Мӕскуыйы уыдис кусӕг фембӕлд РЦИ-Аланийы Сӕргълӕууӕг Сергей МЕНЯЙЛО ӕмӕ Уӕрӕсейы Федерацийы нымӕцон рӕзт, бастдзинад ӕмӕ дзыллон коммуникациты министр Максут ШАДАЕВӔН. Ныхас цыди нӕ республикӕйы нымӕцон трансформаци ӕмӕ телекоммуникацион инфраструктурӕ рапарахат кӕныны тыххӕй.
Регионы Сӕргълӕууӕг Максут Шадаевӕн сӕрмагондӕй радзырдта, Цӕгат Ирыстоны Уӕрӕсейы Нымӕцон рӕзты министрады проект «Бастдзинады алывӕрсыг лӕггад» куыд ӕххӕстгонд цӕуы, уый тыххӕй. Проекты фӕлгӕты хъуамӕ саразой бындурон станцӕтӕ Интернеты хызмӕ бацӕуынӕн ӕмӕ мобилон бастдзинады лӕггӕдтӕ дӕттынӕн, 100 адӕймагӕй 500 адӕймаджы бӕрц кӕм цӕры, ахӕм цӕрӕн бынӕтты. 2021 азӕй фӕстӕмӕ республикӕйы ахӕм бастдзинадмӕ бафтыдтой Дӕллаг Ларс, Хъобан ӕмӕ Дзынагъайы хъӕутӕ, стӕй Тельманы поселок. Ацы азы кӕронмӕ бындурон станцӕтӕ сараздзысты ӕмӕ кусын райдайдзысты Зӕронд Саниба ӕмӕ Мӕхческы хъӕуты.
— Абон Цӕгат Ирыстоны ӕппӕт мадзӕлттӕ дӕр арӕзт цӕуы бастдзинад ӕмӕ цырд Интернеты хызы райрӕзтӕн. Социалон ахадындзинад кӕмӕн ис, уыцы объекттӕ се ‘ппӕт дӕр иугонд сты Интернеты хызмӕ. Мобилон бастдзинады лӕггӕдтӕй абон республикӕйы хъӕутӕ ӕмӕ горӕтты цӕрджыты 98 проценты пайда кӕнынц, цырд Интернетӕй та — 82 проценты. Стыр ахадындзинад ис, Уӕрӕсейы Нымӕцон рӕзты министрады ӕххуысӕй ӕппӕт дзыллон социалон лӕггӕдтӕ дӕр электронон хуызмӕ ивд кӕй ӕрцыдысты, уый. Фӕлӕ ма субъекты фӕзуаты баззад, хӕрзхъӕд бастдзинадӕй хъуагдзинад кӕм ӕййафынц, ахӕм цӕрӕнуӕттӕ. Уыцы хъуыддаг рӕстмӕ алыг кӕнынмӕ дӕр нӕ зӕрдӕ дарӕм нӕ федералон ӕмгуыстгӕнджыты ӕххуысыл, — фӕбӕрӕг кодта Сергей Меняйло.
Фембӕлды республикӕйы Сӕргълӕууӕг радзырдта, фӕстаг ӕртӕ азы бастдзинады оператортӕ егъау куыст кӕй бакодтой — сарӕзтой 77 бындурон станцӕйы ӕмӕ фӕногдӕр кодтой 400. Фембӕлды нысангонд ӕрцыд уыцы куыст дарддӕр хӕццӕ кӕнын, цӕмӕй, туристон объекттӕ кӕм ис, уыцы дӕрддзӕф чысыл хӕххон хъӕутӕм дӕр бахӕццӕ уой цырд радиотелефонон бастдзинад ӕмӕ Интернет.
Ноджы ма фӕмбӕлды архайджытӕ дзырдтой нымӕцон трансформацийы тыххӕй, ома, экономикӕ, социалон къабӕзтӕ ӕмӕ паддзахадон фӕтк дӕттыны фыдыбӕстаг операцион системӕтӕ ӕмӕ программон продукттӕм рахизыны тыххӕй.
ГАПБАТЫ Алетӕ
