæм æмбырды архайджытæ «Иугонд Уæрæсе»-йы адæмон программæйы æххæсткæнынады бæрæггæнæнтæ бахыгътой.

— Фарон адæмон программæйы уагæвæрдты нæуæдз æхсæз проценты æххæстгонд æрцыдысты. Нæ бæстæ зындзинæдтыл кæд æмбæлы, уæддæр нæ куысты хæстæ æххæст кæнæм. Нæ ныхасæн хицау кæй стæм, уый адæмæн æвдисæм, — фæбæрæг кодта Дмитрий Медведев.
Куыд загъта, афтæмæй фарон декабры ацæуæг партион съезды архайджытæ рахастой Уæрæсейы Президенты æвзæрстытæм Владимир Путины кандидатурæ бавдисыны уынаффæ. Владимир Путин фидæны æвзæрстыты цæмæй фæуæлахиз уа, парти æппæт гæнæнтæй ууыл архайдзæн.
Партийы Сæрдар æрныхас кодта адæмон программæ æххæст кæныны хъуыддаджы иуæй-иу бæрæггæнæнтыл. Зæгъæм, «Иугонд Уæрæсе» уæлдай фылдæр æргом здахы æнæниздзинады райрæзты фарстатæм. Фарон партийы æххуысæй регионтæ райстой «тагъд медицинон æххуыс»-ы 2,5 мин хæдтулгæйæ фылдæр, 1,5 мин — цæугæ медицинон комплексы æмæ 85 мин ифтонггарзæй фылдæр.
— Парти разæнгардæй архайдта зæрдæ æмæ дадзинты низтæй рынчын адæмæн æххуысы мадзæлттæ цæттæ кæныны хъуыддаджы. Хостæ лæварисæг адæмы къордтæ бантыст фæуæрæх кæнын. Бюджетон æхцайæ ифтонгады бæрц бæлвырд фæфылдæр. Фонд «Хæлардзинады зиллакк» стæм низтæй сæйæг сывæллæттæн æххуыс кæныны хъуыддагыл бахардз кодта чысыл хъуагæй сæдæ цыппор фондз миллиард сомы, — загъта Дмитрий Медведев.
Парти кусы социалон æххуысы райрæзты фарстатыл. Сывæллоны райгуырды заман милуан бинонтæ райстой ныййарæджы фылдæргонд капитал. Уымæй уæлдай, «Иугонд Уæрæсе»-йы адæмон программæ кæй баххæст кодтой, уый фæрцы 800 мин ахуырдзауæн скъолаты фæзынд бынæттæ, рæвдауæндæтты та сарæзтæуыд 245 мин уæлæмхасæн бынаты.
«Иугонд Уæрæсе»-йы генералон советы нымæрдар Андрей Турчакы ныхасмæ гæсгæ, адæмон программæ æххæст кæнын цы бон райдыдтой, уæдæй нырмæ 83 мин социалон объектæй фылдæр арæзт æмæ нывылгонд æрцыдысты. Сарæзтæуыд 1338 скъолайы, 1676 рæвдауæндоны, 882 медицинон кусæндоны æмæ 145 спортивон объекты. 2,8 мин скъолайы, 4,2 мин медицинон кусæндоны, уæлдæр скъолаты 278 æмдзæрæны æмæ посты 2,1 мин хайады бындуронæй сцалцæг кодтой.
— Сæрмагонд æфсæддон операцийы архайджытæ æмæ сæ бинойнæгтæн æххуыс нымад у «Иугонд Уæрæсе»-йы адæмон программæйы ахадгæ хайыл. Фидаргонд æрцыдысты сæрмагонд æфсæддон операцийы архайджыты бинонты финансон уагæй хъахъхъæныны, лæвар юридикон æххуыс кæныны, алыхуызон гæххæттытæ аразыны хъуыддагимæ баст фæтк фæхуымæтæг кæныны æмæ ахуырады къабазы льготæтæ дæдтыны фæдыл закъонтæ, — загъта Андрей Турчак.
Йæ ныхасмæ гæсгæ, фарон адæмон программæ кæд царды уагътой, уæддæр цалдæр уагæвæрды æххæстгонд не ‘рцыдысты.
— Фарон кæй хъуамæ сцалцæг кодтаиккой, райдиан къæпхæны уыцы 3208 медицинон кусæндонæй 91 цалцæггæнæн куыстытæ кæронмæ нæ ахæццæ сты. Амынд уавæр сæвзæрд посты хайæдтимæ дæр. 1282 цалцæггæнинаг хайадæй ныронг 90 хайады цалцæггæнæн куыстытæ нæма ахицæн сты. Ахуырады системæйы зондамонджытæн иннæтæй фылдæр бартæ чи дæдты, зондамонæндзинады уагæвæрды тыххæй уыцы закъон дæр нæма сфидар кодтам. Ацы къабæзты фæдыл бæрнондзинад кæмæ хауы, уыцы цæстдарджытæн фæдзæхсын цыбыр рæстæгмæ сæ куысты хæстæ баххæст кæнын, — загъта партийы Сæрдар.
Æмбырды кæрон Дмитрий Медведев бафæдзæхста ацы азæн «Иугонд Уæрæсе»-йы адæмон программæйы хæслæвæрдтæ сбæлвырд кæнын æмæ се ‘ххæсткæнынадмæ цæст дарддæр дарын.
— Цæгат Ирыстон райрæзтæн ахъазгæнæг адæмон программæйы къорд къабазы æнтыстджынæй æххæст кæны. Скъолатæ æмæ хъæуты Культурæйы хæдзæрттæ бындуронæй цалцæг кæныны, стæй посты хайæдтæ нывыл кæныны программæтæ æххæст кæнæм, бирæфатерон хæдзæртты кæртытæ аив кæнæм, мидбæстон туризм рæзы. Цæгат Ирыстон адæмон программæ куыд æххæст кæны, уымæ нæ республикæйы Сæргълæууæг, партийы регионалон хайады нымæрдар Сергей Меняйло цæст дары. Объекттæм æрбацæугæйæ, æппæт къæпхæнты депутаттæ æмæ æхсæнады минæвæрттæ æххæстгонд куыстыты хæрзхъæддзинад сбæлвырд кæнынц. Фарон æртæсæдæ цæстдарæн балцы баххæст кодтам. Ацы куыст дарддæр æххæст кæндзыстæм, — зæгъы «Иугонд Уæрæсе»-йы цæгатирыстойнаг хайады нымæрдары хæдивæг Едзойты Марат.

Санаты Альбинæ

 

ОСТАВЬТЕ ОТВЕТ

Please enter your comment!
Please enter your name here