РЦИ-Аланийы Сӕргълӕууӕг Сергей МЕНЯЙЛО Бӕгӕныфыцӕн компаниты къорд «Бавари»-йы коллективӕн зӕрдиаг арфӕ ракодта куыстуаты 30 азы юбилейы фӕдыл ӕмӕ бӕрзонд паддзахадон хӕрзиуджытӕ ратта йӕ разамонджытӕ ӕмӕ кусджытӕн.
Мадзалы архайдтой Уӕрӕсейы Федерацийы ӕххӕстбарджын минӕвары ӕххуысгӕнӕг Цӕгат Кавказы федералон зылды Айдамир Валиев, республикӕйы Парламент ӕмӕ Хицауады минӕвӕрттӕ.
Кадджын ӕмбырд гом кӕнгӕйӕ, Сергей Меняйло загъта, компанийы бындурӕвӕрӕг Битарты Вячеслав ӕмӕ ӕцӕг профессионалтӕ, йӕ куыст зӕрдӕйӕ чи уарзы, уыцы ӕнгом коллектив стыр ӕвӕрӕн кӕй бахастой Цӕгат Ирыстоны рӕзтмӕ.
— 30 азы бизнесӕн гыццыл ӕмгъуыд нӕу. Компаниты къорд «Бавари» у дӕнцӕг, куыстуат, фыдыбӕстаг кондады традицитӕ хъахъхъӕнгӕйӕ, цы къабазы архайы, уый рӕзтыл хъомысджынӕй куыд кусын хъӕуы, уымӕн. Уый та, фыццаджыдӕр, у, ам хъазуатонӕй цы коллектив фӕллой кӕны, уый руаджы. Республикӕ бӕрзонд аргъ кӕны, «Бавари» Цӕгат Ирыстоны социалон-экономикон ӕмӕ культурон рӕзтмӕ, сӕрмагонд ӕфсӕддон операцийы хӕстӕ ӕххӕст кӕнынмӕ материалон ӕгъдауӕй цы стыр ӕвӕрӕн хӕссы, уымӕ. Нӕ лӕппутӕй тохы быдырмӕ бархийӕ чи ацыд, уыдонӕн феххуыс кӕныны хъӕппӕрис фыццаг чи бавдыста, уый уыдис Битарты Вячеслав, ӕмӕ сын абоны онг дӕр ӕххуыс кӕны. Ныртӕккӕ знаджы ныхмӕ хъӕбатырӕй чи тох кӕны, уыдоны номӕй дын стыр бузныг! — загъта Сергей Меняйло.
Республикӕйы разамонӕг Битарты Вячеслав ӕмӕ компанийы ӕппӕт кусджытӕн дӕр зӕрдиаг арфӕ ракодта.
Уӕрӕсейы Федерацийы ӕххӕстбарджын минӕвар Цӕгат Кавказы федералон зылды Юрий Чайкайы номӕй компанийы разамонӕг ӕмӕ коллективӕн арфӕ ракодта Айдамир Валиев:
— 2014 азӕй фӕстӕмӕ Уӕрӕсе иугонд Ныгуылӕны санкциты бын ис, уыимӕ, уыцы санкцитӕ парахат кӕнынц хӕлцы ӕдасдзинадыл дӕр. Зынаргъ Вячеслав Зелимханы фырт, ӕххӕстбарджын минӕвары аппарат дӕу ӕмӕ дӕ намысджын ӕнгом коллективӕн арфӕ кӕны, уыцы санкциты сӕрты хизынӕн цы мадзӕлттӕ аразут, ног куысты бынӕттӕ гом кӕныныл зӕрдиагӕй кӕй архайут ӕмӕ иудадзыг сӕрмагонд ӕфсӕддон операцийы архайджытӕн кӕй ӕххуыс кӕнут, уый тыххӕй.
Цӕгат Ирыстоны социалон-экономикон ӕмӕ ӕхсӕнадон-политикон рӕзтмӕ йе стыр ӕвӕрӕны тыххӕй Битарты Вячеславӕн лӕвӕрд ӕрцыд РЦИ-Аланийы уӕлдӕр паддзахадон хӕрзиуӕг — «Ирыстоны намыс».
Сӕ фӕллойадон ӕнтыстытӕ ӕмӕ хъомысджын архайды тыххӕй РЦИ-Аланийы Сӕргълӕууӕджы Указмӕ гӕсгӕ, Цӕгат Ирыстон-Аланийы Кады грамотӕтӕй хорзӕхджын ӕрцыдысты:
— Битарты Зелимхан, Бӕгӕныфыцӕн компаниты къорд «Бавари»-йы генералон директор;
— Абойты Зауыр, Бӕгӕныфыцӕн компаниты къорд «Бавари»-йы коммерцион директор;
— Гӕбӕраты Тамилӕ, агрофирмӕ «Арт»-ы хӕлцы продукцийы линийы оператор;
— Гуӕцӕлты Алан, «Фат — Агро»-йы логист;
— Дзангуыбегты Сослан, агрофирмӕ «Фат»-ы базарадон секторы хицау;
— Дзиццойты Марат, агрофирмӕ «Фат»-ы контролон-ревизион хайады хицау;
— Дзуццаты Виктория, Бӕгӕныфыцӕн компаниты къорд «Бавари»-йы юрисконсульт;
— Хъайтмазты Фатимӕ, Бӕгӕныфыцӕн компаниты къорд «Бавари»-йы куыст ӕмӕ куысты мызды хайады хицау.
Компанийы кусджыты ма хӕрзиуджытӕй схорзӕхджын кодтой РЦИ-Аланийы Парламент ӕмӕ РЦИ-Аланийы Хицауады номӕй.
ГАПБАТЫ Алетӕ
