Мæскуыйы кусæг балцы уæвгæйæ, РЦИ-Аланийы Сæргълæууæг Сергей МЕНЯЙЛО фембæлд Национ хъуыддæгты федералон агентады разамонæг Игорь БАРИНОВИМÆ.
Ныхас рауад регионы паддзахадон политикæ царды уадзыныл æмæ алы адæмы хæттыты ‘хсæн разыдзинад фидардæр кæныныл. Куыд фæбæрæг кодтой, афтæмæй Цæгат Ирыстон æмæ федералон агентады ‘хсæн сфидар æмгуыстад.
Фæбæрæг кодтой нациты æмæ динты ‘хсæн ахастдзинæдтæ, мадæлон æвзаг хъахъхъæныны, йæ ахуыр кæныны æмæ йæ райрæзтæн фадæттæ саразыныл, терроризм, экстремизмы идеологийæ бахизыныл, адæмты æмæ этникон æхсæнæдты культурон хæдхуыз бахъахъхъæныныл, уæрæсейаг хъазахъхъæгты хъахъхъæныны, граждайнаг сабырдзинад æмæ разыдзинадмæ тырныныл.
2016 азæй Национ хъуыддæгты федералон агентад æмæ Цæгат Ирыстон бафыссынц федералон бюджетæй субсидитæ райсыны тыххæй разыйы гæххæтт, уыдоны руаджы регионы царды уадзынц алыхуызон æхсæнадон ахадгæ хъуыддæгтæ. Баст вæййынц уæрæсейаг нацийы иудзинады æмæ нæ бæстæйы этнокультурон рæзты фарстаимæ.
Цæгат Ирыстон æмæ федералон агентады ‘хсæн бастдзинæдтæ фидар кæныны тыххæй Сергей Меняйло бузныджы ныхæстæ загъта Игорь Бариновæн, йæ архайды фæдыл чиновник хорзæхджын æрцыд майдан «Ирыстоны Намысæн»-æй.
РЦИ-Аланийы Сæргълæууæджы æмæ Хицауады пресс-службæ
