Национ культурæ æмæ киноаивад йæ бирæвæрсыг сфæлдыстадон курдиат æмæ гæнæнтæй чи фидауын æмæ рæзын кодта, уыцы зындгонд кинорежиссер, сценарист, УФ-йы Кинематографистты цæдисы уæнг, РЦИ-Аланийы культурæйы сгуыхт кусæг Джусойты Мурат не ’хсæн нал ис… Ахæм зæрдæхæлар, стыр мидкультурæ æмæ аивадон æрмдзæфы хицау адæймаджы тыххæй нæ ивгъуыд афоны дзурын кæй хъæудзæн нырæй фæстæмæ, уыцы уæззау æнкъарæнæй зæрдæ ныккæрзы.
Йæ удыхъæдæй Мурат æцæг ирон лæг кæй уыд, йæ адæмы рухс фидæныл, национ кинонаивады рæзтыл зæрдæйы кæй аудыдта, уый бæрæг уыд йæ алы акъахдзæф, йе сныхас, йæ уæздандзинад æмæ йæ удуæлдай сфæлдыстадон архайдæй. Нæ бæстæ æмæ Ирыстоны киноаивады Мурат бафæзминаг æмæ хæдхуыз сфæлдыстадон куыст фæкодта æртын фондз азæй фылдæр. Куыд режиссер, сценарист, продюсер, афтæ бакуыста, нæ бæстæ æмæ Цæгат Кавказы кинойы азфысты бæрæг чи дары, адæмы удварны рæзтыл чи ахады, фæлтæртæн уарзон чи ссис æмæ, алкæддæр цымыдисæй кæмæ фæкæсынц, ахæм аивадон æмæ документалон кинонывтæ: «Хохаг», «Фарн», «Человек в зеленом кимоно», «Атлантида над облаками», «Кандагар. Пятая рота», «Легенда горы Тбау», «Курьер на Восток», «Похищение Европы», «Фанат», «Портрет художника в юности», «Колыбель кочующего ветра», «Рудник»…
Иудадзыгдæр йæ ист кинонывтимæ Мурат архайдта æппæтуæрæсеон æмæ дунеон кинойы фестивальтæ æмæ конкурсты. Йе ’рмдзæфæн æмæ курдиатæн дзы-иу зындгонд киноаивадиртасджытæ æмæ режиссертæ скодтой аккаг бæрзонд аргъ, афтæмæй-иу уыцы сфæлдыстадон фæлварæнтæй ссыд йæ райгуырæн Ирыстонмæ уæлахиздзауы хорзæхтимæ.
Нæ культурæйы зæрдиаг зиууон, сфæлдыстадон фæлтæрыл аудæг уæздан, фендджын хистæр, киноаивады стыр дæсны Джусойты Муратæн æрдз æмæ Дунесфæлдисæг ма балæвар кодта актер æмæ хъæбысæй хæцæджы æвæджиауы арæхстдзинад дæр. Уый уыд нæ республикæ, бæстæйы чемпион æмæ спорты мастер уæгъдибар хъæбысхæстæй.
Йæ чингуытæ «Время Ацамаза» æмæ «Один» зæрдиагæй кæсынц, куыд ахуыргæндтæ, афтæ алы дæсныйæдтыл хæст, фæлæ нæ рагфыдæлты истори æмæ культурæйæн аргъгæнæг адæм.
Нæ бæстæ æмæ Цæгат Кавказы киноаивады рæзтыл йæ зæрдиаг архайды тыххæй Джусойты Муратæн лæвæрд æрцыд нæ республикæйы кадджындæр хорзæх – майдан «Ирыстоны намысæн».
Адæймаджы цард æнусон нæу, фæлæ мыггагмæ ацы зæххыл фæцæры лæгæн йæ уды хорзæх, рæсугъд ном æмæ сфæлдыстад. Кæд афтæ у, уæд Джусойты Мураты номæн æмæ аивадон бынтæн уыдзæн æнусмæйы цæрæнбон…
Газет «Рæстдзинад»-ы
редакцийы кусджытæ
