Ирыстоныл айхъуыст, зæрдæ кæмæй ныккæрзы, ахæм фыдохы хабар. Йæ цардæй ахицæн нæ бæстæ æмæ Ирыстоны классикон æмæ адæмон музыкалон аивады рæзтмæ ахадгæ æвæрæн бахæссæг, номдзыд оперон æмæ адæмон зарæггæнæг, Уæрæсейы Федераци æмæ Республикæ Цæгат Ирыстон-Аланийы адæмон артист, Рахизфарсы районы кадджындæр хистæртæй иу – Бæцæзаты Азмадийы фырт Юри.
Йæ ном æмæ сфæлдыстадон фæндагимæ баст у национ классикон аивады рæзты æнæхъæн дуг. Юри уыд ирон æмæ нæ бæстæйы оперон аивады зынгæ æмæ курдиатджындæр минæвæрттæй иу. Йæ райгуырæн хъæу Заманхъулы, хистæртæй адæмон зарæджы аивады хорзæх банкъаргæйæ æмæ йæ зæрдæйы ба-уарзгæйæ, уый хъæуы Культурæйы хæдзары сценæйæ рахызт Уæрæсе æмæ Ирыстоны профессион аивады стырдæр æмæ кадджындæр фæзтæм. Кæд дуне, нæ бæстæ æмæ Ирыстоны номдзыд композиторты оперæтæ æмæ опереттæты сæйраг сурæтты аив фæлгонцтæ сарæзта, уæддæр, вокалон классикон аивадмæ фыдæлтыккон зарæджы руаджы барджынæй кæй акъахдзæф кодта, уымæй уыд йæ царды фæстаг бонмæ дæр буц æмæ сæрыстыр.
Заманхъулы астæуккаг скъола каст куы фæци, уæд вокалон аивадыл профессион æгъдауæй сахуыр кæнынмæ радта йе ’ппæт хъарутæ, зонд, йе ‘нкъараг уд æмæ зарæггæнæджы бирæвæрсыг курдиатæй æххæст зæрдæ. Йæ вокалон стыр курдиатæн йæ бахсидæн артдзæстытæ уыдысты Дзæуджыхъæуы музыкалон училищæ (ныр – Гергиты Валерийы Аивæдты колледж), Мæскуыйы Петр Чайковскийы номыл паддзахадон æмæ Саратовы паддзахадон консерваторитæ.
Номдзыд оперон зарæггæнæг Бæцæзаты Юрийæн йæ бон уыд нæ бæстæйы, хæстæг æмæ дард фæсарæнты дæр йæ курдиатæй йæхицæн йæ цард æмæ сфæлдыс-
тадон фæндаг кад æмæ рады бындурыл самайын, хорз ном æмæ цæсгом скæнын. Фæлæ уыд йе ‘взонджы бонтæй йæ царды фæстаг сулæфты онг йæ ирон адæмы, Рахизфарсы районы, Заманхъулы, йæ мыггаджы, Ирыстоны, Уæрæсейы патриот. Ивгъуыд æнусы 70-æм азты нæ республикæйы уæды разамонæг Хъæбæлоты Билар æмæ номдзыд оперон режиссер Лекъты Юрийы фæндæй Оперæ æмæ балеты театр арæзт куы ‘рцыд, уæд номдзыд зарæггæнджытæ Билаонты Долорес, Хъуылаты Елхъан, Гæлуаты Азæ, Котолиты Мария, Абайты Хаджумар, Суанты Федыр æмæ нæ иннæ курдиатджын профессион зарæггæнджытимæ Бæцæзаты Юри йе сфæлдыстадон фæндаг райдыдта йæ уарзон Цæгат Ирыстоны Оперæ æмæ балеты паддзахадон театры. Кад æмæ дзы радæй фæкуыста фæндзай азæй фылдæр, йæ царды фæстаг сулæфты онг. Ацы аивады артдзæсты сценæйы цы оперæтæ æмæ опереттæты сарæзта сæйраг архайджыты ирд, хæдхуыз æмæ æнкъарæнджын сурæттæ, уыдон сты дыууæсæдæйæ фылдæр.
Курдиатджын зарæггæнæджы аивад зонгæ æмæ уарзон уыд канд Ирыстоны адæмæн нæ, йе ‘рмдзæфимæ зонгæ уыдысты Мæскуы, Бетъырбух, Саратов, Ростов, Цæгат Кавказ æмæ Фæскавказы республикæты, хæстæг æмæ дард фæсарæнты горæтты мингай аивадуарзджытæ. Бæцæзаты Юри у Иры номдзыд хъæбул Хетæгкаты Къостайы цард æмæ бирæвæрсыг сфæлдыстад нæ бæстæйы аивадуарзджытæн классикон музыкалон аив æвзаджы руаджы Плиты Христофоры оперæ «Къоста»-йы сæйраг архайæджы фæлгонц хуыздæр æмæ уырнинагдæрæй равдисæг. Ацы куыст уыд йе сфæлдыстады бæрзонддæр æмæ аивдæр мæсгуытæй иу.
«Ирыстоны намысæн» майдан æмæ Уæрæсейы кадджындæр хорзæх «Хæлардзинады орден» хæссæг Бæцæзаты Юрийы вокалон аивады гæнæнтæ уыдысты алывæрсыг. Телеуынынад æмæ радиойы ныффыста уырыссаг, ирон лирикон æмæ адæмон зарджыты сæрмагонд цалдæр программæйы. Бацæттæ кодта ирон лирикон æмæ фыдæлтыккон хъæбатырты вокалон уацмысты
дыууæ аудиодискы.
Адæмуарзон артист Дзæуджыхъæуы Аивæдты колледжы уыд вокалон хайады ахуыр-
гæнæг. Æнтыстджынæй дзы бакуыста къорд азы. Уыцы рæстæгмæ бацæттæ кодта, абон сæ ном Ирыстон æмæ Уæрæсейы зындгонд кæмæн у, ахæм зарæггæнджыты.
Заманхъуйлаг курдиатджын зарæггæнæг, ирон æмæ уырыссаг оперон аивады стыр дæсны Бæцæзаты Юрийы ном æнусмæ цæринаг уыдзæн йæ уарзон æмхъæуккæгты, аивадуарзджыты сæдæгай фæлтæрты зæрдæтæ æмæ нæ бæстæйы классикон аивады историйы. Йе ’сфæлдыстад æмæ уды бæркæдтæ та сты Уæрæсе æмæ Ирыстоны адæмон æмæ классикон вокалон аивады æнусон фарны хæзнатæ!
Нæ уарзон зарæггæнæг, нæ уæздан æмæ буц хистæр, Заманхъул æмæ Ирыстоны булæмæргъ, нæ зынаргъ Юри, рухсаг у….
Газет «Рæстдзинад»-ы
коллектив
