Ӕрдзы ӕууӕлтӕм иудадзыг чи кӕсы, уыдон ацы хатт нӕ фӕсайдтой — рагагъоммӕ нын куыд загътой, афтӕмӕй ацы аз сӕрд тынг тӕвд у. Тӕвд рӕстӕджы та адӕмӕн сӕ уды хос у дон. Фӕлӕ ныр дзӕвгар рӕстӕг Хъарман-Сындзыхъӕу ӕмӕ Къора-Урсдоны цӕрджытӕ хъизӕмарӕй мӕлынц — дон нӕ фаг кӕны.
Раздӕр ма, мӕнӕ арахъхъ уадзгӕйӕ, цы тӕдзынӕг вӕййы авгмӕ, ахӕм уагӕй цыди кърантӕй, фӕлӕ ныр бынтон бахус. Дыгуры районы ацы фарстатыл дзуапдӕттӕг къантор адӕмӕн фехъусын кӕны, архайӕм ыл, зӕгъгӕ, фӕлӕ сӕ архайды фӕстиуджытӕ ныр дыууӕ мӕйӕ фылдӕр никӕцӕй ма разындысты. Абон райсомӕй та нӕм Урсдонӕй фӕдисхъӕр сыхъуыст — ныр, дам, кърантӕй ӕртӕх дӕр нал хауы, афтӕмӕй та бирӕ хӕ-дзӕртты — хуысгӕ рынчынтӕ.
— Знон донӕй ӕфсисады къанторы разамонӕг Тауаситы Сослан йӕ хӕдтулгӕйы ӕрцӕйцыд, мах йӕ размӕ ӕрлӕууыдыстӕм, ӕмӕ нын афтӕ, кусӕм, дам, хъуыддаг фӕрӕстмӕ кӕныныл, фӕлӕ уал, дам, уын ныртӕккӕ та машинӕ дон уаргӕ ӕрцӕуы, ӕмӕ дзы райсут. Машинӕ дӕр нӕ федтам, дон дӕр. Йӕхимӕ хӕдтулгӕ кӕмӕн ис, уый хохрӕбынмӕ ссӕуы ӕмӕ уырдыгӕй суадӕттӕй ласы, фӕлӕ, кӕмӕ нӕй «пӕдвод», уый та цы фӕуа, — радзырдтой хъӕуы цӕрджытӕ.
Мӕхӕдӕг хъармайнаг дӕн, ӕмӕ хорз хъуыды кӕнын, раздӕр-иу Урсдоны донӕй хастам нуазынмӕ дӕр дон, фӕлӕ ныр уавӕр бынтон ӕндӕрхуызон у. Хъӕдрӕбынты доныбылтыл чидӕртӕ дачӕтӕ сарӕзта — раст дыууӕуӕладзыгон галуантӕ, ӕмӕ уӕм куыд кӕсы, сӕ чъизи дӕттӕ кӕдӕм цӕуынц? Тынг дызӕрдыггаг у, сыгъдӕггӕнӕн системӕтӕ сӕвӕрдтой, уый.
Адӕммӕ фиддоны гӕххӕттытӕ бадӕттынц, уӕ цӕхӕрадӕттӕ донхорыг кӕнут, ӕмӕ уый тыххӕй бафидут, уыимӕ, гыццыл аргъ дӕр нӕ сӕвӕрдтой уыцы лӕггадӕн. Фӕлӕ кърӕнттӕ куы бахус сты, уӕд цавӕр «полив»-ы тыххӕй стигъынц ӕхца?
Ахӕм уавӕр нӕ хъӕуты никӕд уыд, куыд фӕзӕгъынц, дон нӕ ласгӕ кодта, цалынмӕ къорд азы размӕ сӕрмагонд программӕйы фӕлгӕты доны хӕтӕлтӕ ивд не ‘рцыдысты, уӕдмӕ. Ӕмӕ адӕмы бамбарын ӕмбӕлы, фӕлтау нын сӕ куы нӕ аивтаиккой, зӕгъгӕ.
Райсомӕй, куыстмӕ ӕрбацӕугӕйӕ, уӕдӕ, зӕгъын, ме ‘мхъӕуккӕгтӕн истӕмӕй феххуыс кӕнон, ӕмӕ райдыдтон иу бӕрнон лӕгӕй уӕддӕр дзуапп райсыныл архайын, дзырдтон телефонӕй, «куыд Дзӕуджыхъӕуы, афтӕ
Дыгуры районы дӕр, фӕлӕ, марадз, зӕгъай, кӕд искӕуыл фӕхӕст дӕн. Нӕдӕр «горячая линия» систа хӕтӕл, нӕдӕр — Дыгуры районы дзуапдӕттӕг.
Диссӕгтӕ арӕзт цӕуы нӕ республикӕйы, куы айхъусай нӕ тӕрхоны лӕгтӕм, уӕд дзӕнӕты бӕстӕйы цӕрӕм, афтӕмӕй та нын, паддзахад нӕ, фӕлӕ, Хуыцау цы стырдӕр хӕзна радта, уӕлдӕфӕй рахизгӕйӕ, — дон, уымӕй дӕр ахӕм тӕвд рӕстӕджы ӕнӕхай фестӕм. Цымӕ Хъарман-Сындзыхъӕу ӕмӕ Къора-Урсдоны (мах нӕхи иу хъӕуыл нымайӕм, кӕд нӕм дыууӕ администрацийы ис, уӕддӕр) цӕрджыты фӕдисхъӕр искӕмӕ фехъуысдзӕн? Кӕдмӕ хъизӕмар кӕндзысты? ӕви уарынтӕм ӕнхъӕлмӕ кӕсой ӕмӕ та, кӕддӕрау, тӕстӕ ӕмӕ къоппаты ӕмбырд кӕной уарыны дон?
ГАПБАТЫ Алетӕ
