Фарны фæндагыл

0
30

Мыхуырæй рацыд журнал «Мах дуг»-ы юбилейон фæндзæм номыр. Журналыл сæххæст 90 азы

Мæнæ цы зæгъы йæ арфæйы ныхасы нæ республикæйы Сæргълæууæг Сергей Меняйло: «Бæрæгбон арфæтæй фидауы, æмæ «Мах дуг»-æн мæ зæрдæ зæгъы, цæмæй, цы фæрнджын хъуыддæгтыл хæст у, уыдон йæ къухы æфтой, йæ коллектив ноджы фылдæр æргом дарæд æрыгон автортæм, фыссæд, æхсæнады цы тыхсын кæны, уыдæттыл. Сæйрагдæр та – йæ къæбиц литературæйы жанрты дæр æххæст уæд цымыдисаг æмæ актуалон уацмыстæй.
Журналæн мæ зæрдæ зæгъы, цæмæй йæ кæсджыты нымæц фылдæрæй-фылдæр кæна. Ирон йæхи чи хоны, йæ мадæлон æвзаг чи уарзы, уыдоны куыстуæтты æмæ хæдзæртты «Мах дуг» искуы иу хатт æрбафтæг уазæг нæ, фæлæ хионхæстæджы хуызæн хъуамæ уа! Дуг æмæ уæ рæстæджы хорзæх уæд, нæ уарзон Ирыстоны цæрджытæ!..»
«Мах дуг»-ы тыххæй ма сæ хъуыдытæ, сæ арфæйы ныхæстæ загътой «Иры Стыр Ныхас»-ы координацион советы сæрдар Уататы Зелим, РЦИ-Аланийы Фысджыты цæдисы сæрдары хæстæ æххæстгæнæг Хозиты Барис, Ирыстоны Фысджыты цæдисы æмсæрдар Хъазиты Мелитон, Кавказы фысджыты клубы президент Миясат Муслимова (Дагестан), литературон журнал «Минги – Тау»-ы сæйраг редактор Аскер Додуев (Кæсæг-Балхъар), Паддзахадон автономон уагдон «Издательский дом»-ы директор Сулиман Мусаев (Цæцæны республикæ), ЦИПУ-йы президент
Мæхæмæтты Ахуырбег æмæ æндæртæ.
«Мах дуг»-ы равдыст» дзурæг у журналы абоны кусджыты цард æмæ архайдыл.
Журналыл иузæрдион чи у, уыдон дзы бакæсдзысты Касаты Батрадзы æмдзæвгæты цикл «Зæрæхсиды фæлмæн сагъæстæ».
Прозаикон уацмыстæй журналы бакæсæн ис Гусалты Барисы этюдтæ «Сæкæрджын мыд», «Райгуырæн уæзæг»,
«Мидыстъæлфт» æмæ æндæртæ.
Зæрдæмæдзæугæ у, Булкъаты Игоры роман «Гæрæн»-æй цы скъуыддзаг мыхуыргонд æрцыд, уый.
Золойты Аркадийы ног тæлмацтæ дæр сты бакæсинаг. Ратæлмац кодта Хильде Домин, Нейдхарт фон Ройенталь, Генрих Гейне æмæ æндæр немыцаг поэтты æмдзæвгæтæй. Цымыдисаг сты Тъехты Тамерланы цыбыр нывтæ «Фыссæджы сагъæстæ», «Чысыл дзæнгæрæджы зæлланг…», «Къухылхæцæг», «Бынтондæр амард…»
Уæлдай цымыдисагдæр у, «Мах дуг»-ы 1934 азы фыццаг номыры æрмæджытæ дзы мыхуыргонд кæй æрцыдысты уæды шрифтæй, уый.
Журналы ма ис æндæр æрмæджытæ дæр.

АБАЙТЫ Эдуард

ОСТАВЬТЕ ОТВЕТ

Please enter your comment!
Please enter your name here